Wamabya omwa kitsibu, ahathe erithika-thika, iwukendibya iwunasi ngoku omunywani mubuya akendi yira eky’akakolha erikuwathikya. Busana n’ekyo, abandi bakanabugha bathi Nyamuhanga si munywani wa mundu kundi bathi sibalhangire eky’amathakolha eribawathikya. Aliwe omo kwenene, Nyamuhanga abirikolha bingyi busana n’erithughasira kandi anemuyithegheka erighunzaho ebitsibu ebikathwaghalhaya munabwire. Ni byahi ebya Nyamuhanga abiriyilhagha erithukolera?

Nyamuhanga akendi syaghunzaho obubi bwosi omw’ighunzaho oyukabuletha. E Biblia yikakanganaya oyukabuletha nga nindi yikabugha yithi: “Ekihugho kyosi kiri omwa buthoki bw’omubi oyu.” (1 Yoane 5:19) N’omubi oyu si wundi, nina Sitani Diabolo oyo Yesu ahulha mwa “muthabali w’ekihugho kino.” (Yoane 12:31) Emibiiri ya Sitani okwa kihugho kino y’eyikalhua mw’ebitsibu ebikaghalhaya abandu. Nyamuhanga akendi kolhaki?

Yehova Nyamuhanga akisiya iniayira eky’akakolha erilhabira omu Mughalha wiwe, Yesu Kristo, “eriherya Sitani.” (Abaebrania 2:14; 1 Yoane 3:8) Ne Biblia yikabugha yithi Sitani nayu anasi kw’akisighalire na kathambi kake iniaheribwa. (Eribisulirwa 12:12) Nyamuhanga akendi syaghunzaho n’abandi abosi abakaletha obubi.​—Esyonyimbo 37:9; Emisyo 2:22.

Omuhangiki wethu akendisyabya abirighunzaho obubi okwa kihugho, akendi syatsukiraho eriberererya eby’atheghekere abandu n’ekihugho. Ni byahi ebya thulindirire eribererera?

Obuholho n’obutheya obwa kera na kera. “Abakayikehaya basyikalha ndeke omo kihugho, basyayitsemera omo buholho bunene.”​—Esyonyimbo 37:11.

Ebyalya bingyi ebyuwene. “Engano yibye nene omo kihugho; n’ehithwe hyusule mw’ebyalya.”​—Esyonyimbo 72:16.

Amanyumba awuwene n’emibiiri eyikatsemesaya. “Basyahimba amanyumba n’er’ikalha mugho, basyahera amalima w’ebinyu n’erirya ebighuma byagho. . . . Abayisoghawa baghe basyatsemera omubiiri w’ebyalha byabo.”​—Isaya 65:21, 22.

Wukana kandira erisyabya omwa mibere eyi? Obuthuku obuthe bwa haali eyo yikayabya ngebe eya buli kiro okwa buli mundu.

Lino sihali oyuthelhwalha n’eriholha, aliwe okwa mughulhu oyo, ekyo sikyendi syasabya. Nyamuhanga akayaberereraya omughaso w’ekihongwa kya Yesu nuku “oyukamwikiriraya syahere, nikwa abane engebe y’erikotha.” (Yoane 3:16) Niki ekikendi syalhwiririramu?

Amalhwere akendi syahwaho. “Sihali ndulhani eyikendi syabugha yithi ‘nyilhwere.’ Abandu abikeremo basyabuyirwa ebibi byabu.”​—Isaya 33:24.

Olhuholho silhwendi syasabya omwa bandu. “Asyaherya olhuholho busana na kera na kera, Omwami Mukulhu asyasangulha emisoni yosi oko musu wosi.”​—Isaya 25:8.

Abandu bakendi syabyaho kera na kera. “Olhusunzo olhukalhua oku Nyamuhanga ni ngebe y’erikotha busana n’erimathikana na Kristo Yesu Omukama wethu.”​—Abanya Roma 6:23.

Ababiriholha bakendisya lhubuka. “Hasyabya erilhubuka ly’abathunganene n’ababi.” (Emibiri 24:15) Bakendisya ghasirwa omwa kihembo ky’embanulho.

Nyamuhanga akendisya berererya ebyosi ebi by’athi?

Nyamuhanga akendisya berererya ekighendererwa kiwe busana n’abandu n’ekihugho omw’ikolesya obuthabali bw’elhubulha, omw’isi sya Yesu Kristo oyuwabirisombolhwa ng’Omuthabali wabo. (Esyonyimbo 110:1, 2) Obu bw’obuthabali kutse obwami obo Yesu abwira abigha biwe athi ibasaba bathi: “Thatha wethu oyuli elhubulha, . . . Obwami bwawu bwase.”​—Matayo 6:9, 10.

Obwami bwa Nyamuhanga bukendi syathabalha oko kihugho n’erighunzaho ebyosi ebikaletha eriaghalhwa okwa bandu. Sihali bundi buthabali obwanga ghasira abandu ng’obu! Ekyo ky’ekyaleka Yesu iniayikasa kutsibu erithulhughania “engulhu yuwene y’Obwami” omughulhu abya okwa kihugho. Kandi mwabwira n’abigha biwe erikolha ikyan’ekyo.​—Matayo 4:23; 24:14.

Busana n’olhwanzo lhunene olho Nyamuhanga awithire abandu, abiriyilhagha erisyabakolera ebyosi ebyo. Mbwino ekyo sikiri leka wukanza erimuminya n’eriyithunda hakuhi nayu? Wamathwamu erikolha ekyo, wunasi nga wanga ghasirwa wuthi? Omwatsi owakakwamako akendi soborera.