Nomwakine indi e Biblia si kitabu ky’eby’emithambirire, yikaha erihabulha eryuwene kandi erikaghasa. Erihabulha eri lyangana wathikya omundu oyuwithe ebitsibu by’obwongo erighana. Thulebaye eby’erileberyako birebe.

‘Abakalire sibali n’obwagha bw’omunganga, nikwa abalhwere.’​—MATAYO 9:12.

E Biblia yikakanganaya ngoku thwangana yithagha erisondekania obuwathikya bw’abadokita. Abangyi babiribana erithekana omw’ilengaho eriminya ebihikire ebihambire okwa bulhwere bwabu bw’obwongo erighana n’erisondya obuwathikya okwa badokita abatholere.

“Ebisasayizi bikaghasira omubiri wawu.”—1 TIMOTEO 4:8, Contemporary English Version.

Erihiraho obuthuku n’akaghalha eritsomana amaghalha wawu kyangan’uwania amaghalha wawu w’obwongo. Ebindu ng’ebyo mwamuli erighe­nda-ghendania n’endegheka y’erikolha ebisasayizi, ey’emirire eyuwene, n’erighotsera othulho othukaghunza.

‘Omuthima w’eritsema ni busaki buwene; nikwa ekirimu ekibbunikire kikumaya amakuha.’—EMISYO 17:22.

Erisoma amasako we Biblia awakahimba n’eriyihiriraho ebilhubirirwa ebitholere kandi ebya wangana hikako kyangana leka iwabya iwunatsemire. Amalengekania awatholere n’eribya n’amaha byangana  leka iwabya iwune n’eriyowa eryuwene wunemughumira ebitsibu by’obwongo.

‘Amenge ali haghuma n’abakayolhobeka.’​—EMISYO 11:2.

Iwangana yisanga iwe ahabwawu isiwendi thoka erikolha obuli kindu ekya wanzire, neryo ibya iwunayitheghekire eriligha obuwathikya bw’abandi. Obundi abanywani n’abahughu bananzire erikuwathikya aliwe ibabya isibasi eky’erikolha. Leka baminye nga ni buwathikya bwahi obwa wukayithagha kutsibu-kutsibu. Kanganaya obuyitheghererya omwa bya wanzire ibakukolera, kandi mughulhu wosi sima obuwathikya obwa bakakuha.

“Munayowa ihane ekighanire okw’ingye, neryo munahika oku dokita. Mwathoka eribana obulhwere bwaghe. Eki mukyangwathikya eriligha emibere eya ngalimu n’eriminya emithambirire eyuwene eyiriho ey’eritsomaniramu ndeke amaghalha waghe.”​—Nicole, a oyulhwere obulhwere obukahulhawamo bipolar.

“Nabirilhangira ngoku ingye na mukali waghe erisoma e Biblia mughulhu wosi kyabirinyiwathikya eritsuka obuli kiro inganawithe amalengekania awatholere, kandi awakahimba. Kandi mughulhu mungyi omwa biro ebya nganemurwanisiryamu ekitsibu ekyo, erisako lirebe likanyihumulikanaya.”​—Peter, oyuwabirisisirako obwongo.

“Ikikanyikalira eribwira abandi okwa bulhwere bwaghe kundi ibukanyihemulha kutsibu. Aliwe munywani waghe w’okwa ndungu iniakanyiyitheghereraya n’erinyitsomana. Omo kwenene mwaleka ingayowa ndeke n’eriyowa isindi ingyuwene.”​—Ji-yoo, oyulhwere obulhwere bw’emirire eyithe ya buli kiro.

“E Biblia yabirinyiwathikya eribya n’amalengekania awatholere bikahika okwa mubiiri n’erilhuhuka. Amenge wayu abirinyiwathikya erighumira ebitsibu by’omw’iyowa ebikanyilyambaya.”—Timothy, oyukaghumira obulhwere bw’erilhabirirania omw’ibya muyonzo.