OMWATSI W’ERIGHA 39
OLHWIMBO 125 “Obutseme Buli oko Bakaghanyira!”
Bana Etseme Nene Eyikalhwiririra omw’Ihithya
“Erihithya likaletha obutseme kwilhaba erihebwa.”—EMIB. 20:35.
EKIGHENDERERWA
Eriminya esyonzira muthina-muthina esyo thwanga hithiryamu kandi ngoku ekyo kyangathulethera etseme.
1-2. Thukaghasirawa thuthi omw’ibya imuthwahangikwa ithuwithe amaaka aw’eribana etseme nene omw’ihithya kwilhaba erihebwa?
YEHOVA abere akahangika abandu, mwabahira mw’amaaka aw’eribana etseme omw’ihithya kwilhaba omw’ihebwa. (Emib. 20:35) Mbwino eki kikamanyisaya kithi sithulibana etseme yosi-yosi thwamahebwa? Eyihi. Thunakyasi ngoku thukabya thwamahebwa ekihembo thukayowa ndeke. Nomwabine, thukabana etseme nene thwamabya in’ithwe thulyahithaya. Kandi kwenene, eky’eribya indi Yehova mwathukolha athya kikathughasira. Busana naki?
2 Omw’ithuhangika athya Yehova akanza ithwayira eky’erikolha erithoka ery’ongera etseme yethu. Thwangan’ongera etseme yethu omw’isondya ehindi highisa ehy’erihithiryamo. Mbwino ekyo sikirikanganaya ngoku thuhangikirwe omwa nzira eyuwene kutsibu?—Esy. 139:14.
3. Busana naki Yehova iniakanibwako nga “Nyamuhanga oyutsemire”?
3 Amasako akathukakasaya ngoku erihithya likaletha etseme, neryo sikirithuswekaya e Biblia yikakania oku Yehova nga “Nyamuhanga oyutsemire.” (1 Tim. 1:11, NWT) Yehova yuwatsuka erihithya kandi yulengireyo omw’ihithya. Ngoku omukwenda Paulo abugha, busana naye “thuliho, kandi thukalendera, ithuneho.” (Emib.17:28) Omwa kwenene, “obuli lhusunzo lhubuya n’obuli lhusunzo lhuwene” bikalhua oku Yehova.—Yak. 1:17.
4. Ni kyahi ekikendi thuwathikya ery’ongera eribana etseme?
4 Ithwe bosi thwanzire ithwongera eribana etseme eyikalhwiririra omw’ihithya. Thwangana kolha ekyo omw’igherererya omubere wa Yehova ow’erihithya. (Efe. 5:1) Thunemukania okw’ekyo, thulebaye nga thwanga kolhaki thwamayowa erihithya lyethu nga siririsimawa. Ebibukyo ebi bikendi thuwathikya erilholha embere erihithya nuku thw’ongere etseme yethu.
GHERERERAYA OMUBERE WA YEHOVA OW’ERIHITHYA
5. Ni bindu byahi eby’ekinyamubiri ebyo Yehova akathuha?
5 Ni nzira nga syahi esyo Yehova akakanganirayamo omubere w’erihithya? Thalengekania okwa by’erileberyako bike bino. Yehova akathuha ebiyithawa byethu eby’ekinyamubiri. Thwanganabya isithuwithe ebindu ebyuwene-wene ebyo thukayighomba, aliwe thukasima Yehova kundi abangyi omw’ithwe thunawithe ebyo thukayithagha. Ng’eky’erileberyako, akalhangira athi thunawithe eby’erirya, eby’eriambalha, n’aherikesya. (Esy. 4:8; Mt. 6:31-33; 1 Tim. 6:6-8) Mbwino Yehova akathuha ebiyithawa byethu by’ekinyamubiri ahabw’erithabya iniawithe erikolha ekyo? Eyihi nahake! Busana naki Yehova akathukolera ekyo?
6. Thukighaki omu Matayo 6:25, 26?
6 Omwa bikuhi, Yehova akathuha ebiyithawa byethu by’ekinyamubiri kundi athwanzire. Thalengekania okwa binywe bya Yesu ebiri omu Matayo 6:25, 26. (Soma.) Yesu akakolesya eby’erileberyako eby’ebihangikwa. Akakania okwa syonyonyi, Yesu mwabugha athi: “sisyebiba kutse erihulhulha kutse eribika omwa bighona.” Aliwe, lebaya eby’akathasyakwamayako: “Thatha wenyu w’elhubulha akalisayasyo.” Neryo Yesu mwabulya athi: “Mbwino simuli b’obughuli kwilhabasyo?” Enzumwa? Yehova akalhangira abaramya biwe mwa b’obughuli kutsibu kwilhaba ebisoro. Yehova amabya iniakaha ebisoro by’ebiyithawa byabyo, thukakasirye ngoku nethu akendi thutsomana! Nga thatha oyutsomene, Yehova nayu akatsomana ab’omw’ihiika liwe busana n’olhwanzo.—Esy. 145:16; Mt. 6:32.
7. Ni nzira yahi nguma eyo thwanga gherereryamo omubere wa Yehova ow’erihithya? (Lebaya n’ekisasani.)
7 Nga Yehova, nethu thwangana hithya ebindu by’ekinyamubiri busana n’olhwanzo. Ng’eky’erileberyako, wunasi omwikirirya mulikyethu oyuli omwa buyithawa bw’ekyerirya kutse eby’eriambalha? Yehova angana kukolesya erimuha ekindu ekikendi leka iniabana ekiyithawa kiwe ekyo. Abandu ba Yehova banasibwe ng’abakakanganaya omubere w’erihithya hakawa ekitsinduli. Ng’eky’erileberyako, omwa mughulhu w’ekihunzo ky’ekorona Covid19, balikyethu ibakaha abandi abali omwa buyithawa b’ebyalya, eby’eriambalha, n’ebindi bindu. Kandi abangyi mubahayo ahathe erikakwa erisighika omubiiri w’ekihugho kyosi. Ekyo mukyaleka ikyathokekana eriwathikya balikyethu abali omwa buyithawa erithimba omwa kihugho kyosi. Mubaghendera okwa binywe ebiri omwa Abaebrania 13:16: “Simwibirirawe erikolha ebibuya n’eriwathikania, kusangwa ebi biri ng’amahere awakatsemesaya Nyamuhanga.”
Ithwe bosi thwangana gherererya eky’erileberyako kya Yehova ky’erihithya (Lebaya enungu 7)
8. Thukaghasirawa thuthi omwa maaka wa Yehova? (Abanya Filipi 2:13)
8 Yehova akaha amaaka. Yehova akatsema akaha abaramya biwe abathaleghulha okwa kaghalha kiwe akathehwayo. (Soma Abanya Filipi 2:13) Wune wathasaba akaghalha ak’erirwanisya erilengwako kutse amaaka w’eriyiyinirya ekitsibu? Kandi hangabya ihane kiro wasaba akaghalha akakayithaghisibawa erilholha embere erikolha ebya wukayithagha erikolha ekiro ekyo. Omughulhu omusabe wawu asubawamo, wangabya imuwalighirana n’ebya mukwenda Paulo abugha akahandika athi: “Omo byosi ngwithe akaghalha busana n’oyukamba amaaka.”—Fil. 4:13.
9. Thwanga gherererya thuthi omubere wa Yehova ow’erikolesya amaaka ahathe eriyikukumirira? (Lebaya n’ekisasani.)
9 Nomwakine indi thuli bandu abathahikene, thwangana gherererya emibere Yehova akakoleserayamo amaaka wiwe ahathe eriyikukumirira. Sithwanga hererya abandi b’akaghalha, aliwe thwangana kolesya amaaka wethu eribawathikya. Ng’eky’erileberyako, thwangana wathikya abakristayo abakulire omwa myaka kutse abatsekire omw’ibaghendera omwa kathali kutse eribakolera ehibiiri hy’eka. Emibere eyo thulimu yamathulighira, thwangana yihayo okw’iyonza n’erisugha Ekisenge ky’Obwami. Ithwe erikolesya amaaka omwa nzira ng’esyo kikaghasira abandi abakaramaya Yehova.
Thwangana kolesya amaaka wethu eriwathikya abandi (Lebaya enungu 9)
10. Thwangakolesya thuthi amaaka w’ebinywe erighasira abandi?
10 Kandi, isiwibirirawa ngoku ebinywe biwithe amaaka. Mbwino wangana lengekania okwa wosi-wosi oyuwanga ghasirwa omwisima erikalhua okwa muthima? Mbwino wunasi owosi-wosi oyukayithagha erihumulikanibwa? Omwa mibere yosi eyi, busana naki iwathayira eky’erikolha erihika okwa mundu oyo? Wangana mubungira, iwamutherera esimu, kutse iwamuhandikira akabaruha, kutse erimuthumira akameseji. Isiwahanga-hangaya nga wukendi bughaki. Ebinywe bike ebyolhobire ebikalhua okwa muthima byanganabya iby’ebyonyine-nyine ebya mwikirirya mulikyenyu akayithagha erisighalha muthaleghulha ahabw’ekindi kiro kutse eriyowa ndeke omwa mibere eyo alimo.—Emi. 12:25; Efe. 4:29.
11. Yehova akakolesaya athi amenge wiwe?
11 Yehova akaha amenge. Omukwenda Yakobo mwahandika athi: “Hamabya mundu omo kathi-kathi kenyu oyukabulha amenge, abulhaye Nyamuhanga oyukaha ndeke oko bandu bosi butsira buhemu; neryo omundu oyo asyahebwa amenge ayo.” (Yak. 1:5) Ngoku ebinywe ebi bikakanganaya, Yehova syaliyikumira kw’amenge wiwe. Akahereraya kugho kw’abandi ahathe eriyikukumirira. Kuthya, lebaya ngoku Yehova akabya amaha amenge, akakolha ekyo “butsira buhemu.” Syali leka thukayowa nabi ahabw’eriligha ngoku thukayithagha obusondoli bwiwe. Omwa kwenene, akathubwira athi thubusondaye.—Emi. 2:1-6.
12. Ni highisa hyahi ehyo thuwithe ehy’eriha abandi okwa menge wethu?
12 Kandi ibbwa ithwe? Mbwino sithwanga gherererya Yehova omw’iha abandi b’okwa menge wethu? (Esy. 32:8) Abandu ba Yehova bawithe ehighisa hingyi ehy’eribwira abandi okwa ebyo babir’igha. Ng’eky’erileberyako, mughulhu mungyi thukathendeka abahyaka omwa mubiiri w’erithulira. Omw’ighumisirizya, abasyakulhu bakawathikaya abaghombe abawathikya na baghalha bethu ababatizibirwe erigha ngoku banga berererya esyongwamirwa syabo omo kithunga. Kuthya n’abasi bingyi omwa by’obuhimbe n’eby’erisugha bakawathikaya omw’ithendeka abasi bike erikolha emibiiri okwa buhimbe bw’ekiteokrasi.
13. Thukathendeka abandi, thwanga gherererya thuthi enzira eyo Yehova akakolesaya akaha abandi b’amenge?
13 Abakathendeka abandi batholere ibagherererya enzira eyo Yehova akakolesaya eriha abandi okwa menge wiwe. Wibuke ngoku Yehova akaha amenge ahathe eriyikukumirira. Kuthya nethu, thwanzire ithwabwira abak’igha b’ebyo thwasi ahathe eriyikukumirira. Sithuli sagha eribwira abathukathendeka b’ebyo thwasi ahabw’erisagha thuthi endambi yanganahika ibasuba omwa bwethu. Kutse sithuli thunga amalengekania aw’eribugha indi: ‘Ingye sihali oyuwanyithendeka! Leka ayeghesaye iyuwene-wene.’ Amalengekania ng’ayo syawithe mwanya omwa bandu ba Yehova. Omwakanya k’ekyo, sithuli subulira okw’ibwira abo thukathendeka b’ebyo thwasi aliwe thukahayo “n’esyongebe syethu nibya”. (1 Tes. 2:8) Thuwithe amaha ngoku nabo, bakendithoka “erikangirirya abandi bandu.” (2 Tim. 2:1, 2) Thwamakolha ekyo, ithukendi leka omubere w’erihithya n’etseme eyikalhwiririramo ibyalholha embere.
ERIHITHYA LYETHU LYAMABYA NGA SIRITHASIMWA
14. Erihithya lyethu likaleka abangyi ibakolhaki?
14 Thwamahithya, kutsibu-tsibu oku balikyethu, mughulhu mungyi bakakanganaya erisima. Bangana thuthumira akabaruha ak’erithusima kutse ibakangania erisima lyabu omwa yindi nzira. (Kol. 3:15) Erithusima omwa nzira ng’esyo kik’ongera etseme yethu.
15. Ni kyahi ekyo thutholere ithw’ibuka abandi bamaghana erikangania erisima?
15 Aliwe erithabugha okwenene, abandi banganaghana erikangania erisima mughulhu wosi. Okwa bundi buthuku, thwanganahayo endambi, akaghalha, kutse ebyo thuwithe aliwe enyuma waho ithwabulha abathulyabikolera nga mubakanasima. Ekyo kyamabya, thwanga kolhaki eriyihighulha okw’iherya etseme yethu kutse okw’ihithana? Ibuka ebinywe by’erisako erihirikirire omwatsi ono, Emibiiri 20:35. Etseme yethu eyikalhwiririra omw’ihithya siyiseghemere okw’isimwa n’abandi. Thwangana thwamu eritsemera erihithya abandi nomubangabya nga sibathasima. Thuthi? Thalengekania okwa syonzira nyike hino.
16. Ni kyahi ekyo thutholere ithwahwerya kw’amalengekania thukahithya?
16 Hweraya amalengekania okw’igherererya Yehova. Akaha abandu b’ebibuya mbulha bamasima kutse eyihi. (Mt. 5:43-48) Yehova akathulhaghanisaya athi thwamahithya isithuwithe “amaha w’erithuhwa;. n’olhuhembo lhwethu lhukendi syabya lhunene.” (Lk. 6:35) “Amaha w’erithuhwa” anganabya imwamuli erisimwa. Thwamasimwa kutse eyihi, mughulhu wosi Yehova akendi lhangira athi thukahembawa busana n’ebibuya ebyo thukakolha eriwathikya abandi, erihithya ithunatsemire.’—Emi. 19:17; 2 Kor. 9:7.
17. Thwanga sighalha thuthi ithunawithe amalengekania awatholere? (Luka 14:12-14)
17 Thukabana omusingyi owahambire okwi’bya n’amalengekania awatholere thukahithya, omu Luka 14:12-14. (Soma.) Si kibi erikokya kutse erihithya omwa sindi nzira okw’abo abangana thukolera ikyan’ekyo. Aliwe ibbwa, thwamalhangira thuthi thulhwe ithune muhithya—obundi ithunawithe amaha thuthi nethu thukendi hebwa? Kyuwene erilengesya erikolha ekyo Yesu abugha. Thwangana kokya omundu oyo thunasi ngoku syangathoka erithukokya. Neryo ithukendi tsema kundi thwabirigherererya Yehova. Amalengekania iwanayo iniakendithuwathikya erisighalha ithunatsemire abandi bamaghana erisima.
18. Ni kyahi ekyanga thuwathikya eribya ithunawithe amalengekania awatholere okwa bandi?
18 Yihighule okw’ithunga okwa bandi kw’amalengekania mabi. (1 Kor. 13:7) Abandi bamathendi kangania erisima, ithwangana yibulya thuthi: ‘Mbwino kwenene sibawithe omuthima w’erisima, kutse bal’ibirirawa buyira?’ Obundi hanganabya ihane esindi nzumwa esiryaleka ibathasima ngoku thulhue thulengekenie. Abandi bangana sima kutsibu aliwe ibabulha nga bakikanganaye bathi. Ibangana yowa nga bamahemuka erihebwa obuwathikya, kutsibu-tsibu bamabya in’ibo babya bakawathikya omwa buthuku obulhabire. Mbulha ni kyahi ekyamabya, olhwanzo lhw’Ekikristayo lhukendi leka ithwasighalha ithunawithe oko balikyethu kwa malengekania awatholere n’erilholha embere eribana etseme eyikalhwiririra omw’ihithya.—Efe. 4:2.
19-20. Busana naki ikyabya kibuya erighumisirizya thukahithya? (Lebaya n’ekisasani.)
19 Ghumisirizaya. Bikahika okw’ibya oyukahithaya, Omwami w’amenge Solomona mwahandika athi: “Wughuse obundu bwawu endatha oko maghetsi, kusangwa wasyeyabo enyuma w’ebiro bingyi.” (Omu. 11:1) Ngoku ebinywe ebi bikakanganaya, abandi bangana kangania erisima okwa kyathwabakolera habirilhaba buthuku—“enyuma w’ebiro bingyi.” Thulebaye ekyalholirweko ekikakanganaya ekwenene eyi.
20 Myaka mingyi enyuma, mukali w’omulebererya w’omuthimbo mwathumira mwali wethu oyuwabya imwanamabatizibwa y’akabaruha erimuhira mw’omuhwa w’erisighalha muthaleghulha. Enyuma w’emyaka nga munani, mwali wethu mwasubirya e baruha eyo mwabugha athi: “Munayowa ingali w’erikuhandikira erikubwira okwa mibere wabirinyiwathikiryamo ahabw’emyaka mingyi kandi isiwasi.” Ak’ongerako athi: “[Akabaruha kawu] mukanyitsemesya kutsibu, aliwe erisako mulyanyihambako kutsibu kandi sindinathalibirirwa.” a Enyuma w’erisoborera ebitsibu ebyo abirilhabamu, mwali wethu mwabugha athi: “Okwa bundi buthuku, ininganayowa nga ngali w’erisighania obuli kindu n’erileka erikolera Yehova. Aliwe iningabya ingan’ibukire erisako eryo wanyihandikira eryo, neryo . . . Iningalholha embere.” Ak’ongerako athi: “Omwa myaka munani eyosi eyo sihali kindu ekyanyihimba ng’ekyo.” Thalengekania omukali w’omulebererya w’omuthimbo nga mwayowa athi akabana ebaruha eyi “enyuma w’ebiro bingi”! Nethu kuthya thwangana simwa ihamabirilhaba buthuku buuli thwalikolere omundu y’ekindu ekyuwene.
Thwangana simwa ihamabirilhaba buthuku buuli thwalikolere omundu y’ekindu ekyuwene (Lebaya enungu 20) b
21. Busana naki iwathwamu erilholha embere erigherererya omubere wa Yehova ow’erihithya?
21 Ngoku kinalyakanganibawa, Yehova mwathuhangika n’amaaka w’embaghane. Nomwakine indi thukatsema thukahebwa, thukatsema kutsibu thwamahithya. Thukayowa ndeke thwamathoka eriwathikya abikirirya balikyethu. Kandi thukatsema bamakangania erisima. Nomwabine, mbulha oyo thulyawathikaya amakangania erisima kutse eyihi, thukatsema kundi thwabirikolha ekitholere. Isiwibirirawa ngoku ekyosi-kyosi ekya wukahithaya, “Omwami Mukulhu [Yehova] awithe nyingi kwilhaba esi erikuhasyo.” (2 Emy. 25:9) Neryo, sithwanga hithya bingyi kwilhaba ebyo Yehova angathuha! Kandi sihali tseme eyirengire eyo thwangabana Yehova iyuwene-wene amathuliha. Kwesi, thuthwemu erigherererya Thatha wethu w’elhubulha oyukahithaya.
OLHWIMBO 17 “Nyinanzire”
a Erisako eryo baha mwali wethu ni 2 Yoane 8, ahakabugha hathi: “Neryo muyitheghaye, mukasyathalya ebyo mwabirikolera, nikwa mubane olhuhembo olhuhikene.”
b ERISOBORERA EKISASANI: Omw’ikolha ngoku kyanabya, ahathe eriyikukumirira omukali w’omulebererya w’omuthimbo anemuhimba owundi. Myaka mirebe enyuma waho, mwahebwa ebaruha eyiri mw’erisima.
