Wukabya wukanza eriminya omundu, eky’erimbere, wukabulhaya, “Erina lyawu n’iwe ndi?” Wamabulya Nyamuhanga y’ekibulyo ekyo, iniakendi subirya athiki?

‘Ningye Yehova. Eryo lyo lina lyaghe.’​—Isaya 42:8.

Na Nyamuhanga iyuwene-wene akalithwalha mwa likulhu. Sihali oyuwalhuka Nyamuhanga y’erina eryo; ayilhukalyo. Yehova mwabugha athi: “N’eri ly’erina lyaghe erihika kera na kera eri ly’erina ly’eryibukwa lyaghe oko ndengo n’esyondengo.” (Eriluayo 3:15) Omwa Biblia, erina lya Nyamuhanga likabanikamo ngendo nyingyi kwilhaba ebitsumbi biwe nga Omuthoki w’Ebyosi, Thatha, Mukama, kutse Nyamuhanga, kandi kwilhaba n’awandi mena nga Abrahamu, Musa, Dawudi, kutse Yesu. Kandi ibbwa ekikulhu, n’isonda lya Yehova erina liwe eriminywa. E Biblia yikabugha yithi: “Abandu baminye ngoku, iwe wuk’ahulhawa mwa Yehova, n’iwe musa ow’Endatha Kutsibu okwa kihugho kyosi.”​—Esyonyimbo 83:18, NW.

Na Yesu akathwalha erina eryo mwa likulhu. Erilhabira omwa musabe ogho bangyi basi ng’owa Thatha Wethu, Yesu mwakangirirya abamukwamire erisaba Nyamuhanga bathi: “Erina lyawu libye libuyirire.” (Matayo 6:9) Na Yesu iyuwene-wene mwasaba Nyamuhanga athi: “Thatha, wulethe olhukengerwa oko lina lyawu.” (Yoane 12:28) Eriyira erina lya Nyamuhanga mwa libuyirire ky’ekya Yesu aby’ahirire embere omwa ngebe yiwe, neryo ky’ekyaleka iniabugha athi: “Nabirikuminyisya kubo, neryo nasyaswakuminyisya.”​—Yoane 17:26.

Abosi abasi Nyamuhanga bakathwalha erina liwe mwa likulhu. Abaghombe ba Nyamuhanga aba kera babya ibanasi ngoku eritheghibwa n’omulhamu wabu byabya biseghemere okwa lina lya Nyamuhanga. “Erina ly’Omwami Mukulhu [Yehova], ni nyumba yisungulikire. Omuthunganene akathibitha muyo iniabana obuholho.”  (Emisyo 18:10) “Neryo obuli mundu oyukalhakira erina ly’Omwami Mukulhu [Yehova], asyalhamibwa.” (Yoeli 2:32) E Biblia yikakanganaya ngoku erina lya Nyamuhanga lyangaminyikerye abaghombe biwe. “Kusangwa ebihanda byosi byasyalendera obuli mundu omo lina lya nyamuhanga wiwe, nethu thwasya lendera kera na kera omo lina ly’Omwami Mukulhu [Yehova], Nyamuhanga wethu.”​—Mika 4:5; Emibiri 15:14.

Omwa nzira y’embaghane, likaminyikalhaya Nyamuhanga. Abasomire kutsibu bakalighirana bathi erina Yehova likamanyisaya “Akaleka Ikyabya.” Yehova mwabugha ekya lina liwe likamanyisaya omughulhu abugha na Musa athi: “Nyine Oyu Nyine.” (Eriluayo 3:14) Ekinywe ky’Ekihebrania ekya hindulhawa mw’ebinywe ebyo kikamanyisaya “Ngendi Syabya Ekyonganzire Eribya.” Ekyo kikanganaya kithi erina lya Nyamuhanga siririsubulira okw’imuminyikalya ng’omuhangiki buyira oyukaleka ebindu byosi ibyabyaho. Erina liwe likakanganaya kw’anawithe amaaka aw’erithwamu eribya eky’anzire eribya kutse erilhangira athi ebihangikwa biwe bikabya eky’anzire bibye busana n’ekighendererwa kirebe. Nyamuhanga nomw’akan’ahulhawa omwa bitsumbi ebikakanganaya obukulhu bwiwe, amaaka n’obuthoki bwiwe, erina liwe lisa, erya Yehova, ly’erikakanganaya iyo nga nindi iyowosi n’eky’anganza eribya.

Erina eryo likakanganaya Nyamuhanga kw’athutsomene. Enzoborera y’erina lya Nyamuhanga yikakangaya ngoku mughulhu wosi akatsomana ebihangikwa biwe, imwamuli n’ithwe bandu. N’ekindi, kundi Nyamuhanga abiriminyikalya erina liwe, kikamanyisaya kithi anzire ithwamuminya. Nibya yuwayithwiramu erithubwira erina liwe, isithuli thwanabya naho kutse eryibuka thuthi ithwamubulyalyo. Kilhangirikire ngoku Nyamuhanga syanzire thukamuthwalha ng’enyamuhanga eyithuliko haali eya thuthe thwanga yitheghererya, aliwe anzire ithwamuminya ng’Omundu oyothwangana yithunda hakuhi nayu.​—Esyonyimbo 73:28.

Erikolesya erina lya Nyamuhanga kikakanganaya ku thumwanzire. Ng’eky’erileberyako, wangana bwira omundu oyo wanzire erinywana wuthi abye akakubirikira oko lina. Wangayowa wuthi omundu oyo amaghana eritsomana erina lyawu? Endambi iyikendi hika iwabulha ng’ananzire imwabya banywani. Ko kine kithya n’oku Nyamuhanga. Yehova abiribwira abandu b’erina liwe, kandi anzire ithwalikolesya. Thukabya thwamalikolesya, thukakanganaya ku thwanzire eriyithunda hakuhi nayu. Ky’ekikaleka nibya iniatsomana “abakasima erina liwe”!​—Malaki 3:16.

Eriminya erina lya Nyamuhanga ni kiika kikulhu ky’erimbere omw’imuminya. Aliwe sithutholere thukasubulira aho. Ambi ithwaminya ndeke mwinye w’erina eryo. Eriminya ng’ali athi.