OMWATSI W’ERIGHA 38
OLHWIMBO 25 Ekihanda Ekyayisoghawa
Wunemughendera Okw’ikunga?
“Omughuma asyathwalhwa n’owundi asyasighalha.”—MT. 24:40.
EKIGHENDERERWA
Thukendi kania okwa mikya ya Yesu isathu kandi ithwakania nga yihambene yithi n’obuthuku obw’eritswera obukendibya okw’ihwererera ly’omughulhu ono.
1. N’itswera lyahi erikisiya iryabya?
THULI omwa buthuku obukasisimulha! Yesu akisiya iniatswera obuli mundu oyuliho. Yesu mwakania okwa buthuku obwanga hikirye okw’itswera eri omw’ibwira abigha biwe “ekiminyikalho” ky’obuminyereri eky’eryasa liwe erithendi syalhangirwa “n’erihwererera ly’emighulhu.” (Mt. 24:3) Obuminyereri obu buli omu Matayo sura 24 na 25 n’omwa myatsi eyihambangene n’obuminyereri obu eyiri omu Mariko sura 13 na Luka sura 21.
2. Ni byahi ebya thukendi kaniako omo mwatsi ono, kandi busana naki eki kikendi thuwathikya?
2 Yesu mwaha erikunga eryanga thuwathikya erilhabira omwa mikya isathu. Mwamuli omukya ow’esyombuli n’esyombene, abasika abathebathabana mulhume ab’amenge n’abakiru, n’ow’esyotalanta. Obuli mukya akathuwathikaya eriyitheghererya ngoku obuli mundu akendi syatswerwa erikwamana n’emibere yiwe. Thunemukania okwa mikya eyi, thulebaye nga thwang’igha masomo wahi kandi nga thwanga kolesyagho thuthi. Omukya w’erimbere ogho thukendi kaniako w’ow’esyombuli n’esyombene.
ESYOMBULI N’ESYOMBENE
3. Ni mughulhu wahi Yesu akendi syatswera abandu?
3 Omwa mukya w’esyombuli n’esyombene, Yesu mwakania okw’itswerwa ly’abandu abawithe akaghisa ak’erihulikirira engulhu mbuya n’erisighika baghalha babu abahakabibwa. (Mt. 25:31-46) Omwa buthuku ‘bw’obulighe bunene,’ akendi syakolha omubiiri w’eritswera e Harmagedoni iyikisiya iyahika. (Mt. 24:21) Ngoku omulisya akanaghabulha esyombuli okwa syombene, Yesu akendi syaghabulha abakasighika buthaleghulha abigha biwe abahakabibwa okwa bathekolha ekyo.
4. Ngoku kiri omu Isaya 11:3, 4, busana naki ithwakakasya ngoku Yesu akendi syatswera abandu omwa bulingirirania? (Lebaya n’ekisasani ky’okwa .)
4 Amaminyereri we Biblia akakanganaya ngoku Yesu ng’omutsweri oyo Yehova abirisombolha, akendi syatswera omwa lithunganene. (Soma Isaya 11:3, 4.) Akasamalira emibere, amalengekania, n’emibughire y’abandu—imwamune n’emibere bakathwaliramu baghalha babu abahakabibwa. (Mt. 12:36, 37; 25:40) Yesu akendi syaminya abasighika baghalha babu abahakabibwa n’erisighika omubiiri wabu. a Enguma y’okwa syonzira ngulhu eyo abali ng’esyombuli bakasighikiramo baghalha bobu Kristo ly’eribawathikya omwa mubiiri w’erithulira. Abakaha obuwathikya obu bakendi syatswerwa ‘ng’abathunganene’ kandi bakendi syabya n’amaha “w’engebe y’erikotha” okwa kihugho. (Mt. 25:46; Erib. 7:16, 17) Ka ni kihembo ekyuwene okwa bakasighalha bathaleghulha! Omw’isighalha bathaleghulha omwa bulighe bunene n’embere okw’aho, bakaleka amena wabu iniasighalha “omo kitabu ky’engebe.”—Erib. 20:15.
Omwa buthuku obuthe bwa haali, Yesu akendi syatswera abandu ng’ababirikangania ku ni mbuli kutse mbene (Lebaya enungu 4)
5. Thuk’ighaki okwa mukya ow’esyombuli n’esyombene, kandi ni bahi abanga ghasirwa mugho?
5 Kanganaya ku wuli muthaleghulha. Omukya wa Yesu ow’esyombuli n’esyombene kutsibu-tsibu akakanaya okwa bawithe amaha aw’erisyabya okwa kihugho. Bakakanganaya erikirirya lyabu omw’iwathikya baghalha bobu Kristo omwa mubiiri w’erithulira n’eriligha buthaleghulha obusondoli bw’egurupu nyike y’abalikyethu abahakabibwa abo Yesu abirisombolha. (Mt. 24:45) Aliwe abawithe amaha aw’erighenda elhubulha nabo batholere ibahulikirira omwatsi w’erikunga owali omwa mukya oyo. Busana naki? Kundi Yesu akabya inianalhangire emikolere yabu, amalengekania wabu, n’emibughire. Nabu batholere ibakangania obuthaleghulha. Ni kwenene, Yesu mwakania okwa yindi mikya ibiri eyiri mw’erikunga erihambire okwa bahakabibwa basa. Kandi thukabana emikya eyi omwa kitabu kya Matayo sura 25. Thukanaye okwa mukya w’abasika abathebathabana mulhume ab’amenge n’abakiru.
ABASIKA ABATHEBATHABANA MULHUME AB’AMENGE N’ABAKIRU
6. Abathano b’okwa basika abathebathabana mulhume mubakangania bathi ku ni b’amenge? (Matayo 25:6-10)
6 Omwa mukya ow’abasika abathebathabana mulhume, Yesu mwakania okwa basika ikumi abathebathabana mulhume abaghenda bakayabanangana n’omuheruki. (Mt. 25:1-4) Abosi babya bawithe amaha w’erighenda n’omuheruki okwa bugheni bwiwe bw’eriherukya. Yesu mwakania okwa bathano b’okw’ibo ‘ng’ab’amenge’ n’abandi bathano ‘ng’abakiru.’ Abasika abathebathabana mulhume ab’amenge babya ibanayitheghekire kandi ibanatheghirye. Babya ibanayitheghekire erilinda omuheruki ngoku kyabya kikayithaghisibwa, nibya n’omwangasire omw’ithumbi. Kyaleka ibasa n’esyotala esiri mw’amaghutha nuku sibakoleraye omwa mwirimya. Nibya mubaheka awandi maghutha awanga bawathikirye omuheruki alyakerererawa. Neryo babya ibanayitheghekire erilhangira bathi esyotara syabu sikasighalha isinakire. (Soma Matayo 25:6-10.) Omuheruki abere akahika, abasika abathebathabana mulhume ab’amenge mubaghenda nayu okwa bugheni bw’eriherukya. Omwa nzira iyan’eyo, Abakristayo abahakabibwa ababirikangania ku banayitheghekire omw’isighalha ibanatheghirye kandi bathaleghulha erihika aho Yesu akendi syasira, bakendi syatswerwa ng’abatholere eriyiyunga okwa muheruki, Yesu, omwa Bwami bwiwe bw’elhubulha. b (Erib. 7:1-3) Kandi ibbwa abasika abathano abathebathabana mulhume abakiru?
7. Ni kyahi ekyahika okwa basika bathano abathebathabana mulhume abakiru, kandi busana naki?
7 Erithendibya ng’abasika abathebathabana mulhume ab’amenge, abathano abakiru babya isibayitheghekire omuheruki akahika. Esyotara syabu syabya isikisiya isyalima, kandi babya isibathaheka awandi maghutha. Babere baminya ngoku omuheruki akisiya iniahika, mubaghenda bakayaghulha amaghutha. Omuheruki mwahika isibali basubulha. Okwa buthuku obo, “abasika abathebathabana mulhume ababya ibanayitheghekire mubingira omwa bugheni bw’eriherukya haghuma nayu, n’olhuyi mulhwakingwa.” (Mt. 25:10) Enyuma waho, abasika abathebathabana mulhume abakiru babere bakasubulha n’erianza eryingiramo, omuheruki mwababwira athi: “Sinyibasi.” (Mt. 25:11, 12) Abasika abathebathabana mulhume aba babya isibayitheghekire erilindirira omuheruki ngoku kyabya kikayithaghisibwa. Eki kik’eghesaya abahakabibwa b’erisomoki?
8-9. N’isomo lyahi erya abahakabibwa bang’ighira okwa mukya ow’abasika abathebathabana mulhume? (Lebaya n’ekisasani.)
8 Kanganaya ku wunayitheghekire kandi ku wunatheghirye. Yesu syabya akalhaghulha athi hakendi syabya esyogurupu ibiri sy’abahakabibwa—eyangabere iyinayitheghekire erihika aho enduli y’omughulhu mubi ono yikendi syahikira n’eyithayitheghekire. Omwakanya k’ekyo, abya iniali okw’isoborera ekyanga hikire okwa bahakabibwa abangabere isibayitheghekire eriyiyinia buthaleghulha erihika okwa nduli. Bamabya isibayitheghekire, isibendi syabana ekihembo kyabu. (Yn. 14:3, 4) Eki ka ni kikulhu! Mbulha amaha wethu ni w’erisyabya elhubulha kutse okwa kihugho, ithwe bosi thutholere ithwaghendera okw’ikunga eriri omwa mukya ow’abasika abathebathabana mulhume. Obuli mughuma w’okw’ithwe atholere iniabya inianatheghirye n’erithegheka, inianayitheghekire eriyiyinia erihika okwa nduli.—Mt. 24:13.
9 Yesu abere abirikania okwa mukya w’abasika abathebathabana mulhume akahira omuwatho okwa kiyithawa eky’eribya ithunayitheghekire n’eribya ithunatheghirye, Yesu mwathasyakania okwa mukya ow’esyotalanta. Omukya oyo akakanganaya ekiyithawa ky’erikolha n’omuhwa.
Obuli mughuma w’okw’ithwe atholere inialhangira erikunga eriri omwa mukya ow’abasika abathebathabana mulhume mwa likulhu omw’ibya ithunatheghekire kandi ithunatheghirye, ithunayitheghekire eriyiyinia erihika okwa nduli (Lebaya enungu 8-9)
ESYOTALANTA
10. Abaghombe babiri mubakangania bathi ku ni bathaleghulha? (Matayo 25:19-23)
10 Omwa mukya ow’esyotalanta, Yesu mwakania okwa baghombe babiri ababya bathaleghulha okwa mukama wabu n’owundi oyuwaleghulha. (Mt. 25:14-18) Abaghombe babiri abathaleghulha mubakolha kutsibu eryongera obugaga bw’omukama wabu. Abere athali aghenda lhughendo lhuli, mwabasighira esyotalanta—syabya sente sinene kutsibu. Abaghombe babiri abathaleghulha mubakolha n’omuhwa kandi mubakolesya esyosente sya ndeke. Ekyalhwiririramu? Omukama wabu abere akasubulha, babya ibabirighobesya kabiri esyosente esyo abaha. Omukama wabu mwabasima—mub’ingira “omwa butseme bw’omukama [wabu].” (Soma Matayo 25:19-23.) Kandi ibbwa omughombe ow’akasathu? Mwakolesya athi esyosente esyo mukama wiwe amuhereraya?
11. Ni kyahi ekyahika okwa mughombe “omughatha”, kandi busana naki?
11 Omughombe w’akasathu mwathunga etalanta nguma aliwe abya “mughatha.” Mukama wiwe aby’anzire iniakolesya ndeke etalanta. Omwakanya k’ekyo, mwatsikayo omwa kithaka. Omukama abere akasubulha, omughombe oyo abya isyawithe amaghoba awanga muha. Omughombe syabya awithe amalengekania awuwene. Omwakanya k’erisaba ekighanyiro busana n’erilemwa eryongera ebindu by’omukama wiwe, omwa bukiru mwabwira omukama wiwe athi “wuli mundu oyukalire.” Omughombe oyu mwathasimwa n’omukama wiwe. Eryongera okw’ekyo, mwalhusibwako etalanta n’erithibithwako omwa nyumba y’omukama wiwe.—Mt. 25:24, 26-30.
12. Abaghombe babiri abathaleghulha bak’imanira bahi munabwire?
12 Abaghombe babiri abathaleghulha bak’imanira Abakristayo abahakabibwa abathaleghulha. Omukama, Yesu, akabakokaya “omo butseme bw’omukama [wabu].” Bakathunga ekihembo kyabu ky’elhubulha, erilhubuka ly’erimbere. (Mt. 25:21, 23; Erib. 20:5b) Okwa lhundi lhuhandi, eky’erileberyako eky’omughombe omughatha kikakunga abahakabibwa. Kithi?
13-14. N’isomo lyahi eryo abahakabibwa bak’ighira okwa mukya w’esyotalanta? (Lebaya n’ekisasani.)
13 Kanganaya ku wuli w’omuhwa. Omwa mukya w’esyotalanta, kuthya n’ow’abasika abathebathabana mulhume, Yesu abya isyali okw’ilhaghulha athi abahakabibwa balebe bangabere baghatha. Aliwe, abya akasoborera ekyangabere ku baherya omuhwa wabu. Banga lemirwe eriberererya ekyaleka ibabirikirwa n’erisombolhwa, sibanga lighirwe eryingira omwa Bwami bw’elhubulha.—2 Pet. 1:10.
14 Omukya wa Yesu owahambire okwa basika abathebathabana mulhume n’ow’esyotalanta akakanganaya ngoku Abakristayo abosi abahakabibwa batholere ibabya ibanayitheghekire kandi ibanatheghirye n’eribya b’omuhwa. Aliwe Yesu mwanabugha ekyosi-kyosi ekikakunga abahakabibwa? Ee, mwakibugha! Ebinywe bya Yesu ebiri omu Matayo 24:40, 41 nabyo bikakanaya okw’itswerwa ly’erighunzerera ery’abahakabibwa.
Yesu akatsema akalhangira abahakabibwa bakakangania ku ni bakoli b’omuhwa (Lebaya enungu 13-14) d
NINDI OYUWASYATHWALHWA?
15-16. Ebiri omu Matayo 24:40, 41 bikakanganaya bithi ekiyithawa ky’abahakabibwa erisighalha ibanatheghirye?
15 Athali akania okwa mikya isathu, Yesu mwasoborera eritswerwa ly’erighunzerera ery’abahakabibwa eryanga kanganirye nga nindi oyuwabirihamibwako. Mwahulha abalhume babiri ababya bakakolha omw’irima n’abakali babiri ababya bakakolera okwa lhuso. Abalhume babiri bakabya nga babya bakakolha mubiiri mughumerera, kuthya n’abakali, aliwe Yesu mwabugha athi omughuma “asyathwalhwa n’owundi asyasighalha.” (Soma Matayo 24:40, 41.) Neryo mwabwira abigha athi: “Busana n’ekyo, mulhole embere eritheya, kundi simwasi ekiro eky’Omukama wenyu asyasiramo.” (Mt. 24:42) Yesu mwabugha ekisosene n’ekyo enyuma w’erikania okwa mukya w’abasika abathebathabana mulhume. (Mt. 25:13) Mbwino ebinywe ebi binahambene? Bikabya nga binahambene. Abahakabibwa ab’okwenene kandi abathaleghulha basa ‘basyathwalhwa,’ Yesu iniabangirira omwa Bwami bw’elhubulha.—Yn. 14:3.
16 Kanganaya ku wunatheghirye. Omuhakabibwa wosi-wosi oyuthesighalha inianatheghirye bunyakirimu syendi syahindanibwa haghuma ‘n’abasombolhwa.’ (Mt. 24:31) Eryongera okw’ekyo, abandu ba Nyamuhanga abosi, nomubangabya ibawithe mahaki batholere ibalhangira ebinywe bya Yesu ng’erikunga ly’erilholha embere eritheya n’erisighalha bathaleghulha.
17. Busana naki sithutholere thukahangya-hangya bikahika okwa mughulhu Yehova akahakabirayamo abahakabibwa omwa mulimu wiwe abuyirire?
17 Thwabiriminya Yehova ya ndeke, neryo thukayikethera eritswera liwe. Yehova amabya inianemuhakabya abathaleghulha balebe omwa myaka ya lino-lino, ekyo sikirileka thukahangya-hangya. c Thuk’ibuka ekyo Yesu abugha okwa bakoli abasa oku saha 11 omwa ky’erileberyako kiwe ky’eririma ly’emizabibu. (Mt. 20:1-16) Abakokibawa erikolera omw’irima ly’emizabibu ekiro iky’abiritsuka mubathuhwa obuhingyi bughumerera n’obw’abalyatsuka erikolha omwangyakya. Kuthya, abahakabibwa nomubangabya imubasombolhwa mughulhu wahi, bakendi syaghenda elhubulha bamatswerwa ng’abathaleghulha.
GHENDERA OKW’IKUNGA
18-19. Ni masomo wahi n’erikunga ebyo thwamabirikaniako?
18 Thwamabirikania okuki? Okwa bawithe amaha w’erisyabya okwa kihugho kera na kera, omukya ow’esyombuli n’esyombene akakanganaya ngoku ni kikulhu erisighalha bathaleghulha oku Yehova—lino n’omwa mughulhu ow’obulighe bunene obukayasa. Okwa buthuku obukasa obo, Yesu akendi syatswera abathaleghulha ng’abatholere erihebwa “engebe y’erikotha.”—Mt. 25:46.
19 Kandi thwamabirikania okwa mikya ibiri eyikaghusa okwa bahakabibwa kw’akasali. Omwa mukya wa Yesu ow’abasika abathebathabana mulhume ab’amenge n’abakiru, abathano b’okw’ibo mubakangania ku ni b’amenge. Babya ibanatheghekire kandi ibanatheghirye, ibanayitheghekire erilinda omuheruki erihika aho akendi hikira. Aliwe abasika abathebathabana mulhume abakiru babya isibatheghekire. Neryo omuheruki mwathabalighira eryingira omwa bugheni bwiwe obw’eriherukya. Nethu thutholere ithwabya ithunayitheghekire erilinda nomuhangalhaba buthuku bungahi erihika aho Yesu akendi syalethera enduli y’omughulhu mubi ono. Kuthya, n’omwa mukya wa Yesu ow’esyotalanta, muthukakanaya okwa baghombe babiri abathaleghulha ababya b’omuhwa. Mubakolera omukama wabu ya kutsibu kandi mwabasima. Aliwe, omughombe omughatha mwathibithwako. Erisomo? Thutholere ithwayihwerya omwa mubiiri wa Yehova erihika okwa nduli. Erighunzerera, muthukakanaya ngoku abahakabibwa batholere ibasighalha ibanatheghirye nuku Yesu ‘asyabathwalha’ elhubulha erihebwa olhuhembo lhwabo. Omw’ilindirira kutsibu, abalinga aba balindirire Yesu abahindanaye haghuma elhubulha. Olhuhi lhwe Harmagedoni lhukendi syabya lhwabirihwa, bakendisyabya mughole wa Yesu w’obukali omw’iherukya ly’ekyana ky’embuli.—2 Tes. 2:1; Erib. 19:9.
20. Yehova akendi syakoleraki abakaghendera okw’ikunga liwe?
20 Nomwakine indi eritswerwa likisiya iryabya, sihali nzumwa eyangaleka ithw’ubaha. Thwamasighalha bathaleghulha, thatha wethu w’elhubulha ow’olhwanzo akendi thuha “obuthoki bunene” nuku ‘thuthoke . . . erihangana embere sy’Omughalha w’Omundu.’ (2 Kor. 4:7; Lk. 21:36) Mbulha thuwithe amaha w’erisyaghenda elhubulha kutse eribya okwa kihugho, ithukendi tsemesya Thatha wethu w’elhubulha thwamaghendera okw’ikunga eriri omwa mikya ya Yesu. Busana n’olhukogho lhunene lhwa Yehova, amena wethu akendi syabanika “iniabirisakwa omo kitabu” ky’engebe.—Dan. 12:1; Erib. 3:5.
OLHWIMBO 26 Mumwakolhakyo okw’Ingye
a Lebaya omwatsi “Ni Byahi Ebya Thwasi okw’Itswera lya Yehova ery’Obuthuku Obukasa?” omwa Akaleberyo ak’Okwakathano 2024.
b Eriminya bingyi, lebaya omwatsi “Wunemwendibya ‘Iwunatheghirye’?” omwa Akaleberyo ak’Okwakasathu 1, 2015.
d ERISOBORERA EBISASANI: Mwali wethu omuhakabibwa anemweghesya omukali oyo abana omw’ithulira ye Biblia
