OMWATSI W’ERIGHA 40
“Abandu Bangyi Eribana Ekithunganene”
“Abakasondolha abandu bangyi eribana ekithunganene, basyakangabasania ng’esyongununu kera na kera.”—DAN. 12:3.
OLHWIMBO 151 Asyabirikira
EBIKENDI KANIBWAKO *
1. Ni myatsi yahi eyikatsemesaya eya thulindirire omw’Ithabalha ly’Emyaka Rukumi?
KA BUKENDI syabya buthuku obukatsemesaya kutsibu erilhubuka likatsuka okwa kihugho kwa hano omw’Ithabalha lya Kristo ery’Emyaka Rukumi! Abosi ababiriholerwa balindirire erithasyalholha oko banze babu. Yehova nayu kw’akayowa athya. (Yobu 14:15) Thalengekania okwa butseme bunene omwa kihugho kyosi abandu bakaghenda bakathasyabya haghuma n’ab’okw’ibo. Ngoku thwanalhangira omo mwatsi w’ahanyuma, “abathunganene,” abo amena wabu anahandikire omwa kitabu ky’engebe, ‘basyalhubukira oko ngebe.’ (Emib. 24:15; Yn. 5:29) Obundi abangyi b’okwa banze bethu bakendi syabya okwa bakendi syatsuka erilhubukibwa * okwa kihugho. Eryongera okw’ekyo, “abathathunganene,” ng’abathabana akaghisa akakaghunza ak’eriminya Yehova kutse ak’erimukolera bathe baholha, bakendi syalhubukibwa “oko lhubanza lhw’eritswerwa.”
2-3. (a) Ngoku kikanganibwe omu Isaya 11:9, 10, endegheka nene ey’erikangiriribwa yikendi syabya iy’eyahi? (b) Thukendi kania okuki omo mwatsi ono?
2 Abosi abakendi syalhubuka aba bakendi syayithagha erikangiriribwa. (Isa. 26:9; 61:11) Neryo endegheka nene ey’erikangiriribwa eyithe yathabya aho bandu bakathaberaho, yikendi syayithagha erikolhwa. (Soma Isaya 11:9, 10.) Busana naki? Kundi abathathunganene abakendi syalhubukibwa bakendi syayithagha erigha oku Yesu Kristo, emitheghekere y’Obwami, endongolya, n’omwatsi mukulhu ow’obuhangwa bwosi owahambire okwa lina lya Yehova n’ehamuli yiwe y’erithabalha. Nibya n’abathunganene bakendi syayithagha eriminya ebiri okwa buthuku bikahika okwa ebyo Yehova abiribya inianemubisulha ebihambire okwa kighendererwa kiwe busana n’ekihugho. Abandi b’okwa bathaleghulha aba baholha ekinywe kya Yehova isikiri kyahwa erihandikwa n’erihirwa haghuma eribya e Biblia eyihwere. Abathathunganene n’abathunganene bakendi syabya n’ebingyi by’erigha.
3 Omo mwatsi ono, thukendi kania okwa bibulyo bino: Ni byahi ebikendi syakolhwa omwa ndegheka nene ey’erikangiriribwa eyi? Ni kyahi ekikendi syabya oko bandu abakendi syaligha endegheka eyi n’abakendi syaghanayo? Thutholere ithwalhangira eby’erisubirya okwa bibulyo ebi mwa bikulhu munabwire. Ngoku thukendi lhangira, amaminyereri malebe awakasisimulha awali omwa kitabu kya Danieli n’eky’Eribisulirwa akendi thuwathikya erithasyuwania eriyitheghererya lyethu ly’ebikendi syabya abaholi bakalhubukibwa. Okw’itsuka, thulebaye ebindu ebikasisimulha ebyalhaghulhawa omwa buminyereri obuli omu Danieli 12:1, 2.
“ABAGHOTSERE OMO LHUTHUTHU . . . BASYABUKA”
4-5. Danieli 12:1 hakabisulhaki ebihambire oko mughulhu w’enduli?
4 Soma Danieli 12:1. Ekitabu kya Danieli kikabisulha endondekania y’ebindu ebikasisimulha ebikendi syabya oko mughulhu w’enduli. Ng’eky’erileberyako, Danieli 12:1 hakabisulha ngoku Mikaeli, nayu ini Yesu Kristo, “yukatheghaya abandu [ba Nyamuhanga].” Ekitsweka ky’obuminyereri obu kyatsuka eribererera omwa 1914 omughulhu Yesu asombolhawa ng’Omwami w’Obwami bwa Nyamuhanga obw’elhubulha.
5 Aliwe kandi Danieli mwabwirwa ngoku Yesu anga ‘hangene’ omwa mughulhu ‘w’endambi y’obulighe, obuthe bwathabya eritsuka omughulhu ekihanda kyatsuka, n’erihika oko mughulhu ono.’ “Endambi y’obulighe” eyi ‘bw’obulighe bunene’ obukanibweko omu Matayo 24:21. Yesu akahangana, kutse erilhwira abandu ba Nyamuhanga, okw’ihwererera ly’endambi y’obulighe eyi, ni bugha ambu, okwa Harmagedoni. Ekitabu ky’Eribisulirwa kikakanaya okwa bandu aba ‘ng’endeko nene eyikalhua omw’endererya linene.’—Erib. 7:9, 14.
6. Ni kyahi ekikendibya enyuma w’endeko nene erisabuka obulighe bunene? Soborera. (Lebaya n’omwatsi “Ebibulyo Erilhua Omwa Basomi” owahambire okw’ilhubuka ly’okwa kihugho omo gazeti eno.)
6 Soma Danieli 12:2. Ni kyahi ekikendibya enyuma w’endeko nene erisabuka endambi y’obulighe eyi? Obuminyereri obu sibulikanaya okw’ilhubuka ly’omusyo, erisuba-subanibwa ery’obunyakirimu ery’abaghombe ba Nyamuhanga erikabya omwa buthuku bw’ebiro by’enyuma-nyuma, ngoku thwabya ithwabiriyitheghererya kera. * Omwakanya k’ekyo, ebinywe ebi bikakanaya okw’ilhubuka erikendibya omwa kihugho kihya-kihya ekikasa. Busana naki ithwaghunzerera thuthya? Ekinywe “olhuthuthu” kikakolesibawa n’omwa Yobu 17:16 kandi ikyabya ikyan’ekinywe “Ekulimu” kutse eyisinda. Ekwenene eyi yikakanganaya ngoku Danieli 12:2 hakakanaya okw’ilhubuka eryonyine-nyine erikendibya ebiro by’enyuma-nyuma byabirihwaho kuthya n’olhuhi lhwe Harmagedoni.
7. (a) Ni mwanziraki abandi bakendi syalhubukibwa oko “ngebe y’erikotha”? (b) Busana naki ithwabugha thuthi eri ‘n’ilhubuka oko ngebe eyuwene’?
7 Aliwe ibbwa, Danieli 12:2 hakamanyisayaki hakabugha hathi abandi bakendi syalhubukibwa okwa “ngebe y’erikotha”? Hakamanyisaya hathi abakendi syalhubukibwa neryo bakalholha embere eriminya, n’eriowa Yehova na Yesu omwa buthuku bw’emyaka 1,000 erighunzerera bakendi syabana engebe y’erikotha. (Yn. 17:3) Eri likendi syabya “erilhubuka oko ngebe yuwene” kwilhaba erilhubuka eryabya kera. (Ebr. 11:35) Busana naki? Kundi abandu abathahikene abo mubaholha kandi.
8. Abandi bakendi syalhubukibwa bathi busana “n’erihemuka n’esyonye sy’erikotha”?
8 Aliwe si bugha indi abosi abakendi syalhubukibwa bakendi syaligha endegheka ya Yehova y’erikangiriribwa. Obuminyereri bwa Danieli bukabugha buthi abandi bakendi syalhubukibwa busana “n’erihemuka n’esyonye sy’erikotha.” Kundi bakendi syakangania omuthima w’eriyisamambulha, amena wabu syendi syahandikwa omwa kitabu ky’engebe kandi sibendi syabana engebe y’erikotha. Omwakanya k’ekyo, bakendi syabana “esyonye sy’erikotha,” kutse erithoghothibwa. Kwesi, Danieli 12:2 hakakanaya okwa bikendi syahika okwa bosi abakendi syalhubukibwa erikwamana n’ebya bakendi syakolha enyuma w’erilhubukibwa. * (Erib. 20:12) Abandi bakendi syabana engebe y’erikotha; abandi eyihi.
“ABANDU BANGYI ERIBANA EKITHUNGANENE”
9-10. Ni kindi kyahi ekikendi syabya enyuma w’obulighe bunene, kandi ni bahi abakendi “syakangabasania ng’erihenia ly’ekyanya”?
9 Soma Danieli 12:3. Ni kindi kyahi ekikendi syabya enyuma ‘w’endambi y’obulighe’ eyikayasa? Eryongera okwa biri omu Danieli 12:2, omulhondo 3 akakanaya okwa kindu ekikendi syabya enyuma w’obulighe bunene.
10 Ni bahi abakendi “syakangabasania ng’erihenia ly’ekyanya”? Ebinywe bya Yesu ebiri omu Matayo 13:43 bikathuha ekitsutsu okw’eki, bikabugha bithi: ‘Oko mughulhu oyo abathunganene omo meso wa Nyamuhanga basyakangabasania ng’eryuba omo Bwami bwa Thatha wabu.’ Omo myatsi eyithimbire okwa binywe ebi, Yesu abya akakania okwa “baana b’Obwami,” baghalha babu abahakabibwa, abakendi syakolha haghuma nayu omo Bwami bw’elhubulha. (Mt. 13:38) Neryo kwesi Danieli 12:3 hatholere eribya ihakakanaya okwa bahakabibwa n’omubiiri ogho bakendi syakolha omw’Ithabalha ly’Emyaka Rukumi.
Abandu 144,000 bakendi syakolha haghuma na Yesu Kristo erisondolha omubiiri w’erikangiriribwa owakendi syakolhwa omwa buthuku bw’emyaka 1,000 (Lebaya enungu 11)
11-12. Ni mubiiri wahi ogho abandu 144,000 bakendi syakolha omwa buthuku bw’emyaka 1,000?
11 Abahakabibwa bakendi syaleka bathi ‘abandu bangyi ibabana ekithunganene’? Abahakabibwa bakendi syakolha haghuma na Yesu Kristo erisondolha endegheka y’erikangirirya eyikendi syakolhwa hano h’okwa kihugho omwa buthuku bw’emyaka 1,000. Abandu 144,000 sibendi syasubulira okw’ithabalha ng’abami lisa aliwe kandi bakendi syakolha ng’abahereri. (Erib. 1:6; 5:10; 20:6) Busana n’ekyo, bakendi syawathikya ‘okw’ilhamya ebihanda’—lyolho-lyolho eriwathikya abandu eribasubya okw’ihikana. (Erib. 22:1, 2; Eze. 47:12) Ekyo ka kikendi syatsemesya abahakabibwa ba kutsibu!
12 Ni bahi abakendi syabya omwa “bangyi” abakendi syabana ekithunganene? Aba mukendi syabya abakendi syalhubukibwa kuthya n’abakendi syalhama okwa Harmagedoni haghuma n’abaana bosi abangana syabuthwa omwa kihugho kihya-kihya. Aho emyaka 1,000 yikendi syahwera, abosi abali okwa kihugho bakendi syabya ibamabirihikana. Neryo kwesi ni mughulhu wahi amena wabu akendi syahandikwa omwa kitabu ky’engebe kera na kera omwa bwino butsira omwa kikalha?
ERILENGESIBWA LY’ERIGHUNZERERA
13-14. Ni kyahi ekyo abandu bosi abahikene abali okwa kihugho bakendi syayithagha erikangania bathe bahebwa engebe y’erikotha?
13 Thutholere ithw’ibuka ngoku eribya mundu oyuhikene sikirimanyisaya kithi ni buthekwa-buthekwa omundu akendi bana engebe y’erikotha. Thalengekania oku Adamu na Eva. Babya bahikene, aliwe mubayithagha erikangania obwowa bwabu oku Yehova Nyamuhanga bathe bahebwa engebe y’erikotha. Aliwe eky’obulighe, mubalemwa erimwowa.—Abar. 5:12.
14 Okw’ihwererera ly’emyaka 1,000, abali okwa kihugho bakendi syabya omwa mibere eyiri yithi? Abosi bakendi syabya ibabirihikana. Mbwino abosi abahikene abo banemwendisya sighikir’ighuma obuthabali bwa Yehova kera na kera? Kutse abandi bakendi syabya nga Adamu na Eva—abaleghulha nomubanabya bahikene? Ebibulyo ebyo bikendi yithagha erisubiribwa, aliwe bithi?
15-16. (a) Ni mughulhu wahi abandu abosi bakendi syabana akaghisa k’erikangania obuthaleghulha bwabu oku Yehova? (b) Erighunzerera erilengesibwa eri likendi syalhwiririra mwaki?
15 Sitani akendi syabohwa habw’emyaka 1,000. Okwa buthuku obo, syendi syathoka erithebya owosi-wosi. Aliwe, okw’ihwererera ly’emyaka 1,000, Sitani akendi syaboholhwa. Neryo akendi syalengaho erithebya abandu abahikene. Omw’ilengesibwa eryo, abosi abali okwa kihugho abahikene bakendi syabana akaghisa ak’erikangania ndeke-ndeke olhuhandi olhwa baliko bikahika oko mwatsi owahambire okwa lina lya Nyamuhanga n’ehamuli yiwe y’erithabalha. (Erib. 20:7-10) Ebya obuli mundu akendi syakolha Sitani akalengaho erithebya abandu bikendi syakangania erina liwe nga lihandikawe kera na kera omwa kitabu ky’engebe.
16 Omughanzo w’abandu owathasibwe, bakendi syabya nga Adamu na Eva, ibaghana obuthabali bwa Yehova. Ni kyahi ekikendi syabahikako? Eribisulirwa 20:15 hakathubwira hathi: “Omundu oyuthawithe erina lisakire omo kitabu ky’engebe, mwaghuswa omo ngetse y’omuliro.” Kwesi, abayisamambuli aba bakendi syathoghothibirwa ighuma. Aliwe abangyi b’okwa bandu abahikene bakendi syalhaba ekizamu eky’erighunzerera eki. Neryo aho ibbwa amena wabu iniahandikwa kera na kera omwa kitabu ky’engebe.
OMWA “MUGHULHU W’ENDULI”
17. Ni byahi ebya Danieli abwirawa ebyangabere omwa buthuku bwethu? (Danieli 12:4, 8-10)
17 Ka kikasisimulha erilengekania okwa bindu ebi ebikayabya omwa buthuku obukasa! Aliwe, Danieli kandi mwahebwa omwatsi mukulhu erilhua oko mumalaika owahambire okwa buthuku bwethu, “omughulhu w’enduli.” (Soma Danieli 12:4, 8-10; 2 Tim. 3:1-5) Omumalaika mwabwira Danieli athi: “Eriminya [ly’ekwenene] lyasyakanyirira.” Kwesi, abandu ba Nyamuhanga bang’ongere eriyitheghererya ndeke ebinywe by’obuminyereri ebiri omwa kitabu kya Danieli. Omumalaika mw’ongerako athi omwa buthuku obu “ababi [bangakolire] nabi, isihali mundu mubi oyo [wangaminyire].”
18. Ni kyahi ekikisiya ikyabya okwa babi?
18 Munabwire abandu babi bangana lhangirika nga sihali ekikababyako busana n’emibere yabu mibi. (Mal. 3:14, 15) Aliwe Yesu akisiya iniatswera ababi abali ng’esyombene n’eribaghabulha okwa bali ng’esyombuli. (Mt. 25:31-33) Ababi aba sibendi syalhama okwa bulighe bunene, kutse erilhubukibwa omo kihugho kihya-kihya. Amena wabu syendi syabya omwa “kitabu ky’eryibuka” ekikanibweko omu Malaki 3:16.
19. Eno y’endambi y’ithwe erikolhaki, kandi busana naki? (Malaki 3:16-18)
19 Eno y’endambi y’erikangania ngoku sithuli baghuma b’okwa babi. (Soma Malaki 3:16-18.) Yehova anemuhindania haghuma abo akalhangira ‘ng’obusoki,’ kutse ab’obughuli. Ahathe erithika-thika, thwanzire ithwabya baghuma b’okw’ibo.
Ka kikendi syatsemesya erilhangira Danieli, abanze bethu, n’abandi bangyi ‘bakalhubuka’ eribana erighabo lyabu omwa kihugho kihya-kihya! (Lebaya enungu 20)
20. Ni mulhaghe wahi w’erighunzerera ogho Danieli ahebawa, kandi busana naki wukakandira eribererera ly’omulhaghe oyo?
20 Omo kwenene, thuli omwa buthuku obukasisimulha. Aliwe ebindi bindu ebikaswekaya bikisiya ibyabya. Thukisiya ithwalhangira obubi bwosi bukahwaho. Ekikendi syakwamako, thukendi syalhangira eribererera ly’omulhaghe ogho Yehova alhagha Danieli ono: “Wasyalhubuka oko nduli y’emighulhu busana n’erighabo lyawu eryabiryahulhwa.” (Dan. 12:13) Wukanakandira ekiro Danieli, haghuma n’abanze bawu ababiriholha bakendi “syalhubuka”? Kyamabya ikwakiri kithya, lino kolha ngoku wangathoka erisighalha muthaleghulha, neryo aho iwukendi minya ngoku erina lyawu likendi sighalha irinahandikire omwa kitabu kya Yehova eky’engebe.
OLHWIMBO 80 ‘Wulenge, Wulebaye Yehova kw’Ali Mubuya’
^ Omwatsi ono muli embinduka omw’iyitheghererya lyethu erihambire okwa ndegheka nene y’erikangiriribwa eyikanibweko omu Danieli 12:2, 3. Thukendi lebya endegheka eyi nga yikendi syabya mughulhu wahi kandi nga ni bahi abakendi syasangira muyo. Kandi thukendi lhangira endegheka eyi nga yikendisya theghekania yithi abali okwa kihugho busana n’erilengesibwa ly’erighunzerera okw’ihwererera ly’Erithabalha lya Kristo ery’Emyaka Rukumi.
^ Erilhubuka lyangana syatsukira okwa baholha ibane bathaleghulha omwa biro by’enyuma-nyuma neryo iryasuba bunyuma-nyuma, lhulengo okwa lhulengo. Byamabya ikwa bikendi syabya bithya, obuli lhulengo ilhukendi syabana akaghisa k’eriangirira abandu abo banasi. Mbulha bikendi syabya bithi, Amasako akakanaya okwa ‘buyithondeke’ bikahika okw’ilhubuka ly’elhubulha, neryo ithwangana bugha thuthi n’erilhubuka ly’okwa kihugho nalyo likendi syabya omwa buyithondeke.—1 Kor. 14:33; 15:23.
^ Erisoborera eri ni mbinduka omw’iyitheghererya lyethu eriri omwa kitabu Pay Attention to Daniel’s Prophecy! esura 17, n’omwa Watchtower ey’Okwomusanju 1, 1987, olhup. 21-25.
^ Mbaghane n’ekyo, ebinywe “abathunganene” na “ababi” kutse abathathunganene ebiri omwa Emibiri 24:15 n’ebinywe “abakolha emibiiri mibuya” na “abakolha ebibi” ebiri omu Yoane 5:29 bikakanaya okwa ebyo abakendi syalhubukibwa bakolha bathe baholha.
