Nabuthawa omwa 1934. Ababuthi baghe balhua e Switzerland, bamahumira e Timmins, e tawuni eyo bakathakulhamo eby’obughuli eby’omwa kithaka e Ontario, Canada. Ng’omwa 1939, mama waghe mwatsuka erisoma egazeti ye Watchtower n’eritsuka erihindana okwa mihindano y’Abema ba Yehova. Mwathuthwalhayo ingye n’abaana bethu mukagha. Enyuma waho, mwabya mughuma w’okwa Bema ba Yehova.

Thatha mwathatsemera erithwamu lya mama, aliwe mama mwanza ekwenene kandi mwathwamu eryamakirirayo. Mwalholha embere erikolha ekyo nibya n’omwa myaka ya 1940 omughulhu omubiiri w’Abema ba Yehova imanibawa e Canada. Kandi mughulhu wosi iniakakanganaya Thatha y’olhukeri n’erisikya, n’omw’anabya akamutsumanga. Eky’erileberyako kiwe kibuyanga mukyawathikya ingye n’abaana bethu eriligha ekwenene. Eky’obutseme, emibere ya Thatha muyahinduka amatsuka erithukangania olhukeri.

Omwa Kwomunani 1950, munahindana okwa lhuhindano olhwe Theocracy’s Increase Assembly e New York. Munahirwamo omuhwa w’erikolha bingyi omwa mubiiri wa Yehova enyuma w’eribanangana n’abalikyethu erilhua omwa bihugho muthina-muthina n’erihulikirira ebyalholirweko ebikatsemesaya eby’ababirisoma esukuru ye Gilead! Eriyisunza lyaghe eryingira omwa mubiiri w’omughulhu wosi mulyongera kwilhaba kera. Nabere inganasuba eka, mun’usulirirya efomu ey’erisaba eribya mutemburi. Ekyaghanda ky’omuthahulha ekye Canada mukyanyihandikira, kyamabugha kithi ngatsuke eribatizibwa. Munakolha ekyo omwa Kwerikumi 1, 1950. Kwezi kughuma enyuma waho, munabya mutemburi w’omughulhu wosi n’erithunga olhusunzo lhwaghe lhw’erimbere e Kapuskasing. Etawuni eyo yabya haali kilomita sinene erilhua eyo nabya ng’ikere.

 Omwa 1951, Ekyaghanda ky’omuthahulha mukyasaba Abema abanga bugha e French kithi balengekanaye okw’isuba omwa provinsi ye Quebec, eyo bakakanaya e French. Yabya obuyithawa bunene. Munakulha iningabugha e French n’Olhusungu, neryo munaligha olhusunzo n’amathumwa e Rouyn. Nabya isingasiyo mundu wosi-wosi. Nabya ngwithe engangirira nyisa, ngoku nganalyabugha okw’itsuka. Aliwe mubyaghenda ndeke. Ingye na Marcel muthwabya banywani, kandi enyuma waho munatsemera erikolera e Quebec ng’omutemburi w’embaghane.

Ingane e Quebec, munasweka ingakokibwa omwa klasi eya 26 ey’esukuru ye Gilead e South Lansing, e New York. Ekiro ky’omukonga w’erighunza esukuru ye Gilead mukyabya omwa Kwakabiri 12, 1956, neryo munathumwa eyikahulhawamo lino Ghana, b omwa West Africa. Aliwe ngathe ngaghendayo, nabya w’erisuba e Canada “ahabw’esyoyenga nyike” erihika aho ebihandiko byaghe eby’erighenderako byanga banikire.

Munayisanga ingabirilinda ebihandiko ebyo ahabw’amezi musanju ingane e Toronto. Efamile ya Ndugu Cripps muyanyikokya erikalha ewabu, neryo munaminya ya Sheila, omwana wabu w’obukali. Muthwanzana. Ingakisiya ingamubwira ngoku nganza erimuthahya, eviza yaghe muyasa. Enyuma w’erisaba, ingye na Sheila muthwathwamu thuthi ngaghende eyo n’abirithumwa. Aliwe ithukabya ithune mukanirania nga thukendi sy’ingira mughulhu wahi omwa butheke. Eryo si lyabya ithwamu lyolho, aliwe obuthuku bwabere bunemulhaba, mulyalhangirika ku n’ithwamu eritholere.

Enyuma w’erighunza okwezi inganemughenda omwa treyini, obwathu, n’endege, munahika e Accra, Ghana. Eyo, munasombolhwa erikolha ng’omulebererya w’edistrikiti. Mwabya imwamuli eribalhama omwa Ghana eyosi kuthya n’ekihugho ekiri hakuhi nayu ekye Ivory Coast (lino ekikahulhawamo Côte d’Ivoire) ne Togoland. Mughulhu mungyi iningabalhama ingyuwene omwa mathoka eyo ekyaghanda ky’omuthahulha kyamba. Iningatsemera eribungira balikyethu mughulhu wosi!

 Okwa wikendi, iningaghenda okwa mihindano eminene-minene ey’omuthimbo. Sithwabya thuwithe ebyumba by’emihindano eminene-minene. Neryo baghalha bethu ibakahimba akanyumba kalhuba-lhuba omwa mithi y’emilhonge n’amasanza w’emithi yamangasi eribya kitsutsu okwa bahindene. Kundi omwa huteri simwabya esyofiriji, ebisoro ibikabikawa ibineho neryo ibyakerwa bikayithaghisibwa erilibwa n’abahindene.

Muthwalholha okwa bindu ebikasekaya okwa mihindano eminene-minene eyi. Buthuku bughuma, Herb Jennings, c omumisyonare mulikyethu, abere anemulhabya omukania, ende muyatswa ahali ehuteri. Muyimana ahakathi-kathi k’eplatifomu n’abahindene. Herb mw’imania omukania, n’ende yamabulha ngayilhole hayi. Baghalha bethu bbani ab’akaghalha mubathoka erihambayo n’erisubyayo ahali ehuteri, abahindene ibanemw’utha obwogho.

Omwa wiki ey’olhuhindano, munakangania evidiyo yethu eya The New World Society in Action omwa byalu ebyabya hakuhi. Erithoka erikolha ekyo, iningakolesaya e projekita n’olhukimba olhubohere okwa bikondo bibiri kutse okwa mithi ibiri. Abandu b’omwa kyalu ekyo mubatsemerayo! Okwa bangyi, yabya iy’evidiyo y’erimbere eyo bamathalebya. Mubabbanda-bbanda omwa byalha mwa kutsibu bakalhangira abandu bakabatizibwa omwa vidiyo eyo. Evidiyo eyo muyawathikya abalebayayo eriminya ngoku thuli kithunga ekiri omwa bughuma eky’ekihugho kyosi.

Enyuma w’erighunza emyaka ng’ibiri omwa Afrika, munatsema ngakahindana okwa lhuhindano lhw’ebihugho bingyi omwa 1958 e New York. Munatsema kutsibu ingabanangana na Sheila, iniabirilhua e Quebec, eyo abya akakolera ng’omutemburi w’embaghane. Thwabya ithunemukanirania erilhabira omwa syobaruha, aliwe lino thwabya ithwabirithasyabya haghuma, munamubwira indi nganza erimuthahya, nayu mwaligha. Munahandikira Ndugu Knorr d erimubulya Sheila ng’anganasoma e Gilead n’erinyiyiyungako omwa Afrika. Mwaligha. Erighunzerera, Sheila mwahika e Ghana. Munamuthahya ithune e Accra, omwa Kwerikiumi 3, 1959. Muthwalhangira ngoku Yehova abirithutsumulha busana n’erimuhira embere omwa syongebe syethu.

Omwa 1961 muthwathumwa omwa kihugho kye Cameroon. Nabya bize kutsibu, kundi munasabwa  eritsukisya ekyaghanda ky’omuthahulha ekihyaka. Ng’omughombe w’ekyaghanda omuhyaka, nabya ngwithe bingyi eby’erigha. Neryo omwa 1965 muthwaminya ngoku Sheila ni mukule. Ngaligha ngoku muhalhaba buthuku erisalha thwabeghera eky’eribya ithukayabya babuthi. Aliwe thwabere thunemutsemera olhusunzo lhuhyaka olho n’erihiraho emitheghekere y’erisuba e Canada, ekindu ekikabbuna omuthima mukyabya.

Sheila mwalhuako obukule. Dokita mwathubwira athi omwana oyulhue isyali abuthwa alhue w’obulhume. Ekyo kyabya myaka eyilhabire omu 50 kera, aliwe sithwendi syakibirirwa. Nomwakine indi ekyabya mukyathulethera obulighe bunene, muthwalholha embere erikolha olhusunzo lhw’omwa kindi kihugho olho, olhwa thwabya thwanzire kutsibu.

E Cameroon balikyethu ibak’endereribawa busana n’erithwamu erithendibya n’olhuhandi omwa by’ekipolitiki. Emibere iyikakalira ighuma omwa buthuku bw’erikoma prezidenti. Omwa Kwakathano 13, 1970, ekindu ekyo thwabya isithwangalengekania thuthi kyanganabya mukyabya, omubiiri w’Abema ba Yehova mw’imanibwa. Ekyaghanda ky’omuthahulha ekihyaka ekyuwene ekya thwabya ithwamathaghunza amezi athano masa thwalisubiremo, mukyahambwa n’egavumenti. Omwa wiki nguma, abamisyonare abosi—imwamune ingye na Sheila—muthwathibithwako omwa kihugho ekyo. Mukyathukalira erisighania balikyethu kundi thwabya thubatsomene kutsibu kandi muthwabulha ng’abakendibyaho bathi omwa biro ebyakwamako.

Muthwaghunza amezi mukagha awakwamako okwa kyaghanda ky’omuthahulha e France. Ingan’eyo, munalholha embere erikolha ekyosi-kyosi ekyo nangathoka eritsomana balikyethu be Cameroon. Omwa Kwerikuminibiri omwaka oyo, muthwathumwa okwa kyaghanda ky’omuthahulha ekye Nigeria, ekyatsuka erilebererya omubiiri w’erithulira we Cameroon. Balikyethu be Nigeria mubathuthangirira ibanatsemire, kandi muthwakolha haghuma nabo ahabw’emyaka mingyi.

Omwa 1973, muthwabya b’erikolha erithwamu erikalire. Sheila abya inianemughumira obulhwere obukalire. Ithune okwa lhuhindano kwe New York, mwalira n’erimbwira athi: “Sinanga thasyalholha embere! Mughulhu mungyi ngabya inganalhuhire kandi inganalhwere.” Abya iniabirikolha haghuma naghe omwa West Africa ahabw’emyaka eyilhabire oku 14. Iningatsemera kutsibu erikolha liwe buthaleghulha, aliwe muthwabya b’erikolha esyombinduka. Enyuma w’erikania okwa mibere eyo thulimo n’erisaba kutsibu busana nayo, muthwathwamu thuthi thusube e Canada, eyo thwanga tsomanire ndeke amaghalha wiwe. Erisighania olhusunzo lhwethu lhw’obumisyonare n’omubiiri w’omughulhu wosi lyabya erithwamu erikalire kutsibu kandi erikabbuna muthima eryo thwabirithakolha.

Thwabere thwabirihika e Canada, munywani waghe oyuwabya akakolongana okwa by’erighulya esyomatoka elhuthambi lhw’endatha lhwe Toronto mwamba omubiiri. Muthwapangisya enyumba, thwamaghulha esyomeza n’ebithumbi eby’ababirikolesibwa, kandi muthwathoka erihuma isithuthawa omwa mabanza. Muthwanza erilholha embere ithune omwa ngebe nyolho, ithunawithe amaha ngoku kiro kighuma thwangana syasuba omwa mubiiri w’omughulhu wosi. Muthwasweka kikabya  okwa buthuku obwa thuthabya thulengekenie thuthi ekyo ikyathokekana.

Munatsuka eriwathikya obuli Kyamukagha okwa buhimbe bw’Ekyumba kihyaka eky’Olhuhindano e Norval, Ontario. Endambi muyahika namasabwa erikolha ng’omulebererya w’Ekyumba ky’Olhuhindano. Amaghalha wa Sheila abya iniali mughenda akuwana, kandi muthwayowa iniangana thoka olhusunzo lhuhyaka olho. Neryo muthwasuba omwa nyumba eyabya okwa kyumba ky’olhuhindano omwa Kwomukagha 1974. Muthwatsema kutsibu thukasuba omwa mubiiri w’omughulhu wosi!

Eky’obutseme, amaghalha wa Sheila mwongera eryuwana. Myaka ibiri enyuma waho, muthwaligha erikolha omubiiri w’obulebererya. Omuthimbo abya e Manitoba, ekitsweka kirebe e Canada ekyasibwe ng’ekikabya mw’ekihuhiriro kinene omwa kw’okubanza. Nomwabine, muthwatsemera obughuma obuwene obwa balikyethu b’eyo. Muthwaminya ngoku aho thukakolera sikyo kikulhu—aliwe ekikulhu ly’erilholha embere erikolera Yehova ahosi-hosi aho thwangabya.

Thwabere thwabirighunza emyaka mingyi omwa mubiiri w’obulebererya, muthwakokibwa eriyakolera okwa Beteli ye Canada omwa 1978. Hathe halhaba buthuku buuli, mun’igha erisomo likulhu aliwe enyuma w’obulhumi. Munasombolhwa erilhabya omukania w’esaha nguma n’embindi omwa French, okwa muhindano w’embaghane e Montreal. Eky’obulighe, omukania waghe mwathahamba amalengekania w’abahulikiriri, neryo ndugu Dipatimente y’Omubiiri mwamba erikunga erihambire okwa mukania oyo. Erithabugha okwenene, munaminya ngoku sindi mbuyi eyasi ndeke. Aliwe erikunga eryo mulithanyitsemesya. Emibere yethu muyabya nga siyithahambangana, kandi munayowa ng’awithe omubere w’eritsweba-tsweba kandi syathanyisima. Munakolha ekisobyo ky’eripona erihabulha busana n’emibere lyahebawamo kuthya n’amalengekania awathatholere ogho nathunga oko oyuwambalyo.

Biro bike enyuma waho, ow’okwa Komiti y’Ekyaghanda ky’Omuthahulha mwakania naghe okwa mwatsi oyo. Munaligha ngoku munathakolha ngoku kitholere okw’ihabulhwa kandi munakangania eriyikubyabwomo. Enyuma waho, munakania na mughalha wethu oyowanyihabulha. Omwa lhukeri, mwanganyira. Ekyalholirweko ekyo mukyanyeghesya ngoku ngatholere ingayikehya, ekindu ekya ngathendi sy’ibirirwa. (Emi. 16:18) Nabiribya ingane musaba Yehova mirundi mingyi busana n’eki, kandi nabirithwamu erithendi thunga okw’ihabulha kw’amalengekania awathatholere.

Namabirighunza okwa Beteli ye Kanada kw’emyaka eyilhabire omu 40, kandi erilhua 1985, nabiribya n’olhusunzo lhw’erikolera okwa Komiti y’Ekyaghanda ky’Omuthahulha. Omwa Kwakabiri 2021, omwanze waghe Sheila mwaholha. Eryongera okw’ighumira obulhumi bw’eriholerwa, ngawithe ebitsibu byaghe by’amaghalha. Aliwe omubiiri wa Yehova akaleka ingabya bize kandi inganatsemire erihika okw’ibya “isindi minya ngoku ebiro binemulhaba.” (Omu. 5:20) Nomwakine indi nabiribya inganemubana ebitsibu, obutseme bwabirilenga ebitsibu. Erihira Yehova y’embere omwa ngebe yaghe n’erikolha omubiiri w’omughulhu wosi ahabw’emyaka 70 kyabirinyilethera mighisa mingyi. Ngayisunza indi, baghalha bethu n’abali bethu abalere, ambi nabu ibalholha embere erihira Yehova y’embere, kundi nganasi ngoku bakendi bana emighisa n’engebe eyikatsemesaya eyikathokekana ithunalyakolera Yehova.