“Omughulhu mukasaba, simubye mukasubirira omwa binywe bithya-bithya [ebighumerere].”​—Matayo 6:7.

Yehova syalianza thukasubirira omwa misabe eyo thwabirihambira omwa muthwe kutse erisoma eyiri omwa kitabu ky’emisabe. Aliwe, anzire ithwabugha ebikalhua okwa muthima. Thalengekania nga wangayowa wuthi munywani wawu amabera erikubwira ebinywe bighumerere obuli kiro. Abanywani abanzene bakabwirana ebiri okwa muthima kandi ahathe eribisirira. Thwamasaba omwa binywe byethu, kikakanganaya ngoku Thatha wethu w’elhubulha ni munywani wethu.

“Mukabulhaya [mukasaba] neryo simwebanabyo, kusangwa mukabulhaya [mukasaba] nabi.”​—Yakobo 4:3.

Ahathe erithika-thika sithwangalengekania thuthi Nyamuhanga akendisubirya emisabe yethu thwamasaba ebindu ebyo thunasi ku athanzire thukakolha kutse thukathunga. Ng’eky’erileberyako, Yehova anganasubirya emisabe y’abakasatha emisathu y’erisathira esyosente kandi inianemuthukunga athi sithubye ab’omururu n’erisondya emighisa omwa nzira y’obukumu-kumu? (Isaya 65:11; Luka 12:15) Ahathe erithika-thika, isithwalengekanaya thuthi Yehova anganasubirya emisabe ng’eyo! Nyamuhanga erisubirya emisabe yethu thukamusaba, thutholere ithwamusaba erikwamana n’ebyo akathubwira omwa Biblia.

 “Oyukakungutha okuthwe kwiwe okw’owa ebihano, erisaba liwe ni nye.”​—Emisyo 28:9.

Omwa buthuku bwe Biblia, Nyamuhanga isyalisubiraya abakaghana ebihano biwe ebithunganene. (Isaya 1:15, 16) Syali athahinduka. (Malaki 3:6) Thwamanza Nyamuhanga asubiraye emisabe yethu, thutholere ithwakenga ebihano biwe. Kandi ibbwa, thwamabya imuthwakolha ebindu bibi kera? Mbwino ekyo kikamanyisaya kithi Yehova syanga thuhulikirira? Kwa bithe bithya! Nyamuhanga anayitheghekire erithughanyira omo lhwanzo thwamayisubamo n’erilengaho erimutsemesya.​—Emibiri 3:19.