Ekihikire n’Ekithahikire: E Biblia—Obusondoli obw’Eriyikethera
Sithwanga kakasya thuthi erithwamu lyethu okwa by’esyongeso likendi lhwiririramo ebibuya lyamabya iriseghemere okw’iyowa lyethu kutse ery’abandi lisa. E Biblia yikabisulha ekikaleka, aliwe kandi siyirisubulira aho. Yiri mw’obusondoli obw’eriyikethera obuhambire okwa by’esyongeso—ekindu kikulhu ekyanga leka ithwabya omwa ngebe eyiri mw’etseme kandi eyiwithe ekighendererwa.
OBUSONDOLI OBO THUKAYITHAGHA
Omwa Biblia, Yehova a Nyamuhanga akasoborera ngoku aby’anzire abandu ibamusondyako obusondoli butsira ibo eriyisondolha. (Yeremia 10:23) Ekyo ky’ekyabirileka iniahira omwa Biblia mw’obusondoli obuhambire okwa by’esyongeso. Anzire abandu kandi anzire iniathubalya okwa bitsibu n’amaghaniryo ebikasa busana n’erithwamu omwiteberezya. (Eryibuka Ebihano 5:29; 1 Yoane 4:8) Ekikulhu kutsibu, iyo ng’Omuhangiki wethu, awithe amenge n’eriminya ebikayithaghisibawa iyo erithuha erihabulha erihambire okwa by’esyongeso ebitholere. (Esyonyimbo 100:3; 104:24) Nomwabine, Nyamuhanga syali kaka abandu erighendera okwa bihano biwe.
Yehova mwaha omulhume n’omukali ab’erimbere, Adamu na Eva, ekyosi-kyosi ekyo bayithagha ibo eribana etseme y’okwenene. (Enzuko 1:28, 29; 2:8, 15) Kandi mwabaha ebihano eby’olhobire ebyo abya inianasi ku bakendi ghondera. Aliwe, mwaleka bayithwiremo ng’abakendi bikwama kutse eyihi. (Enzuko 2:9, 16, 17) Eky’obulighe, Adamu na Eva mubathwamu eriyisondolha omwakanya k’erighendera okwa bihano bya Nyamuhanga. (Enzuko 3:6) Ni byahi ebyabirilhwiririramo? Mbwino abandu ibanabya omwa ngebe eyuwene bamayithwiramo ekitholere eribya iky’ekihikire n’ekithahikire? Eyihi. Kyabirilhangirika ngoku erigheghena ebihano bya Nyamuhanga sikiriletha obuholho n’etseme ebya kera na kera.—Omugambuli 8:9.
E Biblia yikathuha obusondoli obwa thukayithagha nuku thuthwemu ndeke okwa by’esyongeso, mbulha thulhuire omwa mibereki. (2 Timoteo 3:16, 17; lebaya akasanduko “ Ekitabu eky’Abandu Abosi.”) Minya e Biblia nga yikakolha eki kyo yithi.
Minya bingyi ebikaleka ikyabya ikihikire ery’ahulha e Biblia mwa ‘ekinywe kya Nyamuhanga.’—1 Abanya Tesalonika 2:13. Lebaya evidiyo Omwinye Biblia Nindi? okwa jw.org.
NGOKU E BIBLIA YIKAKANGANAYA OBUSONDOLI BWA NYAMUHANGA
E Biblia yiri mw’emyatsi eyikakanganaya ngoku Yehova aby’akakolongana n’abandu erilhua kera. Ebirimo bikaleka ithwaminya ebya Nyamuhanga akalhangira mwa bihikire n’ebiwire, ebyanga thughasira n’ebyanga thukolha nabi. (Esyonyimbo 19:7, 11) Thukaminya emisingyi eyithehwa okwa buthuku eyikathuwathikaya erithwamu ndeke bikahika okwa by’esyongeso omwa ngebe yethu.
Ngahathya, thalengekania okw’ihabulha eriri omwa Emisyo 13:20: “Wulendere haghuma n’abandu b’amenge nawu wasyabya w’amenge; nikwa omwira w’abakiru asyakwa.” Omusingyi oyo akinakolha namunabwire ngoku anabya akakolha kera. Omwa Biblia mwoswire amenge n’emisingyi y’omughaso ng’eyo.—Lebaya akasanduko “ Amenge we Biblia Awathehwa Okwa Buthuku.”
Aliwe iwangana yibulya, ‘Nanga kakasya indi ngoku obusondoli bwe Biblia obuhambire okwa by’esyongeso bukinakolha namunabwire?’ Omwatsi owakakwamako akendi kania okwa byalholirweko.
a Yehova ly’erina lya Nyamuhanga.—Esyonyimbo 83:18, NWT.
