ERIPONANGANA NGOKU LYANGA HWAHO
3 | Lhusaya omo Bulengekania Bwawu mw’Eripona Abandi
E Biblia Yithi:
“Muleke Nyamuhanga eribahindulha n’eribaha obulengekania buhya-buhya. Muthya mwasyathoka eriminya erisonda lya Nyamuhanga. Erisonda eri ni libuya, kandi likatsemesaya, kandi lihikene.”—ABANYA ROMA 12:2.
Ekya Kikamanyisaya:
Ebya thukalengekanaya bikahamba oku Nyamuhanga. (Yeremia 17:10) Isithwasubulira okw’iyihighulha okw’ibugha kutse okw’ikolha ekindu kyosi-kyosi ekikakanganaya omubere w’eripona abandi. Eripona abandi likatsuka omo bulengekania n’omwa muthima. Busana n’ekyo, thutholere ithwalhusya omo bulengekania bwethu n’omw’iyowa lyethu mw’eripona abandi eryosi-ryosi. Neryo aho imuthukendibya ithwamahinduka ndeke n’erighunzaho ebikaletha eriponangana.
Ekya Wanga Kolha:
Lebaya ndeke amalengekania n’eriyowa ebya wuwithe oko bandi—kutsibu-tsibu ab’eyindi rangyi kutse ab’ekindi kihugho. Yibulhaye: ‘Ng’abawitheko malengekaniaki? Mbwino amalengekania agho ngabawitheko aseghemere okwa bya ngabasiko? Kutse aseghemere okwa kasolholho?’ Yihighule okwa by’enganirania, esyofilimu, kutse eby’eriyitsemesya ebiri mw’eriponangana n’eby’amalhwa.
Ekinywe kya Nyamuhanga kyangana thuwathikya erilhusya omwa muthima n’omwa malengekania wethu mw’eripona abandi
Mughulhu wosi sikyolho erilebya ndeke amalengekania wethu n’eriyowa lyethu. Aliwe Ekinywe kya Nyamuhanga kyangana thuwathikya “eritswera erisonda n’amalengekania w’omuthima.” (Abaebrania 4:12) Neryo lholha embere erigha e Biblia. Linganisaya esyongangirirya syayu n’amalengekania wawu, kandi lengaho ngoku wanga thoka erihambania amalengekania wawu n’ebya Biblia yikabugha. Ekinywe kya Nyamuhanga kyangana thuwathikya erisingura omubere w’eripona abandi owabirikaghathira omo bulengekania n’omuthima wethu.—2 Abanya Korinto 10:4, 5.
