Oku María, Raúl, Arne, n’abandi bangyi, omusabe ni kihembo ky’embaghane. Bakayowa bathi erilhabira omw’isaba, bangana kania na Nyamuhanga, ibamusima, n’erimusaba obuwathikya. N’omuthima wosi bakaligha erikakasya lye Biblia erihambire okw’isaba Nyamuhanga lino: “Eki kikaleka ithwasika embere sya Nyamuhanga, kusangwa thwamabulya [thwamasaba] kindu omw’isonda liwe, akathwowa.”​—1 Yoane 5:14.

Okwa lhundi lhuhandi, kikakalira abandu banene eriligha ebya Biblia yikabugha okw’isaba. Steve akasoborera eriyowa liwe erihambire okw’isaba: “Nabere ingahikya myaka 17, abasathu b’okwa banywani baghe mubaholera omwa syo aksidenti esithasosene. Omughuma mwaholera omo aksidenti y’ematoka, n’ababiri omo ngetse.” Steve mwakolhaki?  “Munasaba Nyamuhanga indi ambwire ekyalekire ebyosi ebi ibyabya, aliwe mwathanyisubirya. Neryo munayibulya, ‘Busana naki ingasaba?’” Emisabe eribya nga siyathasubwamo kyabirileka abangyi ibayibulya kwenene ngahane ekyanga leka ibasaba.

Hane esindi nzumwa esikaleka abandu ibathika-thikira erisaba. Abandi bakabugha bathi kundi Nyamuhanga anasi ebyosi, akabya inianasi ebya thukayithagha kutse ebitsibu byethu, neryo sihali ekyangaleka ithwamubwirabyo.

Abandi bakabugha bathi Nyamuhanga akaghana erihulikirira emisabe yabu busana n’ebisobyo ebyo bakolha kera. Jenny akabugha athi, “Ekitsibu kyaghe ekinene, kiri kithi ngayowa mo wabbule. Nabirikolha ebindu ebyabirileka ingayikubyabomo, neryo ngayibwira indi Nyamuhanga syanga nyihulikirira.”

Wukalengekanaya wuthiki okw’isaba? Wamabya iwabiriyowa wuthya kutse erithika-thikira erisaba, wangana humulikana busana n’eriminya ngoku e Biblia yangana kuwathikya. Thwangana yikethera ebya Biblia yikabugha okw’isaba; * yangana kuwathikya eribana eby’erisubirya okwa bibulyo nga bino:

• Kwenene Nyamuhanga akanowa emisabe yethu?

• Busana naki Nyamuhanga syali subiraya eyindi misabe?

• Wanga saba wuthi nuku Nyamuhanga owe emisabe yawu?

• Emisabe yanga kuwathikya yithi?