Wamanza eriminya omundu yo ndeke, ni kibuya eriminya eby’abirithathoka erikolha n’ebitsibu eby’abirisingura. Kuthya, erianza eriminya Nyamuhanga yo ndeke, wutholere iw’igha okwa by’abirikolha. Wukendibya wunemukolha ekyo, isiwasweka wukaminya ngoku eby’akolha kera bikathughasira lino n’erihamba okwa buthuku bwethu bw’embere.

Yehova Nyamuhanga ya Muhangiki Mukulhu, kandi emibere yiwe eyithelhangirawa ‘yiminyikere ndeke-ndeke omo bindu eby’ahangika.’ (Abanya Roma 1:20) ‘Abirihangika ekihugho omo buthoki bwiwe, kandi abirisikya ekihugho omo menge wiwe n’omw’iminya liwe abirisanza obuthuku.’ (Yeremia 10:12) Ebikathikaya ebyo Nyamuhanga abirihangika bikakangaya kw’athutsomene.

Thalengekania okwa lhusunzo lhungaha olho Yehova abirithuha omw’ithuhangika “omo kisosekanio kiwe.” (Enzuko 1:27) Ekyo kikamanyisaya kithi mwalhangira athi kikathokekana nethu eribya ithwangana kangania emibere yiwe oko lhulengo lhulebe. Mwathuhangika n’amaaka w’obunyakirimu, kutse amaaka w’eriyitheghererya emisingyi yiwe y’eby’esyongeso. Omughulhu thukalengaho eribighenderako, thukayowa ndeke n’eribya omwa ngebe eyitsemire. Kandi ibbwa ekikulhu, mwathuha olhusunzo lhw’eribya bughuma nayu.

Ekihugho ekya thwikereko kino kikakanganaya eriyowa liwe okw’ithwe. Omukwenda Paulo mwabugha athi Nyamuhanga “mwathayireka butsira balhangiri, iniakakolha ebibuya, [n’erithuha] embulha eyikalhua elhubulha, [n’erithuha] ebirimo ebik’eraya ebyalya n’eryusulya emithima [yethu] n’obutseme.” (Emibiri 14:17) Nyamuhanga mwahiraho ebindu bingyi muthina-muthina kwilhaba ebiyithawa by’engebe bisa, nuku thwanga tsemera engebe. Aliwe ebyosi ebi ni katotorera buyira k’okwa bingyi eby’akathusunzira.

Yehova ahangika ekihugho inianzire abandu ibasy’ikalha kukyo kera na kera. E Biblia yithi: “Mwaha ekihugho  oko bandu,” kandi mwathahangikakyo “eribya mulhalha, abumbakyo kikalhawemo.” (Esyonyimbo 115:16; Isaya 45:18) Obo eryikalhwamo na bahi kandi erihika mughulhu wahi? E Biblia yithi, “Abathunganene basyikalha omo kihugho mo buholho n’erisighalyakyo kera na kera.”​—Esyonyimbo 37:29.

Yehova mwahangika omulhume n’omukali ab’erimbere, ya Adamu na Eva, amabahira omwirima, e paradiso eyabya okwa kihugho athi ‘balimeryo, batheghayeryo.’ (Enzuko 2:8, 15) Nyamuhanga kandi mwabaha olhundi lhukwamirwa olhuwene olhuli mw’ebindu bibiri, athi: “Mubuthe mukanyirire, musulhaye ekihugho.” (Enzuko 1:28) Adamu na Eva babya ibamabirithunga amaha w’eritsemera engebe okwa kihugho kera na kera. Eky’obulighe, mubathwamu erithwa ekihano kya Nyamuhanga, neryo bamaherya omughisa w’eribya okwa “bathunganene” abakendi “syasighalya ekihugho.” Aliwe ngoku thukendi lhangira, eriyisamambulha lyabu mulithahindulha ekighendererwa kya Yehova busana n’ekihugho. Ekyo kine aho, aliwe ibbwa, thuthatsuka okwa kindi kindu ekya Yehova abirikolha.

E Biblia yasibwe ng’Ekinywe kya Nyamuhanga. Niki ekyaleka Yehova iniathuhiriraho e Biblia? Ekikulhu, anza thuthoke erimw’ighako. (Emisyo 2:1-5) Ni kwenene, e Biblia siyirisubiraya obuli kibulyo ekya thwanga yibulya oku Nyamuhanga​—kandi kwenene sihali kitabu ekyanga kolha ekyo. (Omugambuli 3:11) Aliwe ebiri omwa Biblia byangana thuwathikya eriminya Nyamuhanga. Thukamuminya omw’ilhangira emibere akathwalira mw’abandu. Thukalhangira abandu abo akatsemera n’abo akapona. (Esyonyimbo 15:1-5) Thukaminya amalengekania wiwe okwa by’esyongeso, n’okwa bindu by’ekinyamubiri. E Biblia yikathubisulira ndeke emibere ya Yehova erilhabira omwa bya Mughalha wiwe Yesu aby’akabugha n’erikolha.​—Yoane 14:9.

Eyindi nzumwa eyaleka Yehova iniathuha Ekinywe kiwe, anza thuminye ngoku thwangabya omwa ngebe eyuwene eyiwithe ekighendererwa. Erilhabira omwa Biblia, Yehova akathukangiriraya ngoku thwangabya n’eka eyitsemire, eritsemera ebya thuwithe, kandi ngoku thwanga ghumira ebitsibu. Kandi, ngoku thukendi lhangira omwa gazeti eno, e Biblia yiri mw’eby’erisubirya okwa bibulyo bikulhu-bikulhu omwa ngebe, nga bino: Busana naki hali eriaghalhwa lingyi? Bikendi syabya bithi omwa buthuku bw’embere? Yikathasya soborera Nyamuhanga ng’abirikolhaki erilhangira athi ekighendererwa kiwe ky’erimbere kikabererera.

Kwenene, omwa mibere yosi, e Biblia ni kitabu kikulhu, ekikalhua oku Nyamuhanga. Mwakolesya abalhume nga 40 erihandikakyo, kandi kyamaghunza emyaka eyilhabire omu 1,600 erisalha kyahwa. Nomwabine bithya, eyosi yikalhanda ndeke okwa muthwe mughumerere kundi Nyamuhanga yuwahandikisayayo. (2 Timoteo 3:16) Erithendibya ng’ebindi bitabu bya kera, yabirilhaba omwa myaka yosi eyo iyine mw’omwatsi wayu inianalhandikene ng’erimbere, ngoku kilhangirikire omwa mikunzo eya kera. Kandi ibbwa, e Biblia yabirisabuka okwa bosi abanza siyihindulhawe omwa yindi mibughe, erighabwa, n’erisomwa. Munabwire kya kitabu ekikaghabawa kutsibu, n’erihindulhwa omwa yindi mibughe. Eribyaho lye Biblia ni bwema obukakanganaya ngoku “ekinywa kya Nyamuhanga wethu kikahangana kera na kera.”​—Isaya 40:8.

N’ekindi kindu kibuya ekya Nyamuhanga abirikolha, ly’erithwamu athi ekighendererwa kiwe busana nethu kikabererera nomuhangabyaki. Ngoku kyanabirikanganibwa, ekighendererwa kya Nyamuhanga kiri indi abandu ib’ikalha okwa kihugho kera na kera. Aliwe Adamu na Eva babere bathwamu eriyisamambulha oku Nyamuhanga, mubaherya omughisa w’eribya n’engebe y’erikotha, kandi is’ibo basa, nibya n’okwa bangabere baana babu. E Biblia yithi, “Ebibi mubyahika munakihugho busana n’omundu mughuma, n’olhuholho mulhwingira busana n’ekibi kiwe, neryo lithya olhuholho mulhwahika oko bandu bosi kusangwa abosi mubakolha ebibi.” (Abanya Roma 5:12) Eriyisamambulha ly’omundu mulyabya iryamayikika omwa kighendererwa kya Nyamuhanga. Yehova mwakolhaki?

Yehova mwathwamu erikolha ekikasighika emibere yiwe. Mwahira olhubanza lhw’ekibi eki oku Adamu na Eva, aliwe amahira h’endegheka eyanga syasabulha abanga lhuire omo lhubutho lhwabu. Omwa menge wiwe manene, Yehova mwasangwa aminya ngoku angarwanisya ekitsibu eki, neryo aho-n’aho amathulhagho nga kikendisya thokekana kithi. (Enzuko 3:15) Enzira y’eriboholhwa oko kibi n’olhuholho yanga banikire erilhabira  omu Mughalha wa Nyamuhanga, Yesu Kristo. Ekyo kyanga kolirwe kithi?

Erithoka erilhusya abandu b’omwa bukobe bw’ekibi kya Adamu, Yehova mwathuma Yesu erisyakangirirya abandu ngoku banga bana engebe “n’eriha engebe yiwe mo bughuli busana n’abandu bangyi.” a (Matayo 20:28; Yoane 14:6) Yesu mwabya iyuwanga thoka erithongolya abandu kundi abya ahikene nga Adamu. Aliwe erithendibya nga Adamu, Yesu iyo mwaghondera Yehova erihika okwa lhuholho. Kundi Yesu sy’abya awithe lhubanza olhwanga leka iniatholera eriholha, Yehova mwamulhubukya n’erimuha engebe y’elhubulha kandi. Neryo Yesu mwabya iniamathoka erikolha ekyalema Adamu​—eky’eriha abandu b’amaha w’erisyabana engebe y’erikotha. E Biblia yithi, “Kusangwa busana n’erithendiowa ly’omundu mughuma, abandu bangyi mubayirwa mo bakolha nabi, neryo lithya busana n’eriowa ly’omundu mughuma, abandu banene basyayirwa mo bathunganene.” (Abanya Roma 5:19) Erilhabira omwa kihongwa kya Yesu, Nyamuhanga akendisya berererya ekighendererwa kiwe ky’erianza abandu ibikalha okwa kihugho kera na kera.

Thuk’igha bingyi oku Yehova omughulhu thukalhangira emibere arwanisirayamu ekitsibu ekyalhua omwa buthowa bwa Adamu. Kikathukanganaya ngoku sihali ekyanga lemesya Yehova erighunzerera eky’abiritsuka; eby’akabugha bikabererera nomuhangabyaki. (Isaya 55:11) Kandi thukasima kutsibu olhwanzo lhunene olho Yehova athuwithire. E Biblia yithi: “Olhwanzo lhwa Nyamuhanga lhwabiriminyikalha okw’ithwe omo mwatsi ono, athi Nyamuhanga mwathuma Mughalha mubuthwa mughuma wiwe omo kihugho ithwathoka eribana engebe busana nayu. Olhwanzo lhw’olhu, butsira ambu ithwe thwanza Nyamuhanga, nikwa iyo mwathwanza, mwathuma mughalha wiwe eribya mbanulho busana n’ebibi byethu.”​—1 Yoane 4:9, 10.

Kundi Nyamuhanga “mwathabalya Mughalha wiwe-wiwe, nikwa mwamusigha busana n’ithwe bosi,” kikaleka ithwakakasya ngoku Nyamuhanga akendi syathuha n’ebindi byosi eby’abiriyilhagha. (Abanya Roma 8:32) Ni byahi ebya Nyamuhanga abiriyilhagha erithukolera? Lholha embere erisoma.