Myaka nga 3,500 eyihwere, Yehova Nyamuhanga mwabwira ababya bakamuramya ebyo batholere erikolha erisyabya omwa ngebe eyuwene: “Nabirihira embere syenyu engebe n’olhuholho, eritsumulha n’erithakira. Neryo muyisohe engebe, imwathoka eribyaho, inywe n’abaana benyu.”​—Eryibuka Ebihano 30:19.

Eribya omwa ngebe eyuwene, abandu abo babya batholere ibathwamu ndeke. Nethu ekyo kyathunatholere ithwakolha munabwire. E Biblia yikasoborera ngoku thwanga thwamu erisyabya omwa ngebe eyuwene: ‘Erianza Omwami Mukulhu Nyamuhanga wenyu, eriowa omulenge wiwe.’​—Eryibuka Ebihano 30:20.

IGHA EBIRI OMWA BIBLIA: Erianza Yehova, wutholere iwatsuka erimw’ighako erilhabira omwa Biblia. Wukendibya wukakolha ekyo, wukendi minya ngoku iyo ni Nyamuhanga w’olhwanzo oyukakusunzira ebibuya. Akabugha athi wumusabe ‘kusangwa akakutheghaya.’ (1 Petero 5:7) E Biblia yikalhaghanisaya yithi wamahiraho akaghalha eriyithunda hakuhi nayu, ‘nayu iniakendi yithunda hakuhi nawu.’​—Yakobo 4:8.

GHENDERA OKWA EBYA WUKIGHA: Erihulikirira Nyamuhanga kikamanyisaya erikwama obusondoli bwiwe bw’amenge obuli omwa Biblia. Wukendibya wukakolha ekyo, wukendi “yira enzira yawu mo mughisa kandi wasyathoka ndeke.”​—Yosua 1:8.