Abangyi bakalengekanaya bathi abasomire ndeke n’abagaga babangabya omo ngebe eyuwene. Bikirirye bathi erisoma eyunivasite kyangana leka esyokampuni, esyofamile, n’obutaka ibyaghasirwa. Kandi bangana yowa bathi erisoma ndeke kikendi leka iwabana omubiiri owuwene kandi bathi abakakolha esyosente nyingyi bakendi bana etseme.

Thalengekania okwa ebya Zhang Chen owe China abugha. Akabugha athi, “Ing’ikirirye indi erilhua omwa bunakwa, ngatholere ingathunga ediguri okwa yunivasite kandi indi omubiiri ow’aliko akasente ndeke wakaletha etseme n’erithekana omwa ngebe.”

Erithoka erithunga akaghisa k’erisyabya omo ngebe eyuwene, abangyi banzire kutsibu erighenda okwa syayunivasite esyasibwe, obundi omwa bindi bihugho. Eki kyabya kikanyirire kutsibu erihika aho ekorona yakakiraya abandu erighenda. Eripoti y’ekithongole ekya Economic Co-operation and Development eya 2012 yikabugha yithi: “Okwa bakayasomera omwa bindi bihugho, 52 okwa 100 bakalhua e Asia.”

Mughulhu mungyi ababuthi bakakolha kutsibu nuku abaana babu bathoke erighenda okwa yunivasite omwa bindi bihugho. Qixiang owe Taiwan, ak’ibuka bino: “Ababuthi baghe sibabya bagaga, aliwe mubathuthwalha ithwe bosi bbani okwa yunivasite omwa United States.” Erithoka eribathuhira, ababuthi biwe, ng’abandi bangyi, mubingira omo mabanza.

Esukuru yanganuwania engebe omwa nzira ndebe, aliwe mughulhu wosi siyirilhwiririramu ebyo abanya sukuru bakalengekanaya. Ng’eky’erileberyako, enyuma w’emyaka mingyi ibanemukolha kutsibu n’eriyingirya omo mabanza manene, abangyi sibali bana n’emibiiri eyo babya banzire. Eripoti ya Rachel Mui ow’omwa Singapore’s Business Times yikabugha yithi: “Abakaghunza eyunivasite abathawithe emibiiri bakayongera.” Jianjie, oyusomire kali-kali oyuwikere e Taiwan, akabugha athi, “Abangyi sibawithe ekindi ekya banga kolha aliwe ly’erikwama kya ligha omubiiri wosi-wosi owathahambene n’ebya basomerere.”

Abanga bana omubiiri ogho basomerere paka bangana yisanga isibathabya omwa ngebe eyo babya bakalengekania. Niran owe Thailand abere alhua okwa yunivasite omwa United Kingdom, mwabana omubiiri omwa eby’asomerere. “Ngoku nanabya ingalengekania, ediguri muyanyiwathikya eribana omubiiri owaliko omusara munene. Aliwe, omusara munene oyo mwanyiyithaghako erikolha kutsibu n’obuthuku bunene. Erighunzerera, ekampuni eyo muyabinga abangyi b’okwa bakoli bayu, naghe imwangane. Munaminya ngoku sihali omubiiri owanga thulhaho.”

Nibya n’abagaga kutse ababiribana eyikahulhawamo engebe eyuwene nabu bakabana ebitsibu by’amaka, amalhwere, n’eriyilhalikirira busana n’esyosente. Katsutoshi, owe Japan, akabugha athi, “Ingawithe ebindu binene, aliwe isingawithe etseme kundi abandi ibanyiwitheko erihale kandi ibakanyikolha-kolha nabi.” Lam, omukali oyuwikere e Vietnam, akabugha athi, “Ngalhangira abangyi bakalengaho kutsibu eribana omubiiri owuwene nuku babane obutheya, aliwe omo kwenene, ebikalhwiririramo biri mbaghane​—eriyilhalikirira, erilhwalha, erilhuha omw’iyowa, n’ebitunturo.”

Nga Franklin, abangyi babirighunzerera bathi hane bingyi eby’omughaso omwa ngebe ebilengire esukuru n’obugaga. Omwakanya k’erihwerya engebe yabu y’okwa by’obugaga, abandi bakasondekanaya engebe eyuwene omw’ilengaho eribya bandu babuya n’erikolera abandi b’ebibuya. Mbwino erikwamirira eki ni buthekwa-buthekwa indi kikendi leka iwabya omo ngebe eyuwene? Omwatsi owakakwamako akendiha eky’erisubirya.