Busana Naki Ihabya Eriponangana ng’Eryo?
Busana naki omwa kihugho imwabya eriponangana erikalire ng’eryo? Eriminya ekikaleka, thutholere ithwaminya eripona nga niki, ekikaleka abandu ibasamu eripona abandi, kandi ngoku likalhandaghana.
Eripona Abandi Niki?
Eripona abandi ly’eriyowa isiwulyendana omundu mulebe kutse ekihanda ky’abandu balebe. Si ry’erihithana oko mundu habw’akathuku kake.
EKIKALEKA ABANDU IBASAMU ERIPONA ABANDI
Abandu bakasamu eripona abandi habw’esyonzumwa nyingyi. Mughulhu mungyi abandi bakapona abandi busana n’eyo balhuire butsira busana n’ebyo bakakolha. Abakaponawa bangana lhangirwa nga ni bandu babi, ab’akabi, kandi abathe banga hinduka. Bangana lhangirika ng’abahisi, abanga lethererya, kutse abakaletha ebitsibu. Abakapona abandi banganabya ibabiryaghalhwa busana n’amalhwa, obuthe bulingirirania, kutse ebindi bindu ebyabirileka ibabya mw’obuyighu.
NGOKU LIKALHANDAGHANA
Omundu angana pona abandi nibya isyali athabya nabu. Ng’eky’erileberyako, abandi bangana ghendera okwa malengekania awaghemere okwa lhuhandi lhughuma agho abahughu kutse abanywani babu bawithe okwa bandi bandu. Busana n’ekyo, eriponangana lyangana lhuaho iryalhandaghana n’abosi ab’omwa gurupu eyo ibathunga amalengekania ayo.
Thwamayitheghererya ngoku eriponangana likalhandaghana, thukaminya ekikaleka abandu bangyi ibapona abandi. Aliwe, erighunzaho eriponangana lingyi omwa kihugho, thutholere ithwaminya eriponangana nga lyatsuka lithi. Enzuko yalyo yine omwa Biblia.
E BIBLIA YIKABISULHA ENZUKO Y’ERIPONANGANA
ERIPONANGANA ERIKALIRE SI LYATSUKISIBAWA N’ABANDU. Lyatsuka omughulhu omumalaika elhubulha, oyuwahulhawamu Sitani Diabolo, ayisamambulha oku Nyamuhanga. Diabolo mwabya “mwithi” akatsuka eriyisamambulha. Iyo ‘ng’omubehi kandi ise w’amabehi,’ abirilholha embere erikulha-kulhania eriponangana n’obutsurumi. (Yoane 8:44; 1 Yoane 3:11, 12) E Biblia yikamukanayako ng’oyukalire, omuhithane, kandi mutsurumi.—Yobu 2:7; Eribisulirwa 12:9, 12, 17.
NI KYOLHO ABANDU ABATHAHIKENE ERIBYA MW’ERIPONANGANA. Omundu w’erimbere ya Adamu, mwakwama enzira ya Sitani ey’ekibi. Busana n’ekyo, abandu bosi babirisighalya ekibi n’erithendi hikana. (Abanya Roma 5:12) Mughalha wa Adamu ow’erimbere ya Kaina, mwitha mughalha wabu ya Abeli habw’erimupona. (1 Yoane 3:12) Ni kwenene, abandu bangyi bakakanganaya olhwanzo n’erikwira abandi b’obulighe. Aliwe busana n’ekibi ekyo babirisighalya, abangyi bali mw’eriyitsomana, eritsuru, n’emiyiheko—emibere eyikakulha-kulhanaya eriponangana.—2 Timoteo 3:1-5.
ERIPONANGANA LIKAKANYIRIRA BUSANA N’ERITHENDYENDANA ABANDI. Ekihugho ekya thulimu kikakulha-kulhanaya eriponangana omw’ikulha-kulhania emibere y’erithendibyamo obughanyiri n’ey’erikolha abandi bo nabi. Erithendyendana abandi, akasolholho, ebitsumi, omwagha, n’eritsandalikania ebindu bikanyirire kundi “ekihugho kyosi kiri omo buthoki bw’omubi,” Sitani Diabolo.—1 Yoane 5:19.
Aliwe, e Biblia siyiri subulira okw’ibisulha lisa enzuko y’eriponangana. Yikathubwira n’ekyanga lighunzaho.
