Eribya Mundu Mubuya Nina Buthekwa-buthekwa Indi Wukendibya omo Ngebe Eyuwene?
Ahabw’emyaka mingyi, abangyi babiriyowa bathi eribya mundu mubuya kandi ow’esyongeso ya nzira eyanga leka iwabya omo ngebe eyuwene. Ng’eky’erileberyako, abandu be Asia ibasikirye ebya mukangirirya omuprofesa ya Confucius (551-479 E.K.K.) abugha: “Ekya wuthanzire kikakukolhwako, isiwakikolera abandi.” *
EKYA BANGYI BAKATHWAMU ERIKOLHA
N’abangyi bikirirye bathi eribya n’emibere mibuya ky’ekyanga leka ibabya omo ngebe eyuwene. Bakalengaho erisikya abandi, eribya n’esyongeso, eriminya olhukwamirwa lhwabu omwa bulhambu, n’eribya n’obunyamuthima-thima obuwene. Linh, omukali oyuwikere e Vietnam, akabugha athi: “Mughulhu wosi ing’ikirirye indi ingye eribya mw’okwenene, kikendi syanyilethera emighisa.”
Okwa bandi esyonyikirirya syabu esy’edini sikaleka ibakolha ebibuya. Omulhume oyukahulhawamo Hsu-Yun, oyuwikere e Taiwan, akabugha athi, “Munakangiriribwa ngoku ebya mundu akakolha iniakineho by’ebikendi syaleka iniabana emighisa kutse iniaghalhwa enyuma w’eriholha.”
EBYA BIRILHWIRIRIRAMU
Ni kwenene thukabya thukakolera abandi b’ebibuya, thukaghasirawa kutsibu. Aliwe, abangyi abakalengaho erikolera abandi b’ebibuya erilhua okwa muthima babirilhangira ngoku erikolha ekyo mughulhu wosi sikirilhwiririra mw’ebya balhue bakalengekania. Shiu Ping, omukali oyuwikere e Hong Kong, akabugha athi: “Munayilhangirira ngoku abakakolha ebibuya mughulhu wosi sibali bana emighisa busana n’ekyo. Munakolha ngoku nangathoka eritsomana eka yaghe n’erikolha ebibuya. Aliwe obutheke bwaghe mubwalema na mwira waghe mwanyisighania ingye na mughalha waghe.”
Abangyi babirilhangira ngoku edini mughulhu wosi siyirileka abandu bakabya babuya. Etsuko, omukali oyuwikere e Japan, akabugha athi: “Muningira omwa by’edini kandi nabya mukulhu w’eminyethu. Munasweka ingalhangira eby’obutswatswa, erilhwira obukulhu, n’abanya dini erikolesya nabi esyosente sy’ekanisa.”
“Munakolha ngoku nangathoka eritsomana eka yaghe n’erikolha ebibuya. Aliwe obutheke bwaghe mubwalema na mwira waghe mwanyisighania ingye na mughalha waghe.”—SHIU PING, HONG KONG
Abandi abahambirire eby’edini babiriyiponera bakaghana erihembwa busana n’ebibuya ebya bakakolha. Omukali owe Vietnam ya Van, kw’ayowa athya. Akabugha athi: “Obuli kiro iningaghulha ebighuma, ebimole, n’ebyalya eriyabihongera okwa biherero by’abasokulhu waghe ababiriholha, inganawithe amaha indi ngendi syabana omughisa. Nomunanakolha ebibuya ebyosi ebi n’emirwa y’edini eyo nabya inabirikolha habw’emyaka mingyi, mwira waghe mwalhwalha obulhwere obukalire. Na mwali waghe inianemusomera omo bihugho by’eyihya, mwaholha iniakine mulere.”
Eribya mundu mubuya kyamabya isi buthekwa-buthekwa indi kikendi leka iwabya omo ngebe eyuwene, kwesi ibbwa ini kyahi? Erisubirya ekibulyo eki, thukayithagha obusondoli obw’eriyikethera—ekyanga thuha omwatsi owanga subirya ebibulyo byethu n’erithukangya enzira eyanga thukolya oko ngebe eyuwene. Obusondoli ng’obo thwanga bubana hayi?
^ enu. 2 Eriminya bingyi ebihambire okwa bya Confucius akangiriraya, lebaya esura 7, enungu 31-35, omwa kitabu Mankind’s Search for God, ekyahulhukibawa n’Abema ba Yehova kandi kine n’okwa www.pr418.com.
You May Also Like
AWAKE!
Ekikaleka Ithwayithagha Erighendera Okwa by’Esyongeso
Erikangirirya abaana bawu b’ebihano ebihambire okwa by’esyongeso kikabaha omusingyi owuwene ow’obuthuku obukasa.
