1. Ni bughuma bwahi obwa bandu abathaleghulha bangathunga na Yehova?

ERIHIIKA ly’abaramya ba Yehova muli Yesu, oyuli “kambere oyulhabire ebyosi ebyahangikawa,” n’esyongumi sy’abamalaika. (Kol. 1:15; Esy. 103:20) Omughulhu Yesu abya okwa kihugho, mwakangania ngoku abandu abathaleghulha bangana hulha Yehova mwa Thatha wabu. Akakania n’abigha biwe, Yesu mwahulha Yehova mwa “Thatha waghe, na Thatha wenyu.” (Yn. 20:17) Kandi thukabya thukayihayo oku Yehova n’eribatizibwa, thuk’ingira omw’ihiika ly’olhwanzo ery’abalikyethu.​—Mk. 10:29, 30.

2. Thukendi kania okuki omo mwatsi ono?

² Abandi kikabakalira erilhangira Yehova nga Thatha wabu w’olhwanzo. N’abandi banganabya isibasi ngoku banga kangania balikyabo b’olhwanzo. Omo mwatsi ono, thukendi lebya emibere Yesu akathuwathikirayamo erilhangira Yehova nga Thatha w’olhwanzo, oyo thwanga yithunda hakuhi nayu. Kandi thukendi minya esyonzira esyo thwanga gherereryamo Yehova bikahika okwa mibere thukathwaliramo balikyethu.

3. Omusabe w’eky’erileberyako akathuthunda athi hakuhi na Yehova?

³ Yehova ni Thatha w’olhwanzo. Yesu anzire ithwalhangira Yehova ngoku akamulhangira​—ng’omubuthi oyutsomene kandi ow’olhwanzo oyo ky’olhobire erihikira, butsira ng’omundu oyuwithe obuthoki oyo owiwe ni lhaghira lisa-lisa. Eki kilhangirikire omwa ebya Yesu akangiriraya abigha biwe erisaba. Mwatsuka omusabe w’eky’erileberyako omwa binywe bino: “Thatha wethu.” (Mt. 6:9) Yesu angana thubwire athi thwahule Yehova mwa “Omuthoki w’Ebyosi,” “Omuhangiki,” kutse “Mwami w’Erikotha”​—ebyosi ni bitsumbi ebitholere kandi ebiri omwa Masako. (Enz. 49:25; Isa. 40:28; 1 Tim. 1:17) Aliwe, Yesu mwakolesya ekinywe ekikakanganaya obughuma “Thatha.”

4. Thukaminya thuthi ngoku Yehova anzire ithwayithunda hakuhi nayu?

 ⁴ Kikanakukalira erilhangira Yehova nga Thatha w’olhwanzo? Abandi omw’ithwe kikabakalira. Emibere thwakuliramo yangana leka ikyathukalira eriligha thuthi hanganabya thatha w’olhwanzo. Ka kikahumulikanaya eriminya ngoku Yehova akayitheghereraya ndeke-ndeke eriyowa lyethu! Anzire eriyithunda hakuhi nethu. Ky’ekikaleka Ekinywe kiwe ikyathubwira kithi: “Muyithunde hakuhi na Nyamuhanga, nayu akendi yithunda hakuhi nenyu.” (Yak. 4:8) Yehova athwanzire kandi akathubwira athi akendibya Thatha wethu mubuya oyulengire.

5. Ngoku kiri omu Luka 10:22, Yesu angathuwathikya athi eriyithunda hakuhi na Yehova?

⁵ Yesu angana thuwathikya eriyithunda hakuhi na Yehova. Yesu asi Yehova ya ndeke kandi akakanganaya emibere Yiwe ya ndeke-ndeke erihika n’okw’ibugha athi: “Oyowamanyilhangira iniabirilhangira Thatha.” (Yn. 14:9) Ng’omwana omukulhu, Yesu akathukangiriraya nga thwanga sikya thuthi n’eriowa Thatha wethu, nga thwanga yihighulha thuthi okw’imuponesya, kandi nga thwanga kolhaki iyo erithusima. Aliwe, engebe ya Yesu okwa kihugho kutsibu-tsibu yikabisulha ngoku Yehova ni w’olhukeri kandi ow’olhwanzo. (Soma Luka 10:22.) Leka thulebaye eby’erileberyako birebe.

6. Iha eby’erileberyako ebikakanganaya ngoku Yehova mwahulikirira Yesu.

⁶ Yehova akahulikirira abaana biwe. Lengekanaya okwa mibere Yehova abya akahulikiriramo Mughalha wiwe akambere. Ahathe erithika-thika Yehova mwahulikirira emisabe mingyi eyo Mughalha wiwe asaba omughulhu abya okwa kihugho. (Lk. 5:16) Mwahulikirira Yesu akasaba okw’ithwamu erilithohire, ng’omughulhu asombolha abakwenda biwe 12. (Lk. 6:12, 13) Kandi Yehova mwahulikirira Yesu omughulhu abana erihangya-hangya. Yesu iniakisiya iniaghoberibwa, mwasaba Thatha wiwe ya kutsibu busana n’erilengwako erikalire eryo abya iniakayabana. Yehova mwathasubulira okw’ihulikirira emisabe ya Yesu lisa aliwe kandi  mwathuma omumalaika eryasyaghumya Mughalha Wiwe mwanze.​—Lk. 22:41-44.

7. Thutholere ithwayowa thuthi busana n’eriminya ngoku Yehova akahulikirira emisabe yethu?

⁷ Munabwire, Yehova anemulholha embere erihulikirira emisabe y’abaghombe biwe, kandi akasubirayayo okwa ndambi eyitholere kandi omwa nzira eyuwene kutsibu. (Esy. 116:1, 2) Lengekanaya okwa mibere mwali wethu we India ayilhangiriramo eki. Iniakahanga-hangaya kutsibu, neryo mwasaba Yehova erilhua okwa muthima busana n’omwatsi oyu. Akabugha athi: “Endegheka ye JW Broadcasting^® ey’Okwakathano 2019 eyabya yikakania okwa bya thwangakolha erirwanisya erihangya-hangya ya nabya ingayithagha. Muyasubirya emisabe yaghe.”

8. Ni mwanzira syahi esyo Yehova akanganirayamo kw’anzire Yesu?

⁸ Yehova athwanzire kandi akathutsomana, ngoku anabya anzire n’eritsomana Yesu omughulhu abya awithe olhukwamirwa olhukalire hano okwa kihugho. (Yn. 5:20) Mwatsomana Yesu bunyakirimu, omw’iyowa, na kinyamubiri. Kandi Yehova mwakangania kw’anzire Mughalha wiwe kandi kw’akamusima. (Mt. 3:16, 17) Kundi mughulhu wosi iniakabya inianasi ngoku Thatha wiwe w’olhwanzo ow’elhubulha amwanzire, Yesu isyali yowa ng’ali iyuwene.​—Yn. 8:16.

9. Ni byahi ebikakanganaya ngoku Yehova athwanzire?

⁹ Nga Yesu, ithwe bosi thwabiriyilhangirira olhwanzo lhwa Yehova omwa nzira nyingyi. Thalengekania oku kino: Yehova abirithuletha okw’iyo kandi abirithuhira omw’ihiika liwe ly’obunyakirimu ery’olhwanzo kandi eriri bughuma nuku thutseme kandi thuyowe buholho. (Yn. 6:44) Kandi Yehova akathuha ebyalya by’obunyakirimu ebikahimba erikirirya lyethu. Nibya kandi akathuwathikaya eribana ebiyithawa byethu by’ekinyamubiri. (Mt. 6:31, 32) Thukabya thukalengekania okwa lhwanzo olho Yehova athuwithire, thukongera erimwanza.

10. Thwang’ighaki okwa mibere Yehova akathwaliramo balikyethu?

¹⁰ Yehova anzire balikyethu. Aliwe mughulhu mungyi kyangana thukalira eribanza n’eribakangania ku thubanzire. Kundi esyokalikya n’emibere thulhuiremo sibisosene. Kandi ithwe bosi thukakolha ebisobyo ebyangana hithania n’eriponesya abandi. Aliwe, thwangana wathikya eriletha omw’ihiika lyethu ly’obunyakirimu mw’olhwanzo. Thuthi? Omw’igherererya Thatha wethu thukakangania balikyethu b’olhwanzo. (Efe. 5:1, 2; 1 Yn. 4:19) Thulebaye ebyo thwang’ighira okwa ky’erileberyako kya Yehova.

11. Yesu mwakangania athi omubere wa Yehova ow’erikwira abandi b’obulighe?

¹¹ Yehova akakanganaya “omuthima w’erighanyira” ni bugha ambu erikwira abandi b’obulighe. (Lk. 1:78) Oyukakwira abandi b’obulighe akahambawako akalhangira abandu bakaghalhwa; akasondekanaya esyonzira sy’eribawathikiryamo n’eribahumulikania. Emibere Yesu athwaliramo abandu, muyakangania ngoku Yehova abanzire. (Yn. 5:19) Buthuku bughuma, Yesu abere akalhangira endeko y’abandu ‘mwakwirabo obulighe, kusangwa mubaghalhwa n’erilhuha ng’esyombuli sithawithe mulisya.’ (Mt. 9:36) Omubere wa Yesu w’erikwira abandi b’obulighe mwaleka iniayira eky’akakolha. Mwalhamya abalhwere n’eriwathikya ‘abakanuba n’eriheka ebirithohire.’​—Mt. 11:28-30; 14:14.

12. Iha eky’erileberyako ekikakanganaya ngoku thwanga kwira abandi b’obulighe.

¹² Thutholere ithwatsuka eriminya ebitsibu ebyo balikyethu bakalhabamo imuthukendi  thoka eribakwira obulighe. Ng’eky’erileberyako, mwali wethu anganabya inialhwere obulhwere obukalire. Syalibugha-bugha okwa kitsibu kiwe, aliwe iniakendi tsema amabana obuwathikya bulebe. Akabana athi ebiyithawa by’ekinyamubiri eby’eka yiwe? Mbwino sithwanga muwathikya erimutsumbira kutse erimukolera obuyonzo? Mughalha wethu anganabya isyakiwithe mubiiri. Mbwino thwangana muha akasente kake obundi nibya isithwathamubwira ku n’ithwe thulyamuhako, akanga muwathikya erihika aho akendi syabanira omubiiri?

13-14. Thwangabya thuthi benge nga Yehova?

¹³ Yehova ni mwenge. (Mt. 5:45) Sithutholere thukalinda erihika aho balikyethu bakendi thusabira obuwathikya imuthwabakwira obulighe. Nga Yehova, thutholere ithwabawathikya bathe bathusaba obuwathikya. Akalhangira athi embulha yikawa isithwathamusaba nayo! Embulha yikaghasira obuli mundu butsira abakasima basa. Mbwino siwanga ligha ngoku Yehova erithuha ebya thukayithagha ni kangania kw’athwanzire? Thwanzire Yehova ya kutsibu kundi ni w’olhukeri kandi mwenge!

¹⁴ Omw’igherererya Thatha wabu w’elhubulha, balikyethu bangyi bakabya b’erimbere erikangania omubere w’erihithya. Ng’eky’erileberyako, omwa 2013, ekiyagha kinene ekyabya e Philippines mukyatsandalikania kutsibu ebindu binene. Balikyethu bangyi mubaherya amanyumba n’ebindu byabu. Aliwe erihiika lyabu ly’obunyakirimu erithimba omwa kihugho kyosi mulyabanguhira. Abangyi mubahayo esyosente kutse erisangira omwa buhimbe bunene, obwabyamo erisuba-subania kutse erithasyahimba esyonyumba nga 750 omwa mezi make buyira! Omwa kihunzo ky’ekorona (COVID-19), Abema mubakolha kutsibu eriwathikya balikyabu. Thukabya thukanguhirwa eriwathikya abali omw’ihiika lyethu ly’obunyakirimu, thukakanganaya ku thubanzire.

15-16. Ngoku kiri omu Luka 6:36, ni nzira yahi ngulhu eyo thwanga gherereryamo Thatha wethu w’elhubulha?

¹⁵ Yehova ni w’olhukogho kandi akaghanyira. (Soma Luka 6:36.) Obuli kiro thukayilhangirira erighanyira lya Thatha wethu w’elhubulha. (Esy. 103:10-14) Abigha ba  Yesu babya isibahikene; aliwe, mwabakangania olhukogho kandi iniakabaghanyira. Nibya abya inianayitheghekire erihayo engebe yiwe nuku ebibi byethu bighanyirawe. (1 Yn. 2:1, 2) Mbwino olhukogho n’erighanyira lya Yehova na Yesu bikanaleka iwayithunda hakuhi nabu?

¹⁶ Thukaghumaya olhwanzo omw’ihiika lyethu ly’obunyakirimu ‘thukabuyirana.’ (Efe. 4:32) Ni kwenene, hanganayira ikyakalha erighanyira abandi, neryo thutholere ithwahiraho akaghalha erikolha ekyo. Mwali wethu mughuma mwayowa omwatsi w’Akaleberyo owa “Mughanyirane” iniamamuwathikya erikolha ekyo. * Mwahandika athi: “Erigha omwatsi oyu kyabiringwathikya eribya n’amalengekania awatholere. Mwasoborera athi eribya iwunayitheghekire erighanyira abandi sikirimanyisaya kithi wukatsemera emitse yabu mibi kutse erigheghena ebitsibu ebikalhwiririramo. Aliwe erighanyira kikamanyisaya erithendi bika ekinigha busana n’ebibi ng’ebyo n’eribya iwune buholho.” Thukabya thukabuyira balikyethu, thukakanganaya ku thubanzire kandi ku thukagherereraya Thatha wethu, Yehova.

17. Ngoku kiri omu Matayo 5:16, thwangaha thuthi Thatha wethu w’elhubulha olhukengerwa?

¹⁷ Ni lhusunzo lhunene eribya omw’ihiika ly’olhwanzo ery’ekihugho kyosi. Thwanzire abandu bangyi ibathuyiyungako omw’iramya Nyamuhanga wethu. Thun’ibukire eki, thutholere ithwayitheya okwa kyosi-kyosi ekyanga hamba nabi okwa bandu ba Yehova kutse oku Thatha wethu w’elhubulha. Thukalengaho eribya n’emibere eyangaleka abandu ibaligha engulhu yuwene.​—Soma Matayo 5:16.

18. Ni kyahi ekyanga thuwathikya erithulira isithukwire buba?

¹⁸ Okwa bundi buthuku, abandi bangana thutsambulikania kutse nibya erithwendererya busana n’eriowa Thatha wethu w’elhubulha. Kandi ibbwa thwamakwa engitsi thukabwira bandi okwa ebya thw’ikirirye? Ithwangana yikethera ngoku Yehova na Mughalha wiwe bakendi thuwathikya. Yesu mwabwira  abigha biwe athi isibayibulha nga bakendi bugha bathiki. Busana naki? Yesu mwasoborera athi: “Kusangwa oko ndambi eyo mwasyahabwa ebyo mwasyabugha. Kusangwa ebinywe mukabugha si byenyu; byasyalhua okwa mulimu wa Thatha wenyu oyukabughira omwisi wenyu.”​—Mt. 10:19, 20.

19. Iha eky’erileberyako eky’omundu oyuwaha obwema omwa buthubaha.

¹⁹ Thalengekania okwa ky’erileberyako kya Robert. Kera iniakine mwigha muhyaka we Biblia kandi iniamathaminya bike omwa Biblia, mwalethwa omwa koti e South Africa. Omwa buthubaha mwasoborera abatsweri ngoku anzire erisighalha isyawithe lhuhandi kundi anzire balikyabu Abakristayo. Iniakalhangira omwanya wiwe omw’ihiika lyethu ly’obunyakirimu mwa w’obughuli! Kitsumbukirania, omutsweri mwamubulya athi: “Balikyenyu ba bahi?” Robert abya isyayitsulirye ekibulyo ekyo, aliwe aho n’aho mw’ibuka erisako ly’ekiro ekyo. Lyabya ini Matayo 12:50, hathi: “Omundu oyuwasyakolha erisonda lya Thatha waghe oyuli elhubulha, yo mughalha wethu, na mwali wethu, na koyo.” Nomwakine indi Robert abya mwigha muhyaka we Biblia, omulimu wa Yehova mwamuwathikya erisubirya ekibulyo ekyo n’ebindi bibulyo eby’abya isyayitsulirye. Yehova atholere eribya imwayisyethera Robert! Nethu kuthya, Yehova akathuyisyethera thukamuyikethera omughulhu omo buthubaha thukaha obwema omwa mighulhu eyikalire.

20. Thutholere ithwathwamu erikolhaki? (Yoane 17:11, 15)

²⁰ Kwesi thulhole embere erilhangira omughisa ow’eribya omw’ihiika ly’olhwanzo ery’obunyakirimu mwa w’obughuli. Thuwithe Thatha mubuya kuthya n’abalikyethu abayihereyo. Isithwalhangira ebi nga lhutseghe-tseghe. Sitani n’abakamukwama abathuponire bakalengaho erithuhiramo erithika-thikira olhwanzo lhwa Thatha wethu w’elhubulha n’erianza eritsandya obughuma obwa thuwithe. Aliwe Yesu mwasaba busana nethu, akabwira Thatha wiwe athi athutheghaye nuku erihiika lyethu lisighale irine bughuma. (Soma Yoane 17:11, 15.) Yehova anemusubirya omusabe oyo. Nga Yesu, ambi isithwathika-thikira olhwanzo n’obuwathikya bwa Thatha wethu w’elhubulha. Thuthwemu erilholha embere eriyithunda hakuhi n’erihiika lyethu ly’obunyakirimu.