Ekihikire n’Ekithahikire: Ebyo Abangyi Bakaghenderako Erithwamu
Hakuhi obuli mundu akaligha ngoku hane ebindu birebe ebikakolhawa ebinalhangirikire ndeke ku bihikire kutse ku biwire. Ngahathya, er’itha, erikolha okwa bandi kw’emyatsi y’engyingo kinyamakara, n’erikolha okwa baana kw’eby’obuthundirya bighanirwe ehosi, aliwe obulingirirania, olhukeri, n’eritsomana abandi bilighirwe ehosi. Aliwe okwa bindi bindu ebihambire okwa ngebe—nibya n’okwa bihambire okwa myatsi y’engyingo, eribya mw’okwenene, kutse erilembera abaana—abangyi bikirirye bathi sihali erithwamu erihikire kutse erithahikire. Bakalengekanaya bathi erithwamu lyosi-lyosi okw’ebi likalighawa. Mughulhu mungyi abandu bakathwamu erikwamana n’eriyowa lyabu kutse eriyowa ly’abandi okwa mwatsi. Mbwino ekyo kinatholere?
NGOKU THUKAYOWA
Mughulhu mungyi eriyowa lyethu ly’erikathusondolha, kutse eriyowa ery’omwakathi erihambire okwa kihikire n’ekithahikire, eryasibwe mwa obunyamuthima-thima bwethu. (Abanya Roma 2:14, 15) Nibya n’eritsuka bulere, abaana bangana minyerera embaghane eyiri ahakathi-kathi k’emitse eyuwene n’eyithuwene kandi ibayowa nabi bamakolha ekithahikire. Obuthuku bunemulhaba, emibere eyo thuk’igha erilhua okwa b’efamile yethu, ab’olhulengo lhwethu, abahalimu, abataka, ab’edini, n’eby’ekalikya yangana kangirirya obunyamuthima-thima bwethu. Thukabya thukathwamu, obunyamuthima-thima bwethu bukathubwira ebya thwamathwamu nga binahambene n’emibere eyo thwabir’igha kutse eyihi.
Amalengekania agho thuwithe okwa kihikire n’ekithahikire angana leka ithwakangania abandi b’eritsomana, erisima, obulingirirania, n’erikwira abandi b’obulighe. Kandi anganaleka ithuthakolha ekikendi ponesya abo thutsomene kutse ekikendi leka ithwayibulha-bulha, ithwahemuka, kutse eriyowa nabi.
Mbwino mughulhu wosi thunatholere ithwayikethera eriyowa lyethu? Garrick iniakine mulere mwabya omwa ngebe ndebe. Akabugha athi, “Iningayihiriraho eby’erighenderako.” Aliwe, mwalhangira erikolha iyo eby’aby’akalengekania athi by’ebihikire isimuthalhwiririra ebibuya. Akabugha athi mwabya omwa ngebe “eyithemo etseme kundi yabya
mw’eby’obusingiri, erinywa ebibatsi ebikathamiraya, obuthamiri, n’eby’obwithi binene.”NGOKU ABANDI BAKAYOWA
Eryongera okw’iyowa lyethu, mughulhu mungyi thukasondolhawa n’amalengekania agho abandi banga thunga okw’ithwamu lyethu. Ekyo kyangana leka ithwaghasirwa omo bya basi n’amenge wabo. Ab’efamile yethu, abanywani, n’abataka bakathusikaya thukakolha ebyo bakalengekanaya bathi by’ebihikire.
Mbwino mughulhu wosi thunatholere ithwayikethera eriyowa ly’abandi? Omusika ya Priscila iniakakolha ebyo ab’olhulengo lhwiwe babya bakakolha kandi mwasangira omwa by’obusingiri iniakine mulere. Nomwabine mwalhangira ngoku erikolha ebyo abandi bakalhangira nga by’ebihikire mukithamulethera etseme. Mwabugha athi: “Erighendera okwa by’abandi bakakolha mukithanyirethera eriyowa ndeke. Mukyaleka ingakolha eby’obukiru n’ebyanga hira engebe y’omwa kabi.”
MBWINO HANE ENZIRA EYUWENE EYANGA KUWATHIKYA ERITHWAMU NDEKE?
Thukabya thukathwamu okwa kihikire n’ekithahikire, eriyowa lyethu n’ery’abandi byangana thuwathikya. Aliwe ebyo bisa mughulhu wosi sibirilhwiririramo ebibuya. Ithwanganabana ebitsibu busana n’obukiru bwethu, erithendi lhangira ebyanga lhwiririra omw’ithwamu lyethu ebyanga thuhambako nabi kutse n’abandi. (Emisyo 14:12) Kandi sibuthekwa-buthekwa indi amalengekania wethu n’aw’abandi okwa kihikire anganathughasira kutse indi syangahinduka. Kundi nibya, eyindi mitse eyabya yikalhangirwa mwa mibi, lino yikalighawa, n’emibere eyabya yikalhangirwa ng’eyikalighawa, lino yikalhangirawa ng’eyithatholere.
Mbwino mughulhu wosi thunatholere ithwayikethera amalengekania w’abandi?
Mbwino hane obusondoli obuwene obwanga thuwathikya thukathwamu okwa kihikire n’ekithahikire? Mbwino hane eby’erighenderako eby’esyongeso ebya thwanga kwama munabwire ebithendi syathulhabirya ahisi omwa myaka eyikasa?
Eky’obutseme, hane aho thwanga lhusya obusondoli obw’eriyikethera mughulhu wosi obuhambire okwa by’esyongeso obwanga wathikya obuli mundu ehosi-hosi. Omwatsi owakakwamako akendi kangania aho thwangabana obusondoli obw’eriyikethera thukathwamu okwa kihikire n’ekithahikire.