Ekihikire n’Ekithahikire: Erithwamu Erya Wutholere Iwakolha
Ebihano by’esyongeso ebya thukathwamu erighenderako bikahamba kutsibu okwa ngebe yethu. Yehova Nyamuhanga anasi ekyo. Eki ky’ekikaleka inianza thughendere okwa bihano biwe.
Yehova anzire ithwabana obuholho n’etseme omwa ngebe.
“Omwami Mukulhu, omuthongolya wawu, Oyubuyirire wa Israeli, akabugha athi, ingye indi Mwami Mukulhu Nyamuhanga wawu, oyukakukangiriraya wubane endundi, oyukakusondolha omwa nzira eyo wangalenderamo. Kumbe wahulikirira ebihano byaghe! Neryo obuholho bwawu nga bwabiribya ng’olhusi, n’erithunganene lyawu ng’ebisunda by’omwa ngetse.”—Isaya 48:17, 18.
Iyo ng’Omuhangiki wethu, Nyamuhanga anasi enzira eyuwene ey’erithwaliramu engebe yethu. Anzire ithwakwama obusondoli bwiwe kundi bukendi thughasira. Thukabya thukaghendera okwa bihano bya Nyamuhanga, sithuliyilhalikirira erithwamu lyethu ngalinemwendi thughasira. Mughulhu wosi ithukend’ithwamu ndeke, ekindu ekikendi thukolya okwa buholho n’etseme.
Yehova syalibugha athi thukole ekithekyanga thokekana.
“Ekihano eki ekyo ngabahana munabwire, sikibalemire, kutse sikiri haali.”—Eryibuka Ebihano 30:11.
Yehova akayilhagha eriwathikya abakathwamu erighendera okwa bihano biwe.
“Ingye indi Mwami Mukulhu, Nyamuhanga wenyu, oyukakuwathirira omo byalha byawu by’amali, oyukakubwira athi, siwubahe, ngendi kuwathikya.”—Isaya 41:13.
Thwangana thoka erighendera okwa bihano bya Nyamuhanga eby’esyongeso kundi akendi thuwathikya. Anganathuwathikya erilhabira omwa Kinywe kiwe, e Biblia, ekikathuhumulikanaya n’erithuha amaha.
Esyomiliyoni sy’abandu erithimba omwa kihugho kyosi babirilhangira ngoku erighendera okwa bihano bye Biblia kyabiryuwania esyongebe syabu. Busana naki iwuth’igha bingyi okw’ihabulha eryuwene eryo e Biblia yikaha? Wangana tsuka omw’igha ebrokyuwa eyiseghemere okwa Biblia eya Tsemera Engebe Kera na Kera! eyiri okwa jw.org. Muli amasomo ano:
-
E Biblia Yanga Kuwathikya Yithi?
-
E Biblia Yikaha Amaha
-
Wangana Yikethera e Biblia?
Wukendibya wukayithendya okwa Kinywe kya Nyamuhanga e Biblia, wukendi minya ngoku siyihwere okwa buthuku; ‘yikakotha busana n’emighulhu yosi.’ (Esyonyimbo 111:8) Erighendera okwa bihano by’esyongeso ebiri omwa Biblia y’engebe eyuwene eyathutholere ithwabyamu. Aliwe Nyamuhanga syendi thukaka erikolha ekyo. (Eryibuka Ebihano 30:19, 20; Yosua 24:15) N’ithwamu ly’obuli mundu.