Aha thwamathahika omo mwatsi ono, lyolho-lyolho, thwamabiribana eky’erisubirya okwa kibulyo ekya, Nyamuhanga Nindi? Muthukatsuka n’eriminya ngoku omwa Biblia, erina liwe n’iyo Yehova kandi ngoku omubere wiwe mukulhu lhw’olhwanzo. Kandi thwabirilebya eby’abirithakolha n’eby’akisiya iniakolha busana n’erighasirwa ly’abandu. Aliwe hakine bingyi eby’erigha oku Nyamuhanga. Aliwe iwanganabya iwukinabulha erimwighako nga lyanga kughasira lithi.

Yehova akayilhagha athi, “wamamusonda-sonda, asyabanika okw’iwe.” (1 Emyatsi y’Emigulu 28:9) Thalengekania okwa kihembo kingaha n’ekyo ekya wukendi syathunga wukasondya n’eriminya Nyamuhanga​—erithunga obwira kutse obunywani obw’ahakuhi na Yehova! (Esyonyimbo 25:14) Thalengekania oko mughaso ogho wangabana omwa bunywani ng’obo?

Obutseme bw’okwenene. Yehova asibwe nga “Nyamuhanga oyutsemire.” (1 Timoteo 1:11, NW) Eriyithunda hakuhi nayu n’erigherererya emibere yiwe kikendi kulethera obutseme bw’okwenene, obwangana kughasira omw’iyowa, omwa bulengekania, na kinyamubiri. (Esyonyimbo 33:12) Kandi wukendi thoka eribya omwa ngebe eyitsemire​—omw’iyihighulha oko mitse eyanga kutsandya, iwatsuka erikolha ebitholerene, n’eribya iwune omwa bughuma n’abandi. Iwukendi lighirana n’ebya bughawa n’omuhandiki w’esyonyimbo athi: “Ingye, ni kikulhu eribya hakuhi na Nyamuhanga.”​—Esyonyimbo 73:28.

Erikutsomana ndeke, iwe-ng’iwe. Yehova mwalhaghanisya abaghombe biwe athi: “Nasyakukangirirya enzira wangalhabamo.” (Esyonyimbo 32:8) Ekyo kikamanyisaya kithi Yehova akatsomana obuli mughombe wiwe ngoku ali, neryo iniamuwathikya erikwamana n’emibere yiwe. (Esyonyimbo 139:1, 2) Wamabiribulikira wukathunga obughuma obuwene na Yehova, iwukendi yilhangirira ngoku akutsomene mughulhu wosi.

Obuthuku bw’embere obuwene. Eryongera okw’ikuwathikya eribana engebe eyiri mw’etseme lino, Yehova akathasya kukyungulira obuthuku bw’embere obuwene kutsibu. (Isaya 48:17, 18) E Biblia yithi: “Eyi ni ngebe y’erikotha, abandu bakuminye iwe Nyamuhanga mughuma w’okwenene, n’eriminya Yesu Kristo oyo wathuma.” (Yoane 17:3) Omwa mighulhu ey’ebitsibu eno, amaha agho Nyamuhanga akathuha “akasikaya emithima yethu” ng’enaanga eyikaghumaya obwathu.​—Abaebrania 6:19.

Esi ni nzumwa nyike buyira okwa nyingyi esyanga leka ithwaminya Nyamuhanga yo ndeke n’eribya bughuma nayu. Erithasyabana bingyi, iwangana kania n’owosi-wosi okwa Bema ba Yehova kutse iwaghenda okwa muthahulha wethu we Intaneti owa jw.org.