Mbwino thwangana yikethera indi ebyosi ebya Nyamuhanga abirilhagha bikendi syabya? Yesu iyo abya inianayikethere ekyo, n’erikangirirya liwe mulyaghumya erikirirya ly’abakamuhulikirira. Thalengekania okwa ky’erileberyako ekyaha omwa mukania wiwe w’okwa kithwe, ekiri omu Matayo 5:18: “Ngabugha nenyu kwenene nyithi erihika aho lhubulha n’ekihugho byasyahweraho, sihali akakwarari kutse kathondi k’oko mighambo akakendi syalhua oko mighambo erihika aho ebyosi byasyabererera.”

Akanyughuta akanyoho omwa nyughuta sy’Ekihebrania ni kakwarari ng’aka י (kakasomawa mwa, yod), y’enyughuta y’erimbere omwa nyughuta ini esy’erina lya Nyamuhanga, Yehova. * N’omwa bindi binywe by’omwa Mighambo ya Nyamuhanga, abahandiki n’Abafarisayo ibakathwalha obuli “kakwarari k’enyughuta” mwa kandu akawithe mughaso munene.

Yesu mwabugha athi olhubulha n’ekihugho ibyanganahwaho omwakanya k’eriherya n’akakwarari okwa Mighambo. Kandi Amasako akathukakasaya ngoku olhubulha n’ekihugho ekyo thuliko kino ni by’eribyaho kera na kera. (Esyonyimbo 78:69) Neryo kwesi ekya Yesu abugha eki, kikakanganaya ngoku sihali n’akandu n’akanyoho omwa Mighambo akathendi syabererera.

Mbwino Yehova akanatsomana n’ehindu hike-hike? Ee, ndeke-ndeke. Thalengekania oku kino: Abaisraeli mubabwirwa ngoku sibatholere bakabbuna erikuha ly’ekyana ky’embuli ekyabya kikalibwa okwa kiro ky’Erikyuruka. (Eriluayo 12:46) Ako kabya ini kandu kake buyira omwa mukonga oyo. Mbwino ibo banabya basi ekyaleka ibabya isibatholere eribbuna erikuha eryo? Obundi sibabya basi. Aliwe Yehova iyo abya inianasi ngoku akandu kake ako kak’imanira eribya Masiya isyendi syabbunika mw’ikuha na lighuma akahanikwa okwa muthi.​—Esyonyimbo 34:20; Yoane 19:31-33, 36.

Ebya Yesu abugha okwa kakwarari bikathweghesayaki? Thutholere ithwabya n’eriyikethera ndeke ngoku emilhaghe ya Yehova eyosi yikendi syabererera, isihendisyasighalha n’akakwarari omwa milhaghe yiwe. Akanyughuta kake buyira omwa nyughuta sy’Ekihebrania kakaghumaya eriyikethera lyethu!