Abandu bangyi bakabugha bathi bikirirye Nyamuhanga. Aliwe thayir’ibabulya Nyamuhanga nga nindi, iwukendiowa obuli mundu akasubirya kiwe. Okwa bandi, Nyamuhanga ni mutsweri oyutsurumire, oyuwanzire erisuyira abandu busana n’ebisobyo byabu. Abandi ibabugha bathi bamwasi ng’oyuwithe olhwanzo kandi ni mughanyiri, nomubanga kolha ebisosire bithi. N’abandi bakabugha bathi Nyamuhanga ali haali okw’ithwe kandi syathutsomene. Busana n’ebyosi ebithahambene ebi, kyabirileka abangyi ibabugha bathi kwesi kikalire eriminya Nyamuhanga nga nindi.

Mbwino nina kikulhu erimuminya? Ee, ni kikulhu. Eriminya Nyamuhanga yo ndeke likaleka engebe yawu iyabya n’ekighendererwa. (Emibiri 17:26-28) Wukabya wukayongera eriyithunda hakuhi na Nyamuhanga, nayu akayongera erikwanza. (Yakobo 4:8) Ibbwa ekikulhu kutsibu, eriminya Nyamuhanga ya ndeke kyangana leka iwasyathunga engebe y’erikotha.—Yoane 17:3.

Wanga minya wuthi Nyamuhanga? Thalengekania okwa mundu oyo wasi ndeke, ng’eky’erileberyako, omunywani. Obunywani bwenyu obo bwatsuka buthi? Wangabya imuwatsuka eriminya erina liwe, emibere yiwe, eby’akatsemera n’eby’aponire, kuthya n’eby’abirikolha, n’eby’anemuthegheka erikolha, n’ebindi-n’ebindi. Ekyo ky’ekyaleka iwanza omundu oyo—ni bugha ambu muwamwighako.

Kuthya, thwanganaminya Nyamuhanga thwamamwighako bino:

• ERINA LYA NYAMUHANGA N’IYO NDI?

• AWITHE MIBEREKI?

• ABIRIKOLHAKI?

• AKENDISYA KOLHAKI?

• ERIMUMINYA LYANGA KUGHASIRA LITHI?

Egazeti eno yitheghekirwe erisubirya ebibulyo ebyo. Omwatsi ono syendi subulira okw’ikuwathikya eriminya Nyamuhanga lisa, aliwe kandi wukendi minya n’eby’akutheghekere omwa buthuku bw’embere.