Thukayitheghekera eriyeghesya, ithwangana yibulya thuthi, ‘Ni kyahi ekyo ngalengekanaya er’igha omwa mwatsi oyu?’ Nomwabine, thutholere ithwayitheya okw’ilighira ebyo thukalengekanaya thuthi thukend’igha erileka thukathendi lhangira ebyo Yehova akathweghesaya. Thwangabya thuthi ithunayitheghekire erigha ebindu bihyaka thukayeghesya?

Saba amenge. Saba Yehova akuwathikaye eriminyerera ebyo anzire iw’igha lino. (Yak. 1:5) Yihighule okw’ikwama kyatsemera ebya w’igha kera bisa.​—Emi. 3:5, 6.

Sikaya amaaka we Biblia aw’embaghane. “Ekinywa kya Nyamuhanga kiriho.” (Ebr. 4:12) Obuli erisoma e Biblia, “ekinywe” kya Nyamuhanga ekiriho kyangana thuhambako—aliwe ithunalyabya ithunayitheghekire eriligha ebyo thukasoma mukyo.

Tsemera ebyosi ebiri okwa meza ya Yehova. Ebyalya biwe by’obunyakirimu biri ‘ng’erirya linene ry’ebindu ebinunire.’ (Isa. 25:6) Yihighule okw’ikyuruka “ebyalya” ebya wukalengekanaya wuthi siwanga tsemera. Siwendi ghasirwa lisa aliwe kandi wukendi tsemera ebyo Yehova akaha!