Omo mwatsi w’erihangika owali omwa Biblia omwa kitabu ky’Enzuko, Nyamuhanga akabwira omundu w’erimbere, Adamu, athi: “Oko bighuma byosi by’obuli muthi omw’irima wanganalya kubyo. Nikwa oko bighuma by’omuthi w’eriminya ekibi n’ekibuya, susyerya kubyo. Kusangwa oko kiro wasyalya kubyo, wasyaholha kundu.” (Enzuko 2:16, 17) Enzumwa ngulhu y’ebinywe ebyo yabya indi Adamu kw’owa ekihano kya Nyamuhanga ekyo, syanga holire, angabere omwa Edeni kera na kera.

Eky’obulighe, omwakanya k’erithwamu eribyaho kera na kera, Adamu mwathwamu erigheghena ekihano kya Nyamuhanga, amalya ekighuma ekya mukali wiwe Eva amuha. (Enzuko 3:1-6) Ebyalhwiririra omwa buth’owa obo by’ebikinathwaghalhaya na munabwire. Omukwenda Paulo mwakibughako athi: “Ebibi mubyahika munakihugho busana n’omundu mughuma, neryo lithya olhuholho mulhwahika oko bandu abosi kusangwa abosi mubakolha ebibi.” (Abanya Roma 5:12) “Omundu mughuma” oyo abya ini Adamu. Ekibi ekya kolhawa ky’ekyahi, kandi busana naki mukyaletha olhuholho?

Ekibi, ky’ekya Adamu akolha, erikighenderera erigheghena ekihano kya Nyamuhanga. (1 Yoane 3:4) Kandi Nyamuhanga abya iniabiribwira Adamu ngoku ekyo ikikendi syalhua mw’eriholha. Aliwe Adamu, n’abosi abangalhuire omo lhubutho lhwiwe, ku batheya ekihano kya Yehova, sibangabere kwa kibi kandi sibanga lholire oko lhuholho. Kundi Nyamuhanga syahangika abandu athi bakendi syaholha​—babya b’eribyaho, kandi kera na kera.

 Thwabirikilhangira ndeke-ndeke ngoku olhuholho lhwabirihika “oko bandu abosi,” ngoku e Biblia yikanabugha. Aliwe nina kwenene indi hane akandu akakathulhuamu thwabiriholha? Abangyi ku basi bathya​—bathi thuli mw’akalimu akatheholha. Aliwe eki, ikikendi manyisya kithi Nyamuhanga mwatheba Adamu. Thukabugha thuthya busana naki? Kundi thwamabya ithukanalhua mw’akandu akatheholha, ikay’ikalha ehandi, neryo kwesi ekya Nyamuhanga abugha athi obuhingyi bw’ekibi ni lhuholho isikithabya. Kandi e Biblia yikabugha yithi: “Nyamuhanga syalithoka eribiha.” (Abaebrania 6:18) Aliwe Sitani iyo yuwabiha akabwira Eva athi: “Simwendi syaholha nahake.”​—Enzuko 3:4.

Ekyo kikaleka ihabuthuka ekibulyo kino, Engangirirya y’omundu eribya mw’akalimu yamabya ini mabehi, kwesi bikabya bithi omundu akaholha?

Omwatsi w’erihangika ow’ali omwa Nzuko akabugha athi: “Omwami Mukulhu Nyamuhanga mwabumba omundu omo lhuthuthu lhw’ekithaka, neryo mwabuhira omo nyindo yiwe mw’omuka w’engebe. Omundi oyo mwabya mundu oyuliho.” Ebinywe “omundu oyuliho” byalhusibawa omwa kinywe ne’phesh eky’Ekihebrania ekikamanyisaya “ekindu ekikahumulha.”​—Enzuko 2:7.

Aho e Biblia yikakanganaya ndeke-ndeke ngoku omundu mwathahangikirwa mw’akalimu akatheholha. Aliwe omundu iyo wosi ni “mundu oyuliho.” Omwa Biblia siwanga bana mw’ahakasighika eky’omundu eribya mw’akalimu akatheholha.

Neryo ibbwa, e Biblia yamabya isiyiribugha yithi omundu ali mw’akalimu akatheholha, busana naki amadini mangyi iniabugha athi omundu ali mw’akalimu ako? Eyi ni ngangirirya eyatsuka omwa Misiri eya kera.

Omusomi w’ebya kera Omugiriki, iya Herodotus ow’omwa myaka eya 500 E.K.K., mwabugha athi Abanya Misiri “bo babya bandu b’erimbere erikulha-kulhania engangirirya y’omundu eribya mw’akalimu.” N’abandi, b’Abanya Babeli abakera. Nabu ib’ikirirye engangirirya eyo. Erihika aho Alexander the Great ahambira ebihugho by’omwa Middle East omwa 332 E.K.K., abafilosofa Abagiriki babya ibabirithulhughania engangirirya eyo, neryo muyalhua iyabughana obuthabali bw’Abagiriki.

Omwa kighonye ky’erimbere E.K., esyodini ibiri esy’Ekiyuda esyabya syasibwe, ey’aba Essene n’Abafarisayo, isikakangiriraya sithi omundu ali mw’akalimu akakamulhwamu akaholha. E Jewish Encyclopedia yikabugha yithi: “Engangirirya y’omundu eribya mw’akalimu akatheholha, n’Abayuda baminyirayo omwa myatsi y’Abagiriki, na kutsibu-tsibu esyongangirirya sya Plato.” Na Josephus omusomi w’ebya kera Omuyuda ow’omwa kighonye ky’erimbere mwabugha athi engangirirya eyo siyilhuire omo Masako Abuyirire, athi aliwe “ni nyikirirya y’abandu be Greece,” kandi ni ngangirirya eyiseghemere okwa myatsi y’abayi b’esyongano bayo.

Emibere y’Abagiriki yabere yinemukanyirira omwa bandu, n’Ababya bakayahulha mo Bakristayo mubaligha engangirirya eyo. N’owundi musomi w’ebya kera iya Jona Lendering, akabugha athi “Engangirirya ya Plato ey’eribugha athi akalimu akathulimu kanabya omwa mwanya owuwene kera, aliwe lino kali omwa kihugho ekitsandire muyaleka esyongangirirya sya Plato isy’ingira omwa Kikristayo.” Neryo erighunzerera, engangirirya y’amabehi ey’omundu eribya mw’akalimu muyingira omwa Kikristayo, yamabya ngangirirya ngulhu yamo.

Omwa kighonye ky’erimbere, omukwenda Paulo mwakunga athi: “Omulimu akabugha ndeke athi oko mighulhu y’enyuma abandi basyatswa okw’ikirirya lyabu, ibakwama ebirimu by’erithebya n’erikangirirya ly’esyombinga.” (1 Timoteo 4:1) Ebinywe ebi kwenene byabiribererera! Engangirirya y’omundu eribya mw’akalimu akatheholha ni nguma y’okwa syasibwe “ng’erikangirirya ly’esyombinga.” Siyirisighikawa n’amasako, kandi yilhuire omwa mirwa y’ekikafiri n’amenge w’abandu.

Ekibuya okw’ithwe, Yesu mwabugha athi: “Mwasyaminya ekwenene, n’omwatsi w’okwenene asyabaha obwiranda.” (Yoane 8:32) Eriminya ekwenene eyihikire ye Biblia likathuhighulha oko ngangirirya esithesikaya Nyamuhanga esiri omwa madini mangyi w’ekihugho. N’ekindi, ekwenene y’Ekinywe kya Nyamuhanga yikathuboholha okwa bukobe bw’ebihaniriro ebihambire okwa lhuholho.​—Lebaya akasanduku “ Abaholi Bali Hayi?”

Omuhangiki wethu mwathathuhangika eribyaho habw’emyaka 70 kutse 80 buyira, neryo ithwaholha n’eriya omwa wundi mwanya, eyihi. Ekighendererwa kiwe kyabya indi abandu bikale okwa kihugho ko kera na kera. Ekyo Yehova akilhaghanisaya busana n’olhwanzo olhw’awithire abandu, kandi sikyendi syakubibwa. (Malaki 3:6) Omw’ibugha n’omuwatho munene, omuhandiki w’esyonyimbo mwabugha athi: “Abathunganene basy’ikalha omo kihugho mo buholho.”​—Esyonyimbo 37:29.