Eribya abigha 70 isibabyaho Yesu akatsukisya Ekihulho ky’Omukama eky’Erigholho, sikirimanyisaya kithi abya isyathabasima kutse babya ibabirimusighania. Omwa bikuhi, Yesu anza eribya n’abakwenda biwe okwa mukonga oyo.

Abakwenda 12 n’abigha 70 abosi haghuma babya bigha ba Yesu. Yesu mwatsuka erisombolha omwa bigha biwe bangyi mw’abalhume 12, abo ahulhamo abakwenda. (Lk. 6:12-16) Abya iniane e Galilaya omughulhu “abirikira abigha ikumi n’ababiri” kandi “mwathumabo erithulha omwatsi w’obwami bwa Nyamuhanga n’erilhamya abakoni.” (Lk. 9:1-6) Enyuma waho, Yesu iniane e Yudea, “mwayisogha abandi bandu makumi alinda [70], mwathumabo mo babiri-babiri.” (Lk. 9:51; 10:1) Kwesi, Yesu aby’awithe abigha omwa myanya muthina-muthina ey’omwatsi wiwe aby’akathulhwa.

Abayuda ababya ibabiribya bigha ba Yesu babya ibakin’ibuka Ekiro eky’Erikyuruka eky’obuli mwaka, obundi haghuma n’ab’eka yabu. (Eri. 12:6-11, 17-20) Iniakisigha iniaholha, Yesu n’abakwenda biwe mubaya e Yerusalemu. Aliwe mwathabirikira abigha biwe abosi erilhua e Yudea, Galilaya ,ne Perea okwa mukonga ow’Ekiro ky’Erikyuruka. Ahathe erithika-thika, Yesu abya anzire eribya n’abakwenda biwe okwa mukonga oyu. Mwababwira athi: “Nabirisonda kutsibu-tsibu erirya Erikyuruka eri haghuma nenyu ngathe naghalhwa!”—Lk. 22:15.

Habya ihane enzumwa mbuya eyaleka iniakolha ekyo. Yesu abya iniakisiya iniaholha ‘ng’Ekyana ky’Embuli kya Nyamuhanga oyukalhusaya ebibi by’ekihugho!’ (Yn. 1:29) Ekyo kyabya ikikayabya e Yerusalemu, eyo babya bakahongera Nyamuhanga y’ebihongo. Olhuholho lhwa Yesu lhwangahere Abaisraeli b’obwiranda bunene kwilhaba obo babana omw’ithumbi balya ekyana ky’embuli bakalhua e Misiri. (1 Kor. 5:7, 8) Ekyo Yesu akolha mukyaleka abakwenda Ikumi n’Ababiri ibabya musingyi w’ekithunga ky’Ekikristayo. (Efe. 2:20-22) Ekikaswekaya, omuyi owabuyirire owe Yerusalemu abya awithe omusingyi ‘owa mabwe 12’ awasakireko ‘amena 12 w’abakwenda 12 b’Ekyana ky’Embuli.’ (Erib. 21:10-14) Omo kwenene, abakwenda abathaleghulha babya bawithe olhukwamirwa lhukulhu omw’iberererya ekighendererwa kya Nyamuhanga. Busana n’ekyo, kikayitheghereribawa eribya Yesu imwanza eribya haghuma nabu okw’Ikyuruka ly’erighunzerera kuthya n’ekyabya ikikayakwamako—Ekihulho eky’Omukama eky’Erigholho.

Abigha 70 n’abandi bigha sibabya na Yesu okwa kihulho ekyo. Nomwabine, abigha bosi abangasighere bathaleghulha bangaghasirwe omwa kya Yesu atsukisaya—Ekihulho eky’Omukama eky’Erigholho. Abosi abangabere Bakristayo abahakabibwa enyuma waho bang’ingire omwa ndaghane y’obwami, eyo Yesu abwirako abakwenda biwe omw’ithumbi eryo.—Lk. 22:29, 30