“Thatha asyabaha ekinduki ekyo mukabulhaya omo lina lyaghe.”​—Yoane 15:16.

Ebinywe bya Yesu bikakanganaya ndeke-ndeke ngoku Yehova anzire ithwamusaba erilhabira omwa lina lya Yesu Kristo, butsira omwa syosanamu, ababuyirire, abamalaika, kutse ababiriholha. Thwamasaba Nyamuhanga erilhabira omwa lina lya Yesu, thukakanganaya ku thwasi ekyo Yesu athukolera. Yesu mwabugha athi: “Sihali mundu oyukahika oku Thatha waghe athe kwingye.”​—Yoane 14:6.

“Mumubwire amalighe wenyu wosi.”​—Esyonyimbo 62:8.

Omughulhu thukasaba Yehova, thutholere ithwakania nayu ngoku thwangana kania na thatha w’olhwanzo. Omwakanya k’erisoma emisabe eyiri omwa kitabu kutse eribugha ebyo thwabirihambira omwa muthwe, thutholere ithwakania nayu omw’isikya kandi erilhua okwa muthima.

‘Thwamabulya kindu omw’isonda liwe, akathwowa.’​—1 Yoane 5:14.

Omwa Biblia, Yehova Nyamuhanga akathubwira ebyo akendi thukolera n’ebyo anzire ithwamukolera. Nyamuhanga eriligha emisabe yethu, thutholere ithwamusaba erikwamana ‘n’erisonda liwe.’ Erikolha ekyo, thutholere ithw’igha e Biblia nuku thwanga muminya ndeke. Thwamakolha ekyo, emisabe yethu iyikendimutsemesya.

Saba Ebya Wukayithagha. Thwangana saba Nyamuhanga y’ebya thukayithagha buli kiro​—ebyalya, eby’eryambalha, n’ah’erikalha. Kandi thwangana saba amenge w’erithwamu ndeke n’amaaka w’erighumira ebitsibu byethu. Thwangana saba eribya n’erikirirya, ekighanyiro, n’obuwathikya bwa Nyamuhanga.​—Luka 11:3, 4, 13; Yakobo 1:5, 17.

Sabira Abandi. Ababuthi b’olhwanzo bakatsema abaana babu bamanzana. Yehova nayu anzire abaana biwe b’okwa kihugho ibatsomanangana. Kitholere erihira abanze bethu omwa butheke, abaana bethu, abahughu bethu, n’abanywani b’omwa misabe. Omwigha Yakobo mwahandika athi; ‘thusabirane.’​—Yakobo 5:16.

Eriha Ewasingya. E Biblia yikabya yikakania oku Muhangiki wethu, yikabugha yithi: “Akakolha ebibuya n’eribaha embulha eyikalhua elhubulha, n’eribaha ebirimo ebikeraya ebyalya, n’eriusulya emithima yenyu mw’obutseme.” (Emibiri 14:17) Thukabya thukalengekania okwa byosi ebyo Nyamuhanga abirithukolera, kikaleka ithwamusima omw’isaba. Kandi nibya, thutholere ithwaha Nyamuhanga y’ewasingya omw’imwowa.​—Abanya Kolosai 3:15.

Hakanayira, ithwahwa mani kundi sithwathabana eky’erisubirya aho naho okwa misabe yethu eyikalhua okwa muthima. Mbwino ithukendi bugha thuthi Nyamuhanga syathutsomene? Eyihi nahake! Lengekanaya okwa byalholirweko bino ebikakanganaya ngoku thwanganayithagha erilholha embere erisaba.

Steve, oyo thulyakanayako omo mwatsi w’ahanyuma akabugha athi, “Ku nathalholha embere erisaba, nangabere inabirikya okwa by’engebe.” Ni kyahi ekyamuwathikaya? Mwatsuka erigha e Biblia kandi mwaminya ekiyithawa ky’erilholha embere erisaba. Steve akabugha athi: “Munasaba Nyamuhanga erimusima busana n’obuwathikya obwosi bw’olhwanzo obwa anyiha erilhabira omwa banywani baghe banzwa. Lino ngatsemire kwilhaba kera.”

Kandi ibbwa Jenny, oyuwabya akayowa Nyamuhanga nga syangamuhulikirira? Akabugha athi, “Nabere ingayowa mo wabbule kutsibu, munalemba-lemba Nyamuhanga indi anyiwathikaye ngaminye ekikaleka ingayowa indya.” Ekyo mukyamuwathikya kithi? “Erikania na Nyamuhanga kyabirileka ingathoka eriyilhangira ngoku akanyilhangira, eriminya ngoku omuthima waghe n’omwanganyitsweba, iyo syalinyitsweba. Kandi kyabirileka ingathabikyako.” Mwabirilhwiririraki? “Erisaba lyabirileka ingalhangira Yehova kw’aneho, ku ni Nyamuhanga ow’olhwanzo, oyutsomene, Thatha, kandi Munywani, oyukendibya inianeho busana naghe n’eringwathikya mughulhu wosi ingalengaho erikolha ebyo anzire.”

Lengekanaya n’okwa kyalholirweko kya Isabel. Iniane mukule, dokita wiwe mwamubwira athi omwana wiwe akendisyabuthwa n’obulema obukalire. Mwahwa amani. Nibya abandi mubamubwira bathi ihe mw’obukule obo. Akabugha athi: “Munayowa nga ngendi holha busana n’obulighe bunene okwa muthima.” Mwakolhaki? “Munasaba kandi namasaba Nyamuhanga y’obuwathikya.” Endambi muyahika amabutha omwana w’obulhume ya Gerard, aliwe ini mulema. Mbwino Isabel akayowa Nyamuhanga imwanasubirya emisabe yiwe? Ee! Omwa nziraki? Isabel akabugha athi: “Ngabya ingalhangira mughalha waghe, lino oyuwithe myaka 14, akatsemera engebe n’omo ane mulema, ngaminya ngoku iyo ni subirya eritholere ery’emisabe yaghe, omughisa munene kutsibu owa Yehova Nyamuhanga abirimba.”

Ebinywe ebikalhua okwa muthima ng’ebyo bikaleka ithwalengekania okwa binywe by’omuhandiki w’esyonyimbo bino: “Iwe Mwami Mukulhu, wukowa erilhaka ly’abandu bolho, kandi wasyasikya emithima yabu. Wasyathegha amathwe wawu eriowabo.” (Esyonyimbo 10:17) Esi ka ni nzumwa mbuya esyangaleka ithwalholha embere erisaba!

E Biblia yiri mw’emisabe mingyi ya Yesu. Ahathe erithika-thika, owasibwe kutsibu w’ow’akangiriraya abigha biwe. Angathweghesyaki?