Ekihikire n’Ekithahikire: Obusondoli Obukakolha
Thalengekania okwa bindu bbini omwa ngebe ebyo esyomiliyoni sy’abandu babirilhangiriramo ngoku obusondoli bwe Biblia bukakolha kandi ku bwanganayiketherwa.
1. Obutheke
Abandu bawithe amalengekania muthina-muthina awahambire okwa butheke n’okwa bikayithaghisibawa eribya n’obutheke obuli mw’etseme.
E BIBLIA YIKABUGHA YITHI: “Obuli mundu omwakathi-kathi kenyu anze mukali wiwe ngoku akayanza iyuwene; n’omukali nayu akenge iba wiwe.”—Abanya Efeso 5:33.
EKYA KIKAMANYISAYA: Obutheke ni ndegheka eyo Nyamuhanga atsukisaya, neryo anasi ebikayithaghisibawa okwa abathahenie eribana etseme. (Mariko 10:6-9) Obutseme bukabanika omughulhu abali omwa butheke bakahira amalengekania okwa ebya obuli mundu angakolha erighumya obutheke butsira okwa ebya obuli mundu angabanamo. Omulhume oyuwanzire mukali wiwe akakikanganaya omwa mibere akamuthwaliramu n’erimutsomana. N’omukali oyusikirye mwira wiwe akakikanganaya omwa eby’akabugha n’omwa mikolere.
OBUSONDOLI BWE BIBLIA BUKAKOLHA: Quang na Thi, erilhua e Vietnam, ibakayowa bathi sibendi syabana etseme omwa butheke bwabu. Mughulhu mungyi Quang iniakatsuruma-tsuruma. Akabugha athi: “Isindi tsomana eriyowa lya Thi kandi mughulhu mungyi iniakamulhumaya.” Thi mwanza erithwa embeta. Akabugha athi: “Munayowa isinangathasyayikethera mwira waghe kutse erimusikya.”
Erighunzerera, Quang na Thi mubigha ebya Biblia yikakangiriraya kandi ngoku banga kolesya ebiri omwa Abanya Efeso 5:33 omwa butheke bwabu. Quang akabugha athi: “Omulhondo oyu mwangwathikya erilhangira ekiyithawa ky’eribya n’olhukeri n’erileka Thi ayowe ingamwanzire kandi ku ngatsomene ebiyithawa biwe, kinyamubiri, n’omw’iyowa. Namakolha ebyo, akanyanza n’erinyisikya.” Na Thi akabugha athi, “Ngabya ingongera erighendera okwa biri omwa Abanya Efeso 5:33 n’erikangania ku ngasikirye mwira waghe, kw’akan’ongera athya erileka ingayowa inganzibirwe, ingane omwa butheya, n’omwa buholho.”
Eriminya bingyi ebihambire okwa butheke, soma e Awake! Na. 2 2018, eyiwithe omuthwe “Esyombitha 12 Esy’Amaka Awabirithoka” okwa jw.org.
2. Ngoku Thutholere Ithwathwalha Abandi
Mughulhu mungyi abandu bakakolha bandi bo nabi busana n’erangyi yabo, ekihanda, emisosere, edini, kutse erithwamu lyabu okwa by’emyatsi y’engyingo.
E BIBLIA YIKABUGHA YITHI: “Musikaye abandu bosi.”—1 Petero 2:17.
EKYA KIKAMANYISAYA: E Biblia siyirisighika eky’erisolholha abandu busana n’erangyi, ekihanda, kutse ab’olhubutho olhusosene erikolhanako emyatsi y’engyingo. Omwakanya k’ekyo, yikathuhira mw’omuhwa w’erisikya abandu bosi, mbulha ni b’erangyiki, ekalikya, kutse kitsumbiki. (Emibiri 10:34) Nomuthwanga ghana erilighirana n’ebyo bandi bikirirye kutse emibere bakakoleramo ebindu, thukakolongana nabo omwa lhukeri n’omw’isikya.—Matayo 7:12.
OBUSONDOLI BWE BIBLIA BUKAKOLHA: Daniel mwakangiriribwa erilhangira bandu abe Asia ng’esyonzighu sy’ekihugho kyabo. Mwahika okwa kiika ky’eripona owosi-wosi owe Asia kandi mughulhu mungyi iniakabatsuma embere sy’abandu. Daniel akabugha athi: “Iningayilhwirako omw’ibugha indi ‘ni muthima w’eryanza ekihugho kyethu.’ Nibya isindi lengekanaya indi amalengekania waghe kutse ebya ngakolha biwire.”
Erighunzerera Danieli mwigha ebya Biblia yikakangiriraya. Daniel akabugha athi: “Munabya w’erihindulir’ighuma amalengekania waghe. Munabya w’erilhangira abandu ngoku Nyamuhanga akabalhangira—ngoku ithwe bosi thuli baghuma nomuthwangabya ithulhuire hayi.” Daniel akasoborera ng’akayowa athi lino akabanangana n’abandu. Akabugha athi: “Mughulhu mungyi sindi lengekanaya n’okwa ey’abalhuire. Lino nganzire abandu abosi kandi ngawithe abanywani b’okwa ndungu erithimba omwa kihugho kyosi.”
Eriminya bingyi, soma e Awake! Na. 3 2020, eyiwithe omuthwe “Mbwino Hane Ekyanga Ghunzaho Akasolholho?” okwa jw.org.
3. Esyosente
Abandu bangyi bakasondekanaya obugaga nuku batseme n’eribana engebe eyuwene.
E BIBLIA YIKABUGHA YITHI: “Amenge ni butheya, ngoku esyofranka ni butheya. Nikwa endundi y’eriminya ni menge aw’akatheghaya engebe y’oyuwitheyo.”—Omugambuli 7:12.
EKYA KIKAMANYISAYA: Thukayithagha esyosente, aliwe si buthekwa-buthekwa indi sikendi thulethera etseme kutse erisyabya ndeke obuthuku bw’embere. (Emisyo 18:11; 23:4, 5) Omwakanya k’ekyo, etseme y’okwenene n’obuthuku bw’embere obuwene biseghemere okw’ighendera okwa menge wa Nyamuhanga awali omwa Biblia.—1 Timoteo 6:17-19.
OBUSONDOLI BWE BIBLIA BUKAKOLHA: Cardo, omulhume e Indonesia, mwahwerya amalengekania okw’isondekania obugaga. Akabugha athi: “Ingawithe ebyo bandu bangyi babya bakakandira. Ininga bungira omwa bihugho, erighulha ebindu ebyuwene-wene, esyomatoka, n’esyonyumba.” Obugaga obo mubuthaghunza buthuku. Cardo akabugha athi: “Mubanyithebererya, neryo esyosente esyosi esyonabya inabirinubira omwa myaka yosi eyo syamahwaho omw’ikohya n’erilibulha. Nabya inabirihwerya engebe yaghe omw’ikwamirira eby’obugaga, aliwe erighunzerera, munasighalha omw’iyibulha-bulha namayowa nga singwithe mughaso, n’eriyiponera.”
Cardo mwatsuka erighendera okw’ihabulha lye Biblia erihambire okwa syosente. Syakihweraya akaghalha kiwe okw’isondekania eby’obugaga aliwe abirithwamu eribya omwa ngebe nyolho. Akabugha athi: “Ekindu ky’obughuli kandi ekya kera na kera bw’obunyakirimu bwaghe. Lino ngaghotsera ndeke kandi ngatsemire kutsibu.”
Eriminya bingyi okwa bya Biblia yikabugha okwa syosente, soma omwatsi “Mbwino Esukuru n’Esyosente Ni Buthekwa-buthekwa Indi Bikendi Leka Iwabya omo Ngebe Eyuwene?” omwa Akaleberyo Na. 3 2021, okwa jw.org.
4. Emyatsi y’Engyingo
Abandu bawithe amalengekania muthina-muthina okwa byanga liwa okwa by’emyatsi y’engyingo.
E BIBLIA YIKABUGHA YITHI: ‘Wuyihighulhe okwa by’obusingiri. Obuli mundu aminye ngoku angakakirya omubiri wiwe omwa nzira eyibuyirire n’ey’ekitsumbi, butsira omwa mururu, n’esyongumbu nyibi sy’erikolha emyatsi y’engyingo ng’ebihanda ebithasi Nyamuhanga.’—1 Abanya Tesalonika 4:3-5, NWT.
EKYA KIKAMANYISAYA: E Biblia yikahira h’olhubibi bikahika okw’ikangania esyongumbu syethu sy’emyatsi y’engyingo. Ekinywe obusingiri mwamuli oburaghane, obumalaya, abathathahenie erikolha emyatsi y’engyingo, ab’olhubutho olhusosene erikolhanako emyatsi y’engyingo, n’erikolha emyatsi y’engyingo n’ebisoro. (1 Abanya Korinto 6:9, 10) Emyatsi y’engyingo ni kihembo erilhua oku Nyamuhanga ekyo anzire omulhume n’omukali abathahenie basa ibatsemera.—Emisyo 5:18, 19.
OBUSONDOLI BWE BIBLIA BUKAKOLHA: Omukali owe Australia ya Kylie akabugha athi: “Ng’omuhuru, iningalengekanaya indi namakolha emyatsi y’engyingo iningendi yowa inganzibirwe n’eribya omwa butheya. Aliwe ekyo mukithabya. Munayowa nabi n’eribbunika muthima.”
Enyuma waho, Kylie mwigha ebya Biblia yikabugha okwa myatsi y’engyingo kandi amabighenderako. Akabugha athi: “Nabirilhangira ngoku ebihano bya Nyamuhanga biriho erithutheya okwa bulhumi. Lino ngayowa buholho kandi inganzibirwe kundi ngakolha emyatsi ngoku Yehova anzire ithwakolhayo. Erighendera okwa busondoli bwe Biblia kyabirinyitheya okwa bulhumi bunene!”
Eriminya bingyi, soma omwatsi “E Biblia Yikabugha Yithiki Okwa Mulhume n’Omukali Eribya Haghuma Isibathahenie?” okwa jw.org.
Omuhangiki wethu akaleka ithwaminya ekihikire n’ekithahikire. Nomwakine indi mughulhu wosi sikyolho erighendera okwa busondoli bwiwe obuhambire okwa by’esyongeso, aliwe eribighendera ko likaghasa. Thwangana yikethera ngoku mughulhu wosi kikendi thulethera etseme eya kera na kera.
