OMWATSI W’ERIGHA 36
OLHWIMBO 89 Hulikirira, Wowe, Wana Tsumulhwa
“Mubye Bandu Abakakolha n’Eriowa Ebinywe bya Nyamuhanga”
“Mubye bandu abakakolha n’eriowa ebinywe bya Nyamuhanga, butsira abakahulikirira lisa.”—YAK. 1:22.
EKIGHENDERERWA
Omwatsi ono akendi thuwathikya erighumya eriyisunza lyethu ery’erisoma Ekinywe kya Nyamuhanga obuli kiro, erithuwathikya erikighaniryako, n’erikighenderako omwa ngebe yethu yosi.
1-2. Ni kyahi ekikaleka abaghombe ba Nyamuhanga ibatsema? (Yakobo 1:22-25)
YEHOVA na Mughalha wiwe mwanzwa banzire ithwatsema. Omuhandiki we Esyonyimbo 119:2 akabugha athi: “Obutseme buli n’abo abakakwama Omwami Mukulhu n’ebihano biwe, abakamukenga n’omuthima wabo wosi.” Yesu nayu mwabugha athi: “Obutseme buli oko bakowa ekinywe kya Nyamuhanga n’erikolhakyo.”—Lk. 11:28.
2 Ithwe ng’abaramya ba Yehova, thuli bandu abatsemire. Busana naki? Thuwithe nzumwa nyingyi, aliwe enzumwa ngulhu yiri yithi mughulhu wosi thukasoma ekinywe kya Nyamuhanga n’erilengaho erighendera okwa ebya thuk’igha.—Soma Yakobo 1:22-25.
3. Thukaghasirawa thuthi thwamaghendera okwa ebya thukasoma omwa Kinywe kya Nyamuhanga?
3 Thukaghasirawa omwa nzira nyingyi thwamabya “bandu abakakolha n’eriowa ebinywe bya Nyamuhanga.” Thunakyasi ngoku eki ni kindu kikulhu ekikathuwathikaya eritsemesya Yehova. Erikolha ekyo likaleka ithwatsema. (Omu. 12:13) Thukabya thukahira ebya thukasoma omwa Kinywe kya Nyamuhanga ekyasondilibawa by’omwa mikolere, thukaghumaya obughuma n’ab’omw’eka yethu kuthya n’abaramya balikyethu. Obundi wabiriyilhangirira ekyo. Nibya, thukayihighulha okwa bitsibu bingyi ebikahika okwa batheghendera okwa bihano bya Yehova. Omo kwenene, thukalighirana n’Omwami Dawudi. Abere abiryahulha ebihano, erihamulha, n’eritswera lya Yehova omwa lhwimbo, mwaghunzerera athi : “N’oyukakwamabyo akabana olhuhembo lhunene.”—Esy. 19:7-11.
4. Busana naki sikyolho eribya bandu abakakolha n’eriowa Ekinywe kya Nyamuhanga?
4 Omo kwenene, mughulhu wosi si kyolho eribya bandu abakakolha n’eriowa ebinywa bya Nyamuhanga. Nomuthunawithe bingyi by’erikolha, thutholere ithwabana obuthuku bw’erisoma n’eriyeghesya e Biblia erithoka eriminya ebya Yehova anzire ithwakolha. Busana n’ekyo, leka thulebaye amenge malebe awanga thuwathikya erisomayo ahathe eryusa. Kandi thukendi lebya ekikendi thuwathikya erighanirya okwa bya thukasoma n’erilhangira esyonzira ndebe esyanga thuwathikya erighendera okwa ebya thuk’igha omwa syongebe syethu.
HIRAHO OBUTHUKU BW’ERISOMA EKINYWE KYA NYAMUHANGA
5. Ni ngwamirwa syahi esikathuthwalira buthuku bungyi?
5 Abangyi b’okwa bandu ba Yehova bawithe bingyi by’erikolha. Thukaghunza buthuku bunene thukaberererya esyongwamirwa syethu muthina-muthina esiseghemere okwa masako. Ng’eky’erileberyako, abangyi omw’ithwe thukakolha emibiiri y’ekihugho erithoka eribana ebiyithawa byethu n’eby’esyofamile syethu. (1 Tim. 5:8) Abakristayo bangyi bakatsomana abahughu babu abalhwere kutse abakulire omwa myaka. Kandi ithwe bosi thutholere ithwatsomana amaghalha wethu, ekindu ekikayithagha obuthuku. Eryongera okwa syongwamirwa esi, thuwithe esindi ngwamirwa omwa kithunga. Olhukwamirwa lhukulhu ly’erisangira omwa mubiiri w’erithulira n’omuhwa. Busana n’esyongwamirwa esya wuwithe iwe ng’omundu, wangabana wuthi obuthuku bw’erisoma e Biblia ahathe eryusa, erighanirya okwa ebya wukasoma, n’erighendera okwa ebya yikabugha?
6. Wangakolhaki erilhangira wuthi erisoma e Biblia likabya kindu kikulhu omwa ngebe yawu? (Lebaya n’ekisasani.)
6 Erisoma e Biblia ni kighuma ky’okwa bindu “bikulhu kutsibu” okw’ithwe ng’Abakristayo, neryo thutholere ithwalhangira thuthi thukakikolha. (Fil. 1:10, NWT) Olhwimbo lhw’erimbere-mbere lhukabugha okwa mundu oyutsemire lhuthi: “Emighambo y’Omwami Mukulhu ni butseme bwiwe, kandi ak’igha Emighambo yiwe omo musibo n’omo kiro.” (Esy. 1:1, 2) Eki kikakanganaya ngoku thutholere ithwahiraho obuthuku obw’erisoma e Biblia. Obuthuku obuwene obw’erisomeramo e Biblia bw’obwahi? Erisubirya lyethu lyangana ghana erisosana. Omwa bikuhi, bwanganabya ibw’obuthuku obwa wangathokeramo erikolha ekyo ahathe eryusa. Mughalha wethu ya Victor akabugha athi: “Ngatsemera erisoma e Biblia y’omwangyakya. Nomwakine indi singalyanza eribuka lhuba, omwa buthuku bw’engyakya obo, ni bike ebikanyilengemeraya. Amalengekania waghe akabya inianathekene kandi ngabihwerayako ndeke amalengekania.” Mbwino nawu kwa wukakolha wuthya? Yibulhaye, ‘Obuthuku obuwene obo nanga someramo e Biblia bw’obwahi?’
Ni buthuku bwahi obuwene obw’erisomeramo e Biblia? Ni ndambi yahi eyo wanga koleramo ekyo ahathe eryusa? (Lebaya enungu 6)
GHANIRAYA OKWA EBYA WUKASOMA
7-8. Ni kyahi ekyanga thulemesya erighasirwa ndeke omwa ebya thukasoma? Iha eky’erileberyako.
7 Okwenene kuli kuthi, thwangana bera eribya thukasoma ebindu bingyi aliwe ibithathuhika okwa muthima. Wune wathasoma omwatsi mulebe aliwe habirilhaba buthuku buke iw’ibirirwa ebyo wulyasoma? Ithwe bosi ekyo kikathubyako. Eky’obulighe, eki ky’ekyanganabya thukasoma e Biblia. Obundi ithwangana yihiriraho ekilhubirirwa eky’erisoma esyosura ndebe omwa Biblia obuli kiro. Ekyo kyuwene. Thutholere ithwahiraho ebilhubirirwa kandi ithwalhangira thuthi thukabiberereraya. (1 Kor. 9:26) Nomwabine, erisoma e Biblia n’itsuka—n’itsuka eryuwene, aliwe n’itsuka buyira. Ni bingyi ebikayithaghisibawa erithoka erighasirwa ndeke omw’isoma Ekinywe kya Nyamuhanga.
8 Thalengekania okw’ilinganisya lino: Amaghetse, kutsibu-tsibu aw’embulha, ni w’omughaso okwa birimwa. Aliwe embulha y’amawa nene kutsibu ahabw’obuthuku buke, ekithaka ikyanganalhuaho ikyatsapira ighuma. Ekithaka kyamabiritsapa, eyindi mbulha eyangawa siyanga thasyathunga mughaso. Ekithaka kikayithagha obuthuku erithoka erinyunyira embulha eyabiriwa nuku ebirimwa bighasirawe omwa maghetse ayo. Omwa nzira iyan’eyo, thutholere ithwayihighulha okw’isoma e Biblia omw’iharabana, ni bugha ambu, erisomayo lhuba-lhuba erihika okw’ilemwa eriyitheghereryayo, eryibuka, n’erighendera okwa ebyo thukasoma.—Yak. 1:24.
Ngoku ekithaka kikayithagha obuthuku erinyunyira n’erikolesya embulha, nethu thukayithagha obuthuku erighanirya n’erighendera okwa ebya thuk’igha omwa Kinywe kya Nyamuhanga (Lebaya enungu 8)
9. Thwanga kolhaki thwamabya ithwabirithunga omubere w’erisoma e Biblia lhuba-lhuba?
9 Mbwino okwa bundi buthuku wukanayibana iwabirisoma e Biblia lhuba-lhuba? Wanga kolhaki? Soma lyolho-lyolho. Lhangira wuthi wukaghaniraya okwa ebya wukasoma kutse ebyo wukalhua okw’isoma. Ekyo nina kyolho. Iwangana thwamu erithasyongera obuthuku bwawu obw’eriyeghesya nuku omwa buthuku obo mubye n’obw’erighanirya. Okwa lhundi lhuhandi, wanganathwamu erisoma emilhondo mike neryo iwakolesya obuthuku obusighereyo erilengekania okwa ebya wamasoma. Victor oyukanibweko ahanyuma akabugha athi: “Ngalhangira indi obusomi bwaghe bwe Biblia bukabya bukuhi, obundi nga sura nguma. Kundi ngasoma omwa ngyakya, kikanyiwathikaya erighanirya okwa ebyangalyasoma omwa musibo owosi.” Enzira yosi-yosi eyo wangathwamu erikolesya, ni kikulhu erilhangira wuthi wukasoma omwa mibere eyanganaleka iwaghasirwa omwa ebya wukasoma.—Esy. 119:97; lebaya akasanduko “ Ebibulyo Eby’erilengekaniako.”
10. Iha eky’erileberyako ngoku wanga ghendera okwa bya wuk’igha. (1 Abanya Tesalonika 5:17, 18)
10 Nomuwanga soma e Biblia mughulhu wahi kandi nomuwangabya iwukaghunza buthuku bungahi iwune musomayo, lhangira wuthi wukaghendera okwa ebya wukasoma. Wunemusoma akatsweka kake k’Ekinywe kya Nyamuhanga, yibulhaye, mbwino nangaghendera indi okwa mwatsi oyu lino kutse omwa buthuku obukasa?’ Ng’eky’erileberyako, thuthabugha thuthi omwa busomi bwawu bwe Biblia wamabirisoma 1 Abanya Tesalonika 5:17, 18 (Soma.). Enyuma w’erisoma emilhondo ibiri eyi, wangan’imana hake n’erilengekania nga wukanabera erisaba mughulhu wosi kandi emisabe yawu nga yikanalhua oko muthima. Kandi, iwangana lengekania okwa bindu ebya wukasima. Obundi iwathwamu wuthi wukendi sima Yehova habw’ebindu bisathu birebe. Nibya n’erighunza esyodakika nyike iwunemulengekania wuthya, iwukendibya mundu oyukakolha n’eriowa ebinywe bya Nyamuhanga okwa lhulengo lhulebe. Lengekanaya nga wanga ghasirwa wuthi wamabya wukakolha ikyan’ekyo okwa bindi bitsweka bye Biblia ebyo wukasoma obuli kiro! Omo kwenene, wukendi yongera eribya mundu oyukakolha n’eriowa ebinywe bya Nyamuhanga. Kandi ibbwa kyamabya kithi, hali ebindu bingyi ebya wutholere erikolhako?
YIHIRIREHO EBILHUBIRIRWA EBYO WANGANA THOKA ERIHIKAKO
11. Busana naki hanganayira iwayowa nga siwanga thoka? Iha eky’erileberyako.
11 Wamasoma e Biblia n’erisondya esyonzira esyo wangaghenderamo okwa busondoli bwayo, ihanganayira iwayowa nga siwangathoka. Thalengekania oku kino: Thubughe thuthi omwa busomi bwabu bwe Biblia obwa Kyabbalaza muli erihabulha erihambire okw’ithendi kangania akasolholho. (Yak. 2:1-8) Iwakilhangira ngoku wutholere iw’uwania emibere wukathwaliramo abandi, neryo iwathwamu erikolha esyombinduka. Ekyo kyuwene kutsibu! Neryo Kyakabiri, iwasoma omwatsi ow’akahira omuwatho okwa mughaso w’eritheya emikanirye yawu. (Yak. 3:1-12) Neryo iwibuka ngoku hakanayira emikanirye yawu iyathuwana. Neryo iwathwamu eryuwania emikanirye yawu kandi iyabya eyikahimba. Obusomi bwawu bwe Biblia obwa Kyakasathu ibwabya mw’omwatsi ow’akakunga okw’ibya munywani w’ekihugho. (Yak. 4:4-12) Iwakilhangira ngoku wutholere iwasombolha ndeke eby’eriyitsemesya byawu. Neryo Kyakani, iwangana tsuka eriyowa nga siwendi thoka busana n’ebyosi ebyo wutholere iwuwania.
12. Busana naki siwutholere wukahwa amani obusomi bwawu bwe Biblia bwamakukangania ku wutholere iwakolha esyombinduka? (Lebaya n’omwatsi ahikwa.)
12 Wamalhangira iwuwithe bingyi by’eryuwania, isiwahwa amani. Eki kikakanganaya ngoku wuyikehirye kandi wuwithe ekighendererwa ekyuwene. Omundu oyuyikehirye kandi oyukayibera w’okwenene akasoma amasako iniananzire erilhangira ekyo atholere in’uwania. a Kandi, wibuke ngoku eryambalha “omundu muhya-muhya” ni kindu ekikalholha embere. (Kol. 3:10) Ni kyahi ekikendi kuwathikya erilholha embere eribya mundu oyukakolha n’eriowa ebinywa bya Nyamuhanga?
13. Wanga yihiriraho wuthi ebilhubirirwa bingyi ebyo wanga thoka erihikako? (Lebaya n’ekisasani.)
13 Omwakanya k’erilengaho erighendera okw’ebyo wukasoma ebyosi haghuma , hiraho ebilhubirirwa bingyi ebyo wangana thoka erihikako. (Emi. 11:2) Wangana lengesya amenge ano: Handika e listi ey’ebindu birebe ebyo wanzire iwakolhako, neryo sombolhamu kighuma kutse bibiri ebyo wanganza eritsuka nabyo, neryo iwakolha okwa bindi kw’enyuma waho. Wutholere iwatsukira hayi?
Omwakanya k’erilengaho erighendera okw‘ebyo wukasoma ebyosi haghuma, busana naki iwathahiraho ebilhubirirwa ebyo wangana thoka erihikako? Obundi wangana hira amalengekania okwa nzumwa nguma kutse ibiri (Lebaya enungu 13-14)
14. Ni bilhubirirwa nga byahi ebyo wanga tsuka nabyo?
14 Wangana thwamu eritsuka n’ekilhubirirwa ekyanga kw’olhobera eriberererya. Kutse wangana thwamu eryuwania aho wukalhangira iwutholere eryuwania. Wukendibya wabiriminya aho wutholere eryuwania, sekulhaya omwa bitabu byethu, obundi omw’ikolesya e Watch Tower Publications Index kutse Obusondoli obw’Erisekulya Omwa Bitabu eby’Abema ba Yehova. Hira ekilhubirirwa kyawu omwa musabe, saba Yehova akuhe “omuthima w’erianza n’amaaka w’eriyira eky’erikolha.” (Fil. 2:13, NWT) Neryo hira omwa mikolere ebyo wabirigha. Wamalhangira ngoku wunemuthoka eriberererya ekilhubirirwa kyawu ky’erimbere, iwukendibya n’omuhwa w’erilengaho eriberererya ekindi. Omo kwenene, wam’uwania omubere mulebe omwa ngebe yawu ng’Omukristayo, ikikendi kw’olhobera erikolha n’esindi mbinduka.
MULEKE EKINYWE KYA NYAMUHANGA ‘KIKOLE OMO KATHI-KATHI KENYU’
15. Abandu ba Yehova bali bathi ba mbaghane okwa bangyi abakasoma e Biblia? (1 Abanya Tesalonika 2:13)
15 Abandi bandu bakabugha bathi b’abirisoma e Biblia mirundi mingyi. Aliwe kwenene ban’ikirirye ebye Biblia yikakangiriraya? Bakana bighenderako kutse eribilighira erihindulha esyongebe syabu? Eky’obulighe, mughulhu mungyi eky’erisubirya ni eyihi. Abandu ba Yehova ni bambaghane! Ng’Abakristayo ab’omwa kighana ky’erimbere, thukaligha e Biblia ‘ngoku kwenene, ni kinywe kya Nyamuhanga.’ Neryo busana n’ekyo, thukalengaho erikangania ngoku kinemukolha omwa ngebe yethu.—Soma 1 Abanya Tesalonika 2:13.
16. Ni kyahi ekikendi thuwathikya eribya bandu abakakolha n’eriowa Ekinywe kya Nyamuhanga?
16 Mughulhu mungyi siky’olhobire erisoma n’erighendera okwa ebya thuk’igha omwa Kinywe kya Nyamuhanga. Kyangana thukalira eribana obuthuku bw’erisoma. Kutse thwangana soma lhuba-lhuba neryo ebya thukasoma ibyaghana erihika okwa mithima yethu. Kutse thwangana lhangira nga kikalire eryuwania ebyosi ebyo thutholere ith’uwania. Mbulha ni kyahi ekikakukalira, sihali ekyo wuthe wanga singura. Omwa buwathikya bwa Yehova, iwangana thoka. Ka thuthwemu eriligha obuwathikya bwiwe n’erithendibya abakahulikirira buyira n’eribirirwa, aliwe abakakolha n’eriowa ebinywe bya Nyamuhanga. Ahathe erithika-thika, thukabya thukasoma Ekinywe kya Nyamuhanga buli kiro n’erikighenderako omwa ngebe yethu, kwa thukan’ongera thuthya eritsema.—Yak. 1:25.
OLHWIMBO 94 Erisima Ekinywe kya Nyamuhanga
a Lebaya evidiyo eya Ebya Minyethu ng’Iwe Bakabugha—Erisoma e Biblia okwa jw.org.
