ERIPONANGANA NGOKU LYANGA HWAHO
2 | Isiwathuhulhaya
E Biblia Yithi:
“Omundu amakukolera ekibi, sumulihe ekibi. . . . Kyamathokekana, oko lhuhandi lhwenyu, mubye n’obuholho oko bandu bosi. Abanze, simuyikisaye, . . . kusangwa kisakire kithi, Omukama athi, Erikisya ni ryaghe. Nasyaliha.”—ABANYA ROMA 12:17-19.
Ekya Kikamanyisaya:
Nomwakine indi ni kya buli kiro erihithana thwamakolhwa nabi, Nyamuhanga syalyanza thukathuhulya. Omwakanya k’ekyo, akathubwira athi thumulinde kundi akisiya iniuwania obuli kindu.—Esyonyimbo 37:7, 10.
Ekya Wanga Kolha:
Abandu abathahikene bakabya bakathuhulya, bakaleka eriponangana iryongera. Busana n’ekyo, omundu amabya iniabirikuhithania kutse erikukolha nabi, isiwathuhulhaya. Ibya iwune buholho kandi yikakiraye. Okwa lhundi lhuhandi, kyanganabya kibuya erithendi lhanda oko mwatsi. (Emisyo 19:11) Okwa bundi buthuku, kyanganabya kibuya eriyahababa. Ng’eky’erileberyako, wamabya in’iwe wulyathwibawako omusango, iwangana thwamu erithwalhagho okwa polisi kutse okwa bandi b’obuthoki.
Erithuhulya ni lhuhira busa
Kandi ibbwa hamabya nga sihali enzira y’erighunziramo ekitsibu omwa buholho? Kutse ibbwa wamabya iwabirilengaho erikolha ekyosi-kyosi ekyo wanga thoka erighunzaho ekitsibu omwa buholho? Isiwathuhulhaya. Ekyo ikyangan’ongera erikalya emyatsi ya kutsibu. Omwakanya k’ekyo, ghunzaho ebikaletha eriponangana. Wangan’igha eriyikethera enzira ya Nyamuhanga y’erighunziramu ekitsibu. “Wuyikethere iyo, nayu asyakuwathikya.”—Esyonyimbo 37:3-5.
