Obusondoli bw’Eriyikethera Obwangakolya oko Ngebe Eyuwene Wanga Bweyahi?

BUGHAYA

Ngoku kiri omwa myatsi ey’ahanyuma, abandu babirilengaho erisondekania engebe eyuwene omw’iyikethera ebindu ng’ebindu eribya ibyabirisangwa byatheghekwa, esukuru, obugaga, n’eribya mundu mubuya. Aliwe erikwama ebi kiri ng’erikolesya emapu eyiwire eriya eyo wukaya. Mbwino eki kikamanyisaya kithi sihali obusondoli obw’eriyikethera obwanga thukolya okwa ngebe eyuwene? Eyihi!

OBUSONDOLI ERILHUA OK’OYULENGIREYO KUTSIBU

Thukabya thukathwamu, mughulhu mungyi thukasondaya amenge oko mundu mukulhu kandi oyuwithe amenge kw’ithulhaba. Omwa nzira iya n’eyo, thwangana bana obusondoli obwanga thukolya okwa ngebe eyuwene erilhua ok’oyukulire kutsibu kandi oyuthulengirye amenge. Erihabulha ly’Oyu lyabirithuhikako erilhabira omwa masako awabuyirire awatsuka erihulhukibwa myaka nga 3,500 eyihwere. Amasako abuyirire aya ky’ekitabu ekikahulhawamo e Biblia.

Busana naki iwayikethera e Biblia? Kundi Mwinyeyo ni Mundu oyukulire kutsibu kandi ow’amenge manene kutsibu omwa kihugho n’omwa lhubulha. Akakanibawako ‘ng’Omukulhu w’Ebiro’ owa “kera na kera.” (Danieli 7:9; Esyonyimbo 90:2) Iyo “yo wabumba olhubulha. Iyo ni Nyamuhanga oyo wabumba ekihugho.” (Isaya 45:18) Akayiminyikalhaya omwa rina liwe, Yehova.—Esyonyimbo 83:18, NWT.

Kundi e Biblia yilhuire oko Muhangiki w’abandu abosi, siyiribugha yithi ekindi kihanda kilengire ekindi. Erihabulha lyayo siririhwa okwa buthuku kandi lyabiriwathikya abandu omwa kihugho kyosi. Yineho omwa mibughe mingyi kandi yabirighabwa kutsibu kwilhaba ekindi kitabu kyosi-kyosi. * Eki kikamanyisaya kithi abandu ehosi-hosi bangana somayo kandi iyabasondolha. Ekwenene eyi yikasighika ebinywe bye Biblia bino:

‘Nyamuhanga syawithe ebithagha [akasolholho]. Nikwa omwa buli kihanda omundu oyukubaha Nyamuhanga, n’erikolha ebithunganene akalighawa nayu.’—EMIBIRI 10:34, 35.

Ngoku omubuthi oyutsomene akanaha abaana biwe b’obusondoli, Yehova Nyamuhanga ni Thatha w’olhwanzo oyukathuha obuwathikya erilhabira omwa Kinywe kiwe, e Biblia. (2 Timoteo 3:16) Wangana yikethera Ekinywe kiwe; nibya, n’iyo wathuhangika kandi anasi ebyanga thutsemesya.

OBUSONDOLI OBW’ERIYIKETHERA

Thwangana yikethera ngoku e Biblia mwa muli obusondoli obw’eriyikethera obwanga thukolya okwa ngebe eyuwene kundi myaka nga 2,000 eyihwere, muyalhaghulha ndeke-ndeke ebyangabere omwa kihugho n’emibere ya bandu ebya thunemuyilhangirira munabwire.

EBYANGABERE

‘Ekihanda kyasyalhwa n’ekindi kihanda, n’obwami bwasyalhwa n’obundi bwami. Kandi hasyabya emisiki minene-minene, kandi hasyabya enzalha, n’esyondwalha ehosi.’—LUKA 21:10, 11.

EMIBERE Y’ABANDU

‘Nikwa wuminye eki! Oko biro by’enyuma-nyuma hasyabya emighulhu ikalire. Kusangwa abandu basyabya abakayanza, n’erianza ebindu, abakayipipa, abakayiheka, abatsumi, abathiowa ababuthi babu, abathe n’ewasingya, abathesoma. Basyabya b’omuthima akalire, isibeghanyira, abakalegha abandi, ab’omwagha, abatsibu, abathanzire ekibuya, basyabya bathebya, abathetsomana, ab’omuthwe abimbire, abanzire eriyitsemesya, isibanzire Nyamuhanga.’—2 TIMOTEO 3:1-4.

Wukaghunzerera wuthiki wukalhangira ebya Biblia yalhaghulha kera bikabererera ndeke-ndeke munabwire? Ahathe erithika-thika iwukendi lighirana na Leung, owe Hong Kong, oyukabugha athi: “Amaminyereri we Biblia ahandikawa kera. Si kyanga thokekana nahake omundu erilhaghulha ebi kandi ibyabererera ndeke bithya. E Biblia yitholere eribya iyasondolibawa n’ow’amenge kutsibu kw’ithulhaba.”

E Biblia yiri mw’amaminyereri mangyi aw’abiribererera. * Amaminyereri aya akakanganaya ndeke ngoku kwenene e Biblia ni Kinywe kya Nyamuhanga. “Ingye Nyamuhanga, kandi sihali wundi nga ngye,” Yehova athya. “Erithulha eby’enduli inandi oko nzuko.” (Isaya 46:9, 10) Kwesi, hali nzumwa mbuya eyangaleka iwayikethera ebya Biblia yikabugha okwa buthuku obukasa.

OBUSONDOLI OBUKAKUGHASIRA LINO NA KERA NA KERA

Wukabya wukaghendera okwa busondoli obuli omwa Masako Abuyirire, wukaghasirawa. Thalengekania okwa by’erileberyako bino.

AMALENGEKANIA AWATHOLERE OKWA SYOSENTE N’OMUBIIRI

‘Ekighanza kighuma ekyoswire n’erithulera kyowene kwilhaba ebighanza bibiri ebyoswire n’omubiiri n’erikwamirira erihunga.’—OMUGAMBULI 4:6.

ENGEBE Y’AMAKA

‘Nenyu nibya, obuli mundu omwakathi-kathi kenyu anze mukali wiwe ngoku akayanza iyuwene; n’omukali nayu akenge iba wiwe.’—ABANYA EFESO 5:33.

ERIKOLONGANA N’ABANDI

‘Wuleke erihithana; wuleke eriaghalirwa! Siwuhahukaye omuthima, likaletha erikolha ebibi lisa.’—ESYONYIMBO 37:8.

Erighendera okwa bya Biblia yikabugha kikakughasira lino kandi kikakukyungulira erisyabya omwa ngebe eyuwene. Omwa Biblia, thukabanamu omulhaghe wa Nyamuhanga ow’obuthuku obukasa obuwene imwamuli

OBUHOLHO N’OBWIRANDA

‘Basyayitsemera omwa buholho bunene.’—ESYONYIMBO 37:11.

ABOSI ERIBYA N’AH’ERIKALHA N’EBYALYA

‘Basyahimba amanyumba n’erikalha mugho. Basyahera amalima w’ebinyu, n’erirya ebighuma byagho.’—ISAYA 65:21.

AMALHWERE KUTSE OLHUHOLHO ERIHWAHO

‘Olhuholho silhwendisyasabyaho, erisusumana kutse eririra, kutse eriaghalhwa.’—ERIBISULIRWA 21:4.

Wutholere iwakolhaki iwe eritholera erisyabya omwa ngebe ng’eyi? Soma omwatsi ow’akakwamako.

^ enu. 6 Eriminya bingyi ebihambire okw’ihindulha n’erighabwa lye Biblia, ghenda okwa www.pr418.com kandi ghenda omwa BIBLE TEACHINGS > HISTORY & THE BIBLE.

^ enu. 16 Eriminya bingyi, lebaya esura 9 ey’ekitabu The Bible—God’s Word or Man’s? ekyahulhukibawa n’Abema ba Yehova. Kine okwa www.pr418.com. Ghenda omwa LIBRARY > BOOKS & BROCHURES.

Abema ba Yehova

Obusondoli bw’Eriyikethera Obwangakolya oko Ngebe Eyuwene Wanga Bweyahi?

OBUSONDOLI ERILHUA OK’OYULENGIREYO KUTSIBU

You May Also Like

Ekwenene Eyihambire Okwa Buthuku bw’Embere

Mbwino Obusondoli bwe Biblia Bukine bw’Omughaso?

E Biblia n’Obuthuku Bwawu bw’Embere