Erikwamana na 1 Abanya Korinto 15:8, Paulo mwabugha athi: “N’enyuma w’abandi bosi mwanyihulhukira nibya, ng’oyukabuthawa omw’ibulikirwa.” Kera, ithukasoborera thuthi kikabya Paulo ng’abya akakania oko kyamubyako akabana esyonzoli esihambire oku Yesu iniane omo lhukengerwa lhw’elhubulha. Mukyabya ngabirihebwa ekitsumbi ky’eributhwa, kutse erilhubuka, oko ngebe y’ekirimu endambi isiyiriyahika, ihakine myaka mingyi erilhubuka eriri ng’eryo imulyabya. Aliwe enyuma w’erisekulya ndeke oko mulhondo oyu mukikanayithaghisya erihindulha enzoborera yagho.

Ni kwenene Paulo hano akakanaya okwa kyabya akahinduka eribya Mukristayo. Aliwe amanyisayaki akabugha athi ‘mwabuthwa omw’ibulikirwa’? Hane esyonzumwa nga sy’esyo esyangabya isy’esyaleka.

Erihinduka liwe lyabya kitsumbukirania kandi mulyamuhira omwa birengekanio. Mughulhu mungyi eributha omwana mwa kahumba ni kindu ekikabulikiriranaya. Saulo (oyo enyuma waho aminyawamo Paulo) abere akaghenda e Damasiki eriy’endererya Abakristayo ab’eyo, abya isyayitsulirye erilhangira esyonzoli esikakanganaya Yesu oyuwabya iniabirilhubuka. Erihinduka lya Paulo mulithamuswekya iyo musa aliwe kandi mulyaswekya n’Abakristayo abo abya akathegheka eriy’endererya omo muyi oyo. Eryongera okw’ekyo, ebyamubyako ebyo mubyamuhira omwa birengekanio kundi mwabya ndimethime habw’obuthuku buke.​—Emib. 9:1-9, 17-19.

Mwahinduka oko “ndambi eyithatholere.” Ekinywe ky’Ekigiriki ekyahindulhawamo “oyukabuthawa omw’ibulikirwa” kyangana thasyamanyisya “oyukabuthawa oko ndambi eyithatholere.” The Jerusalem Bible yikabughaho yithya: “Kikabya nga munabuthwa isihali n’oyulengekenie athi ikyabya.” Omughulhu Paulo ahinduka, Yesu abya iniabirisuba elhubulha. Mbaghane n’abo Paulo akanayako omwa milhondo y’ahanyuma, iyo mwathalhangira Yesu iniabirilhubuka athali aghenda elhubulha. (1 Kor. 15:4-8) Yesu eributhukira oku Paulo isyamuyitsulirye mukyamuha akaghisa ako, nomwakine indi mukyabya nga ni “ndambi eyithatholere.”

Aby’akayikaniako omo nzira y’eriyikehya. Erikwamana n’abandi basomi, ebinywe ebyo Paulo akakolesaya hano byangana manyisya eriyighaya. Paulo amabya inianabya awithe amalengekania ayo, iniakendibya iniamanyisaya athi syabya atholere olhusunzo olho ahebawa. Erithwalira haghuma, mwabugha athi: “Ingye indi muke oko bakwenda abosi, kandi sinyitholere eryahulhwamo mukwenda, kusangwa munendererya ekanisa ya Nyamuhanga. Nikwa nyiri ngoku nyine busana n’olhukogho lhwa Nyamuhanga.”​—1 Kor. 15:9, 10.

Neryo kwesi, Paulo angabya iniabya akakania okwa mibere Yesu amubuthukirako kitsumbukirania kandi isyayitsulirye, erihinduka liwe eryabya oko ndambi eyithatholere, kutse eky’eribya isyabya atholere bunyakirimu erihebwa eribisulirwa erikaswekaya ng’eryo. Mbulha ky’ekyahi, oku Paulo, ekyamubyako eki kyabya ky’obughuli. Mukyamukakasya ndeke-ndeke ngoku Yesu abya iniabirilhubukibwa oko baholi. Kwesi ky’ekyaleka mughulhu mungyi iniabya akakania okwa ekyamubyako kitsumbukirania ekyo akathulira abandi okw’ilhubuka lya Yesu.​—Emib. 22:6-11; 26:13-18.