EBIKABUGHAWA okwa kibulyo ekihambire okwa ngebe n’olhuholho ni bingyi kandi sibisosene. Abandi bakayowa bathi bakendi syabya bakaholha, bakendi sy’ingira omwa yindi ngebe, obundi erihinduka mwa kindi kindu kutse erighenda omwa wundi mwanya. Abandi basi bathi bakendi syabuthwa kandi, erithasyatsuka engebe buhyaka. N’abandi bakabugha bathi wamaholha, ebyawu bikahwera aho.

Nawu obundi wunawithe awawu malengekania oko mwatsi oyu, erikwamana n’ebya wukulire wuk’owa. Aliwe ibbwa, ebikabughawa okwa mibere y’abaholi eribya bya mbaghane bithya, mbwino hane aha thwangabana eky’erisubirya ekihikire okwa kibulyo ekyabirilyambya kutsibu eki?

Habw’emyaka mingyi, abakangirirya b’amadini babirikanyirirya engangirirya y’eribugha indi omundu ali mw’akalimu akatheholha. Hakuhi abandu bosi b’omwa madini awasibwe—​ng’Ekikristayo, Ekihindu, Ekiyuda, Ekisiramu, n’awandi—bikirirya bathi omundu ali mw’akalimu, akakamulhuamu akaholha neryo ikaya elhubulha kutse omwa bwikalho bw’emirimu. Ababbudha ibo bikirirye bathi omundu akabya inianemughenda akabinduka, erilhua omwa ngebe ndebe n’erisuba omwa yindi, inialindwa iniahika omwa mibere eyuwene kutsibu eyik’ahulhawa mwa Nirvana.

Busana n’esyongangirirya ng’esyo, babirikirirya bathi olhuholho ni lhukyo olhuk’ingiraya omundu y’omwa yindi ngebe. Neryo busana n’ekyo, okwa bangyi, ibo olhuholho lhukabya nga ni kindu ky’omughaso ekikathokesaya omundu erilhua omwa ngebe nguma n’erisuba omwa yindi. Neryo aho olhuholho ilhwabya nga n’isonda lya Nyamuhanga. Aliwe e Biblia iyo yikabugha yithiki oko mwatsi oyu? Soma omwatsi ow’akakwamako. Eky’erisubirya kyangana kuswekya.