1-2. (a) Ni mibere yahi eyabya e Yudea omukwenda Paulo akahandikira Abaebrania b’ebaruha? (b) Ebaruha eyasondolibawa eyi muyalhangirika yithi ku y’amasira okwa buthuku?

 ABAKRISTAYO Abaebrania ababya b’ikere e Yerusalemu ne Yudea mubabana ebitsibu ebikalire myaka mirebe Yesu aliholire. Buthuku buke ekithunga ky’Ekikristayo ky’alitsukire, Abakristayo mubendereribwa kutsibu. (Emib. 8:1) Neryo emyaka 20 enyuma waho, abigha ba Kristo mubabana ebitsibu eby’emingirirye ebikalire obundi ebyasa busana n’enzalha eyabya iyabiribya omwa kihugho ekyo. (Emib. 11:27-30) Nomwabine, ng’omwa 61 E.K., Abakristayo mubathunga obuholho okwa lhulengo lhulebe bwamalinganisibwa n’ebitsibu ebya bangabwene omwa buthuku bw’embere. Okwa buthuku obo, Paulo mwabathumira ebaruha eyasondolibawa—ebaruha eya babya bakayithagha kutsibu okwa buthuku obo.

² Ebaruha eyo Abaebrania bahandikirawa muyasira okwa buthuku obutholere kundi obuholho obo Abakristayo bathunga bw’angabere bw’akathuku kake. Paulo mwaha erihabulha eryuwene eryanga wathikirye Abakristayo abo eriyiyinirya ebitsibu ebya babya ibakayabana. Erithoghothibwa lye Yerusalemu erya Yesu abya iniabirilhaghulha, lyabya irinemuseghera hakuhi. (Lk. 21:20) Ni kwenene, Paulo kutse Abakristayo ababya e Yudea sibabya basi omughulhu wonyine-nyine ogho erithoghothibwa lyangasiriremu. Nomwabine, Abakristayo abo bangakolesirye obuthuku obusighereyo eriyithegheka omw’ighumya emibere ng’erikirirya n’eriyiyinia.—Ebr. 10:25; 12:1, 2.

3. Busana naki Abakristayo munabwire batholere ibayithendya okwa biri omwa kitabu ky’Abaebrania?

 ³ Thukisiya ithwabana ebitsibu ebikalire kwilhaba ebya Abakristayo Abaebrania balhabamu. (Mt. 24:21; Erib. 16:14, 16) Neryo thulebaye erihabulha lirebe eryuwene erya Yehova aha Abakristayo abo eryanga thughasira.

“LHOLHA EMBERE ERIKULHA-KULHANA”

4. Abakristayo Abayuda mubabana bitsibuki? (Lebaya n’ekisasani.)

⁴ Abakristayo Abayuda mubabana ekitsibu ekikalire. Buthuku bulebe, Abayuda bababya abayisoghawa ba Yehova. Okwa kihugho, ekithumbi ky’Obwami bwa Nyamuhanga kyabya e Yerusalemu, n’ehekalu y’eyabya mwanya mukulhu w’eriramya ly’okwenene. Abayuda abosi abathaleghulha ibakaghendera okwa mighambo ya Musa ngoku abasondoli b’edini yabu babya bakabasoborera. Esyongangirirya esyo isyasikabasondolha bikahika okwa by’abatholere erirya, amalengekania wabu okw’ibanibwa, nibya n’emibere bakakolonganiramu n’abanya Bihanda. Aliwe, Yehova mwabya isyakiligha obuhere bw’Abayuda enyuma w’olhuholho lhwa Yesu. Ekyo mukyabya kitsibu okwa Bakristayo Abayuda ababya ibabiribeghera erighendera okwa mighambo. (Ebr. 10:1, 4, 10) Nibya n’Abakristayo abakulire bunyakirimu, ng’omukwenda Petero, mukyabakalira erighenda-ghendania n’esighuma sy’okwa syambinduka esi. (Emib 10:9-14; Gal. 2:11-14) Busana n’esyonyikirirya mbyaka esy’Abakristayo abo, abasondoli b’edini y’Ekiyuda mubabendererya.

5. Ni kyahi ekyo Abakristayo babya batholere eriyitheyako?

⁵ Abakristayo Abaebrania mubabana eriendereribwa erilhua okwa mbande ibiri. Oko lhuhandi lhughuma, muhabya abasondoli b’edini y’Ekiyuda ababya bakabalhangira ng’abayisamambuli. Ery’ongera okw’ekyo, abandi ababya bakayahulhamo Bakristayo ibakahathikana bathi abigha ba Kristo balhole embere erighendera okwa bihano muthina-muthina eby’Emighambo ya Musa, nuku sibendereribawe. (Gal. 6:12) Ni kyahi ekyanga wathikirye Abakristayo abathaleghulha eryamakirira ekwenene?

6. Paulo mwahira omwa Bakristayo balikyabo mw’omuhwa w’erikolhaki? (Abaebrania 5:14–6:1)

 ⁶ Omwa baruha eyo ahandikira Abaebrania, Paulo mwahira omu balikyabo mw’omuhwa w’erisekulya buuli omwa Kinywe kya Nyamuhanga. (Soma Abaebrania 5:14–6:1.) Omw’ikolesya Amasako w’Ekihebrania, Paulo mwakangania balikyabo ngoku eriramya ly’Ekikristayo lirengire kutsibu eriramya ly’Ekiyuda. a Paulo abya inianasi ngoku ery’ongera eriminya ekwenene n’eriyitheghereryayo buuli kyanga wathikirye Abakristayo abo eriminyerera esyongangirirya sy’amabehi n’erighanasyo nuku sibathebibawe.

7. Ni bitsibu byahi ebyathukabana munabwire?

⁷ Ng’Abakristayo Abaebrania, nethu thukowa emyatsi eyithaghenda-ghendanaya n’ebihano bya Yehova ebithunganene. Mughulhu mungyi abahakani bakanakanaya nabi okwa nyikirirya syethu esiseghemere okwa Biblia esihambire okwa by’esyongeso, omw’ibugha bathi sithwanzire abandu kandi thutsurumire. Amalengekania w’ekihugho anemuyongera eribya wambaghane kutsibu oko wa Nyamuhanga awahikene. (Emi. 17:15) Busana nekyo, thutholere ithwaghumya amaaka wethu w’eriminyerera n’erighana amalengekania aw’abahakani bakakolesaya erithughunza amani kutse nibya erithuherya.​—Ebr. 13:9.

8. Thwanga kulha-kulhana thuthi bunyakirimu?

⁸ Thutholere ithwabya ithun’ibukire erihabulha eryo Paulo aha Abakristayo Abaebrania ery’erilholha embere erikulha-kulhana bunyakirimu. Ekyo mwamuli eriminya ekwenene ya buuli n’erighenda-ghendania n’amalengekania wa Yehova. Eki kikalholha embere nibya n’enyuma w’eriyihayo n’eribatizibwa. Mbulha thwamaghunza mughulhu mungahi omwa kwenene, ithwe bosi thutholere ithwasoma n’eriyeghesya Ekinywe kya Nyamuhanga mughulhu wosi. (Esy. 1:2) Endegheka eyuwene ey’eriyeghesya yikendi thuwathikya erighumya erikirirya lyethu, omubere owa Paulo ahirako omuwatho omwa baruha ey’ahandikira Abaebrania.—Ebr. 11:1, 6.

“THUBYE N’ERIKIRIRYA ERIKALHAMAYA ESYONGEBE SYETHU”

9. Ni kyahi ekyaleka Abakristayo Abaebrania ibayithagha erikirirya erighumire?

⁹ Abakristayo Abaebrania mubayithagha erikirirya erighumire eryanga bawathikirye erilhama okwa bulighe obwabya ibukayabya omwa Yudea. (Ebr. 10:37-39) Yesu abya iniabiribwira abigha biwe athi batholere ibathibitha omughulhu basyalhangira ebilhalhiriro by’amahe ibyabirithimba okwa Yerusalemu. Erikunga eri lyabya lihambire okwa Bakristayo abosi, mbulha babya b’ikere omwa tawuni kutse omwa byalhu. (Lk. 21:20-24) Abandu b’omwa buthuku obo ababya bak’ubahisibwa n’amahe ibakasondaya obutheya omwa muyi owathimbirweko olhuhimbo nga e Yerusalemu. Erithibitha okwa bithwe kyangabere ng’ekithe ky’amenge kandi kyanga yithaghire erikirirya linene.

10. Erikirirya erighumire lyanga lekire Abakristayo ibakolha kyahi? (Abaebrania 13:17)

¹⁰ Abakristayo Abaebrania kandi babya batholere eriyikethera abo Yesu abya akakolesya erisondolha ekithunga. Ababya bakasondolha bangabya ibabya bakahebwa eby’erighenderako birebe ebyanga wathikirye abosi omwa kithunga erithoka erighendera okwa busondoli bwa Yesu okwa buthuku obutholere kandi omwa buyithondeke. (Soma Abaebrania 13:17.) Ekinywe ky’Ekigiriki ekikolesibirwe omwa Abaebrania 13:17 ekya “mwowe” kikamanyisaya  kithi omundu akabya n’omuhwa ow’eribya mwowa kundi ayikethere oyukamuha obusondoli. Eki sikirisubulira okw’imwowa ahabw’erithabya iniawithe ehamuli y’eriha obusondoli. Busana n’ekyo, Abakristayo Abaebrania mubayithagha erighumya eriyikethera lyabu omwa bakasondolha obulighe buthe bwasa. Abakristayo ku baghondera obusondoli obw’abakasondolha omwa buthuku bw’obuholho, kyanga bolhobere erikolha ikyan’ekyo omwa buthuku bw’ebitsibu.

11. Busana naki ni kikulhu Abakristayo munabwire eribya n’erikirirya erighumire?

¹¹ Ng’Abakristayo Abaebrania, nethu thukayithagha erikirirya. Thuli omwa buthuku omughulhu abandu bangyi bakaghana nibya n’erisiningulira erikunga erihambire okwa nduli y’omughulhu ono. (2 Pet. 3:3, 4) Eryongera okw’ekyo, nomwakine indi e Biblia yikabisulha ebindu birebe ebikendi thukolya okwa bulighe bunene, hane n’ebindi bingyi ebya thuthasi. Thutholere ithwabya n’erikirirya erighumire ngoku enduli y’omughulhu ono yikendyasira okwa buthuku obutholere kandi ngoku Yehova akendi thutsomana.—Hab. 2:3.

12. Ni kyahi ekikendi thuwathikya erilhama okwa obulighe bunene?

¹² Kandi thutholere ithwaghumya erikirirya lyethu omwa nzira eyo Yehova anemukolesya munabwire erithusondolha—“omughombe oyuthereghulha n’owamenge.” (Mt. 24:45) Obulighe bunene bukendibya bukatsuka, ithwangana syabana obusondoli bulebe obukalhamaya esyongebe, obuli ng’obw’Abakristayo Abaebrania babana omughulhu abanya Roma bababambira. Buno bw’obuthuku obw’erighumya eriyikethera lyethu omwa busondoli obwa thukahebawa erilhua okwa bakasondolha omwa kithunga kya Yehova. Isithwalengekanaya thuthi thukendi syaghondera obusondoli bwabu omwa buthuku bw’obulighe bunene kyamabya ikine muthukalira eribughondera lino.

13. Busana naki erihabulha eriri omwa Abaebrania 13:5 lyabya litholere?

¹³ Babere banalindirire ekiminyikalho ekyangaleka ibathibitha, Abakristayo Abaebrania kandi mubayithagha eribya omwa ngebe nyolho, n’eriyihighulha “okwanza esyofranka [esyosente].” (Soma Abaebrania 13:5.) Abandi omw’ibo mubanabya omwa nzalha n’omwa bunakwa. (Ebr. 10:32-34) Nomwakine indi babya banayitheghekire erighumira ebitsibu busana n’engulhu yuwene, abandi mubatsuka erilhangira obugaga nga bw’obukendi batheya. Aliwe esyosente sisyanga batheghirye okw’ithoghothibwa eryabya irikayasa. (Yak. 5:3) Omo kwenene, owosi-wosi oyuwabya anzire ebindu kyangamukalire kutsibu erithibitha, erisighania enyumba yiwe n’ebindu.

14. Lino, erikirirya erighumire lyanga hamba lithi okwa ebya thukathwamu bikahika okwa bindu by’ekinyamubiri?

¹⁴ Thwamabya ithunawithe erikirirya erighumire ngoku enduli y’omughulhu ono yiri hakuhi kikendi thuhiramo omuhwa ow’eriyihighulha okwanza ebindu. Abandu “basyaghusa ebitsipa byabo omwa nzira” kundi bakendi syaminya ngoku “ebitsipa byabo n’esyamaghetse syabo sibyendi syathoka erilhamyabo okwa kiro ky’erihithana ly’Omwami Mukulhu.” (Eze. 7:19) Omwakanya k’erihwerya amalengekania w’okwibya n’esyosente sinene kutsibu, thutholere ithwakolha erithwamu ery’eribya n’engebe nyolho eyikendi thuthokesya erikolera Yehova. Eki mwamuli eriyikakirya okw’ibya mw’amabanza awathayithaghisibirwe kutse erighunza buthuku bunene wukatsomana ebindu by’ekinyamubiri. Kandi thukendi yitheya okwanza kutsibu ebindu by’ekinyamubiri ebya thuwithe. (Mt. 6:19, 24) Erikirirya lyethu lyangana lengwako  bikahika okwa bindu by’ekinyamubiri n’eyindi myatsi thunemulindirira eryasa ly’enduli y’omughulhu ono.

“LITHOLERE IMWAYIYINIA”

15. Kutsibu-tsibu, ni kyahi ekyaleka Abakristayo Abaebrania ibayithagha eriyiyinia?

¹⁵ Abakristayo Abaebrania babya bakayithagha eriyiyinia omughulhu erikirirya lyabu ly’alengawako emibere ye Yudea yikongera erikalha. (Ebr. 10:36) Nomwakine indi abaghuma b’okw’Abakristayo Abaebrania babya ibabiribana eriendereribwa erikalire, abangyi mubabya Bakristayo omwa buthuku habya obuholho okwa lhulengo lhulebe. Paulo mwakangania ngoku nomwakine indi mubayiyinia erikirirya lyabu likalengwako, mubathaghalhwa nga Yesu, ni bugha ambu, erihika okwa kiika ky’eriholha. (Ebr. 12:4) Aliwe Ekikristayo kyabere kine mw’ongera, Abayuda abahakani mubalholha embere eribya batsurumi kandi b’ithi. Myaka mike enyuma waho, Paulo erihika e Yerusalemu mukyaleka ihabya eriyisamambulha. Abayuda abalhabire okwa 40 “mubayisema erithendi gherya akalyo bathe b’itha Paulo.” (Emib. 22:22; 23:12-14) Nomwakine indi amadini mwabendererya n’eribapona, Abakristayo abo babya bakayithagha erihindana haghuma eriramya, erithulhughania engulhu yuwene, n’erilholha embere eribya n’erikirirya erighumire.

16. Ebaruha eyahandikirawa Abaebrania yanga thuwathikya yithi eribya n’amalengekania awatholere okw’endereribwa? (Abaebrania 12:7)

¹⁶ Ni kyahi ekyanga wathikirye Abakristayo Abaebrania eriyiyinirya erihakanisibwa eryo babana? Paulo mwaminya ngoku bakayithagha eribya n’amalengekania awatholere okwa bitsibu ebyo babya bakabana. Neryo mwasoborera ngoku Nyamuhanga angana lighira erikirirya lyabu erilengwako ng’enzira y’erithendekeramo Abakristayo. (Soma Abaebrania 12:7.) Erithendeka ng’eryo lyangana wathikya omundu erikulha-kulhania n’eryuwania emibere y’Ekikristayo. Kyangabere kyolho Abakristayo Abaebrania abo eriyiyinia ku bahwerya amalengekania okwa byangalhwiririre omwa bitsibu byabu.—Ebr. 12:11.

17. Paulo mwighaki okwa bihambire okw’iyiyinirya eriendereribwa?

 ¹⁷ Paulo mwahira omwa Bakristayo Abaebrania mw’omuhwa ow’eriyiyinirya ebitsibu buthubaha. N’iyo abya atholere eribahandikira ebihambire okwa mwatsi oyu. Iyo ng’oyuwana endereraya Abakristayo, abya inianasi ekyo abahakani bakakolha. Kandi abya inianasi ekyanga kolhwa erithoka erighumira erihakanisibwa. Kundi nibya, abere abiribya Mukristayo, mwabana eriendereribwa muthina-muthina. (2 Kor. 11:23-25) Neryo Paulo mwakania okwa bihambire okw’iyiyinia inianakakasirye. Mw’ibukya Abakristayo athi omughulhu bakayiyiniraya ebitsibu, sibatholere bakayikethera amaaka wabu aliwe batholere ibayikethera Yehova. Paulo mwabugha omwa buthubaha athi: “Omwami Mukulhu ni muwathikya waghe, sinendi sy’ubaha.”—Ebr. 13:6.

18. Ni kyahi ekya thutholere eriminya ekihambire okwa buthuku obukasa ekyanga thuwathikya eriyiyinirya eriendereribwa?

¹⁸ Abaghuma b’okwa balikyethu lino banemuyiyinirya eriendereribwa. Thwangana basighika buthaleghulha omw’ibasabira, n’okwa bundi buthuku, omwa nzira esilhangirikire. (Ebr. 10:33) E Biblia yikabugha ndeke-ndeke yithi, “abosi abanzire erikwama engebe y’erikenga Nyamuhanga n’erimathikana na Kristo Yesu, basy’endereribwa.” (2 Tim. 3:12) Busana n’enzumwa eyo, ithwe bosi thutholere ithwayitheghekera ebikayasa embere. Thulhole embere eriyikethera ighuma Yehova, ithunasi ngoku akendi thuwathikya eriyiyinirya ekitsibu kyosi-kyosi ekyanga thwasira. Okwa mughulhu owatholere, akend’ilhamya abaramya biwe abathaleghulha.—2 Tes. 1:7, 8.

19. Ni byahi ebyo thwanga kolha ebyanga thuwathikya eriyitheghekera obulighe bunene? (Lebaya n’ekisasani.)

¹⁹ Ahathe erithika-thika, ebaruha eyo Paulo ahandikira Abaebrania muyawathikya Abakristayo ab’omwa kighana ky’erimbere eriyitheghekera obulighe obo bangabwene. Paulo mwahira omwa balikyabo mw’omuhwa ow’eriminya buuli amasako n’eriyitheghereryawo. Erikolha ekyo kyanga bawathikirye eriminyerera esyongangirirya esyanga tsekirye erikirirya lyabu n’erighanasyo. Mwabahiramo muhwa ow’erighumya erikirirya lyabu nuku omwa byalhuba bathoke erighendera okwa busondoli bwa Yesu n’obw’abakasondolha omwa ekithunga. Kandi mwawathikya Abakristayo erighumya eriyiyinia lyabu omw’ibya n’amalengekania awatholere okwa bitsibu n’erilhangira ebitsibu ng’akaghisa ak’erithendekwa na Thatha wabu w’olhwanzo. Kwesi, nethu thughendere okw’ihabulha eryasondolibawa eri. Neryo ithukendi thoka eriyiyinia buthaleghulha erihika okwa nduli.—Ebr. 3:14.