Thwangana yibulha-bulha omunywani amaghalhwa busana n’ekitsibu ky’obwongo. Aliwe thwangana kangania nga thutsomene bungahi omw’iwathikya omunywani wethu erighumira ekitsibu ky’obwongo. Thuthi?

‘Wubye wukowa lhuba.’—Yakobo 1:19.

Enguma y’okwa syonzira esyuwene kutsibu eya thwanga wathikiryamo munywani wethu ly’erimuhulikirira akanza erikania. Isiwayowa nga wutholere erisubirya okwa buli eky’akabugha. Ligha eby’akabugha, kandi lengaho eribya iwunemumutsomana. Lholha embere erikangania obuyitheghererya, kandi yihighule okw’ighunzerera lhuba-lhuba kutse eritsweba. Wibuke ngoku angana bugha ebindu eby’athemanyisaya n’enyuma waho iniayikubyabwomo.​—Yobu 6:2, 3.

‘Muhamiraye ab’omuthima owasikerere.’​—1 ABANYA TESALONIKA 5:14.

Munywani wawu anganabya omwa maghaniryo, kutse iniabya inianemurwanisya amalengekania w’eriyowa mo wa bbule. Omw’imukakasya ku wumutsomene, iwangana muhumulikania n’erimuhimba, nomuwangabya isiwasi ekyonyine-nyine eky’eribugha.

‘Omwira akanza emighulhu yosi.’ —EMISYO 17:17.

Muwathikaye. Omwakanya k’erilengekania wuthi wunasi ngoku wanga wathikya, bulhaya ekya wanga kolha. Kyamabya ikikakalira munywani wawu eribugha eky’akayithagha, mubwire  okwa kandu kalebe ako mwanga kolha haghuma, ng’eriyibungya-bungya. Kutse wangana yihayo erimuwathikya erimughendera omwa kathale, erikolha obuyonzo, kutse ehindi hibiiri.—Abanya Galatia 6:2.

‘Yibombeke [ghumisirizaya].’ —1 ABANYA TESALONIKA 5:14.

Munywani wawu anganabya isyanzire erikania mughulhu wosi. Kakasaya munywani wawu ngoku iwukendi tsema erimuhulikirira akayowa inianzire erikania. Busana n’obulhwere bwiwe, munywani wawu iniangana bugha kutse erikolha ebindu ebikakuponesaya. Inianganathwa esyondegheka esya muwithe nayu kutse iniahithana. Ibya oyukaghumisirizaya kandi oyukayitheghereraya wukamuha obuwathikya obw’akayithagha.​—Emisyo 18:24.

“Ngalhangira indi ngabya munywani oyo angayikethera. Nomwakine indi sinanga ghunzaho ebitsibu biwe, ngalhangira indi ngahulikirira eby’akakanaya. Okwa bundi buthuku iyo eriyowa ndeke, eky’akayithagha ly’erimuhulikirira.”​—Farrah, a oyuwithe omunywani oyukaghalhawa busana n’emirire eyithe ya buli kiro n’amaghaniryo w’olhughumerere n’omuthwe erighana.

“Omughuma w’okwa banywani baghe ni w’olhukeri kandi akahimba. Mwanyikokya ewiwe okwa ky’erirya ekisihire. Omwa mibere eyithekene kandi ey’olhwanzo eyo, munathoka eribugha eriyowa lyaghe. Omo kwenene ekyo mukyanyihimba!”—Ha-eun, oyukaghalhawa busana n’omuthwe erighana.

“Ni kikulhu erighumisirizya. Mukali waghe akabya amakolha ekindu ekikanyiponesaya, ngayibukaya ngoku ekyo ni busana n’obulhwere bwiwe, nayu s’iyo. Eki kikanyiwathikaya eriyihighulha okw’ihithana kandi in’ongera erimutsomana.”—Jacob, oyo mukali wiwe akaghalhawa busana n’omuthwe erighana.

“Mukali waghe akanyiwathikaya n’erinyihumulikania kutsibu. Omughulhu ngawithe amaghaniryo manene, syalinyikaka erikolha ekindu ekya ngayowa isinganzire erikolha. Okwa bundi buthuku ekyo kikamanyisaya kithi nayu syendi kolha eby’anganzire erikolha. Ni w’embaghane busana n’omuthima wiwe w’eriyithalya okwa bindi n’ow’erihithya.”—Enrico, oyukaghalhawa busana n’amaghaniryo w’olhughumerere.