2 | “Amasako Akathuha Eriyitsingirira”
E BIBLIA YITHI:“Kusangwa ebyosi ebyasakawa erimbere omo Masako byasakawa busana n’erithukangirirya. Neryo Amasako akathuha eriyitsingirira [erithuhumulikania] n’erihanda omuthima, ithwathoka eribya n’amaha.” —ABANYA ROMA 15:4.
Ekya Kikamanyisaya
E Biblia yiri mw’emyatsi eyikahumulikanaya eyanga thuha akaghalha n’eriyiyinia ebyo thukayithagha erirwanisya amalengekania awathatholere. Kandi emyatsi ye Biblia yikathuha amaha ngoku eriyowa nabi likisiya iryahwaho.
Ngoku Eki Kyanga Wathikya
Okwa bundi buthuku ithwe bosi thukanabya omwa bitunturo; aliwe abakaghalhawa busana n’ebitunturo kutse amaghaniryo banganabya n’eriyowa nabi ery’olhughumerere. E Biblia yanga wathikya yithi?
E Biblia yikaha amalengekania mangyi awuwene awangana suba omwa mwanya w’amalengekania mabi. (Abanya Filipi 4:8) Yangan’usulya omwa bulengekania bwethu mw’amalengekania awakahumulikanaya n’erihimba awakendi thuwathikya erikakirya eriyowa lyethu.—Esyonyimbo 94:18, 19.
E Biblia yangana thuwathikya erirwanisya amalengekania w’eriyowa nga sithuwithe mughaso.—Luka 12:6, 7.
Amasako mangyi we Biblia akathukakasaya ngoku sithuli ithwibene kandi ngoku Nyamuhanga, Omuhangiki wethu, akayitheghereraya ndeke eriyowa lyethu.—Esyonyimbo 34:18; 1 Yoane 3:19, 20.
E Biblia yikalhaghanisaya yithi Nyamuhanga akendi syaghunzaho ebithuwene ebyosi ebyo thukibuka. (Isaya 65:17; Eribisulirwa 21:4) Thwamabya ithukaghalhawa busana n’amalengekania awakathuthubahisaya, ithukendi lhangira ngoku omulhaghe oyu akendi thuha amaaka w’eriyiyinia.
