Omwa Biblia muswire emyatsi y’abalhume n’abakali abonyine-nyine ababya n’eriyowa muthina-mu­thina. Thukendibya thunemusoma okwa byalholirweko byabo, thwangana banamo ababya bawithe eriyowa eriri ng’eryethu.

Ithwe bosi thukanza ithwayitheghereribwa. Aliwe eki kikayithaghisibawa kutsibu-tsibu omughulhu thukarwanisaya obulhwere bw’obwongo. Omughulhu thukasoma okwa byalholirweko bya b’omwa Biblia, ithwangana lhangira ngoku amalengekania n’eriyowa lyabu bine ng’ebyethu. Busana n’ekyo, thukaminya ngoku sithwe basa abakatuntura kandi abanemughumira amaghaniryo n’amalengekania awathuwene.

• E Biblia muli bingyi ebyabughawa n’abayowa isibakiwithe kiwathikya kandi ibahwere amaha. Wunewathayowa isiwukyanzire eribyaho? Eki mukyabya oku Musa, kuthya n’oku Eliya na Dawudi.—Emiganzo 11:14; 1 Abami 19:4; Esyonyimbo 55:4.

• E Biblia yikathubwira oko mukali oyukahulhawamo Hana oyuwabya awithe “obulighe omo muthima” kundi abya isyanga butha mwana kandi mulikyabo aby’akamusekererya kutsibu.—1 Samweli 1:6, 10.

• E Biblia yikakanaya oko mulhume oyukahulhawamo Yobu oyuwabana ebitsibu ebiri ng’ebya thukabana. Nomwakine indi abya mulhume w’erikirirya, mwaghalhwa busana n’erituntura linene kandi buthuku bughuma mwabugha athi: “Ngabonda, sinendi syakotha.”—Yobu 7:16.

Eriminya emibere abakanibweko omwa Biblia aba bathoka erirwanisiryamo ndeke amalengekania awathatholere, nethu ithwangana bana amaaka agho thukayithagha erighumira ebitunturo byethu.