Wunewathalhaba omwa mibere eyiri ng’ey’abamayikaniako aba abanemurwanisya eby’obwongo erighana? Mbwino n’iwe wuwithe ekitsibu ekiri ng’ekyo, kutse ni wundi mundu oyo wukathwanira?

Wuminye ngoku siwuli iwuwene. Abangyi munabwire bakaghalhawa busana n’ekitsibu ky’obwongo erighana, obundi ibo abonyine-nyine kutse abanze babu.

Ahathe erithika-thika, thuli omwa “mighulhu eyikalire” eyinemuletha obulighe bungyi muthina-muthina. (2 Timoteo 3:1) Erisekulya lighuma likakanganaya ngoku, omwa kihugho kyosi, hakuhi mundu mughuma okwa bandu munani akaghalhawa busana n’ekitsibu ky’obwongo erighana. Omwa 2020, ekihunzo ky’ekorona (COVID-19) mukyalekire abandu abawithe amaghaniryo ibongera nga pasenti 26 n’ab’obwongo erighana ibongera erihika nga pasenti 28.

Siki erithaminya omughanzo w’abawithe ekitsibu ky’amaghalha w’obwongo, aliwe ni kikulhu kutsibu eriminya iwe n’abanzwa bawu nga mukayowa muthi kandi esyongebe syenyu nga siri sithi.

Amaghalha awuwene omwa bwongo ly’eriyowa iwune ndeke kandi obwongo ibunemukolha ndeke. Wangana ghumira ebirengekanio ebya buli kiro, iwakolha emibiiri eyikaghasa, n’eriyowa iwunathekene omo ngebe.

• SI BUSANA n’obutseke bw’omundu.

• NI bulhwere obukaletha amaghaniryo manene kandi obukatsandaya amaaka w’omundu w’erilengekania, eriyowa, n’emibere.

• Mughulhu mungyi bwangana leka ikyakalha erinywana abandi n’erikolha emibiiri ya buli kiro.

• Bwangana hamba abandu ab’emyaka yosi-yosi, ekalikya, erangyi, omubughe, edini, basomire si basomire, kutse abagaga n’abanakwa.

Iwe kutse ow’okw’iwe mwamayilhangirako ehiminyikalho ehilhangirikire omwa mibere yenyu, eribulha othulho kutse erithendirya ngoku kitholere, kutse amaghaniryo w’olhughumerere, ebitunturo, kutse obulighe, imwangana yithagha obuwathikya bw’abadokita eribawathikya eriminya enzuko y’ekitsibu n’erithambirakyo. Aliwe ni hayi aho wangabana obuwathikya?

Omulhume wa menge manene kutsibu oyuwabirithabyaho, Yesu Kristo, mwabugha athi: “Abakalire sibali n’obwagha bw’omunganga, nikwa abalhwere.” (Matayo 9:12) Abanemurwanisya ebitsibu by’obwongo abakabana emibatsi n’erithambirwa eritholere bangana kehya okwa himinyikalho hyabo kandi ikyabawathikya eribana etseme. Abali ng’abo bamayilhangira kw’ehiminyikalho ehikalire kutse ehy’olhughumerere, ni ky’amenge erithendi lindirirya erithambirwa. a

Nomwakine indi e Biblia si kitabu ky’eby’emithambirire, ebirimo byangana thuwathikya bikahika oko maghalha w’obwongo bwethu. Thukakuhira mw’omuhwa w’erisoma emyatsi eyikakwamako eyikakanganaya e Biblia nga yanga thuwathikya yithi erirwanisya ebitsibu by’obwongo.