Omughulhu Eriponangana Likendi Syabya Isirikiriho!
Nomuthwanga lhusya omo mithima yethu mw’eripona abandi, sithwanga thoka erikakirya emikolere n’amalengekania w’abandu. Abandu abatheko lhubanza bakabya ibanemuponwa. Neryo ni kyahi ekikendi ghunziraho ighuma ekitsibu ky’eripona abandi?
Yehova Nyamuhanga musa yuwanga ghunziraho ighuma eriponangana erya thukalhangira munabwire. Ekyo kye Biblia yikalhagha yithi akendi kolha.—Emisyo 20:22.
NYAMUHANGA AKENDI SYAGHUNZAHO ENZUKO Y’ERIPONANGANA
-
1. SITANI DIABOLO. Sitani, omumalaika omuyisamambuli, yukalethaho eriponangana erya thukalhangira munabwire. Nyamuhanga akendi syathoghothya Sitani n’abosi abakapona abandi ng’iyo.—Esyonyimbo 37:38; Abanya Roma 16:20.
-
2. EKIHUGHO KYA SITANI EKYUSWIRE MW’ERIPONGANGANA. Nyamuhanga akendi syaghunzaho ebyosi ebikaleka omwa kihugho imwabya eriponangana, imwamuli abanya politiki ab’obulibathangania n’abasondoli b’amadini abakakulha-kulhanayalyo. Kandi Nyamuhanga akendi syaghunzaho eby’ekisubure ebiri mw’omururu n’obulibathangania kandi ebik’ughuthira okwa bandu.—2 Petero 3:13.
-
3. OBUTHAHIKANA BW’ABANDU. E Biblia yikasoborera yithi abandu bosi babirisighalya obuthahikana, ni bugha ambu, omubere w’erilengekania, eriyowa, n’erikolha ebithahikire. (Abanya Roma 5:12) Eribikana kw’obuyighu n’eriponangana ni kighuma ky’okwa mibere mibi eyo. Nyamuhanga akendi syawathikya abandu erikinda emibere yosi ng’eyo ey’obuthahikana nuku eriponangana lyosi lihwereho ighuma.—Isaya 54:13.
E BIBLIA YIKALHAGHANISAYA EKIHUGHO EKITHEMO ERIPONANGANA
-
1. SIHALI OYUKENDI SYAHIKWAKO OBUTHE BULINGIRIRANIA. Ekihugho kikendi syathabalhwa n’Obwami bwa Nyamuhanga, egavumente eyirimo obulingirirania kandi eyikendi syathabalha kera na kera, eyiri elhubulha. (Danieli 2:44) Akasolholho n’erithendyendana abandi sibyendisyabyaho. Nyamuhanga akendi syaghunzaho obuthe bulingirirania obwa bandu bakabana munabwire.—Luka 18:7.
-
2. OBULI MUNDU AKENDI SYABYA OMO BUHOLHO. Sihali oyukendi syaghalhwa omwa by’amalhwa kutse olhuhi. (Esyonyimbo 46:9) Ekihugho kikendi syabya mwanya owuwene omuli abandu abanzire obuholho.—Esyonyimbo 72:7.
-
3. OBULI MUNDU AKENDI SYABYAHO KERA NA KERA OMO MIBERE EYUWENE. Abandu bosi okwa kihugho bakendi syakangania abaliranwa babu b’olhwanzo lhw’okwenene. (Matayo 22:39) Sihendi syabya oyukanuba, nibya n’erinuba busana n’eryibuka ebyabya kera. (Isaya 65:17) Okwa buthuku obo, abandu abathemu eriponangana “basyayistemera omwa buholho bunene.”—Esyonyimbo 37:11.
Wukanakandira erisyabya omwa kihugho ekiri ng’ekyo? Namunabwire abandu bangyi banemw’igha eriyilhusyamo omubere w’eripona abandi omw’ighendera okwa misingyi ye Biblia. (Esyonyimbo 37:8) Ekyo kinemulhangirika omwa syomiliyoni sy’Abema ba Yehova erithimba omwa kihugho kyosi. Nomwakine indi balhuire omwa syokalikya n’emibere muthina-muthina, bakatsemera eribya omw’ihiika eriri mw’olhwanzo n’obughuma.—Isaya 2:2-4.
Abema ba Yehova bakatsemera eribwira abandi okwa ebya babirigha ebihambire okw’ighumira obuthe bulingirirania n’akathondolho. Ebya wuk’igha byangana kuwathikya lyolho-lyolho erisubya omo mwanya w’eripona abandi mw’olhwanzo. Wangana minya ngoku wanga kolongana n’abandu bosi omwa lhukeri—nibya n’abakabya nga sibali sima kutse abaponire abandi. Busana n’ekyo, na lino wangana tsema n’obughuma bwawu n’abandi ibwongera. Ekikulhu kutsibu, iwukend’igha ebya wangakolha erisyabya omo Bwami bwa Nyamuhanga omughulhu eriponangana likendi syabya isirikiriho.—Esyonyimbo 37:29.
You May Also Like
AKALEBERYO
Obwami bwa Nyamuhanga Bukendi Syakolhaki?
Yesu abya inianasi ngoku Obwami bwa Nyamuhanga y’egavumente nyisa eyanga ghunza okwa kihugho kw’ebitsibu. Ni byahi ebya Obwami obo bwabirithakolha ebikathughumaya?
