Eparadiso! Ehitabu hy’abaramburi ehyuwene ehikakanganaya emyanya y’ehaali eyiri nge “paradiso” hikanaleka ithwanza eriyalebya n’erihumulira omwa myanya eyo thwan’ibirirwa ebitsibu byethu. Aliwe ngoku thunasi ndeke-ndeke, thukabya thukalhuayo thukasuba eka, thukayisanga nibya engebe eyine ngoku yanabya thukaghenda.

Aliwe nomwabine, omwatsi w’eparadiso akatsemesaya bangyi. Aliwe ithwangana yibulya: ‘Mbwino “eparadiso” ni lhughano buyira olhuwene? Kyamabya ikwakiri kithya, busana naki kikatsemesaya abangyi? Mbwino yinemwendi syabya?’

Habw’emyaka mingyi eritsuka kera, abandu babiritsemesibwa kutsibu omwa kindu paradiso. Abangyi batsuka erilengekania kuyo kundi mub’owa e Biblia yikabugha yithi Nyamuhanga mwahera “eririma oko lhuhandi lhw’endatha oko Edeni.” Ni kyahi ekyaleka eririma eryo iryuwana kutsibu? E Biblia yikabugha yithi: “Nyamuhanga mwalhasya oko kithaka kw’obuli muthi ow’akuwana omo meso n’owuwene oko kalyo.” Eririma eryo irikatsemesaya kandi lyabya lyuwene. Ibbwa ekikatsemesaya kutsibu, Nyamuhanga “kandi mwalhasya omuthi w’engebe omo kathi-kathi k’eririma.”​—Enzuko 2:8, 9.

Ekitabu ky’Enzuko kikabugha kithi habya esyonyusi ini esyabya sikahulhuka omw’irima eryo. Esibiri okwa nyusi esyo sikinasibwe na munabwire​—olhusi Tigris (kutse, Hidekeli) n’olhwa Efurata. (Enzuko 2:10-14) Esyonyusi ibiri esi sikasendera omwa Ngetse eye Persia (Persian Gulf), hathya eyasibwe nge Iraq, eyabya kitsweka ky’okwa Persia eya kera.

Ky’ekikaleka kwesi, e Persia, omwatsi we paradiso ibabya ibanziregho kutsibu. Hane e kapeti ayakolhawa kera n’Abaperesi omwa kighonye kye 16 eyine omw’ibikiro ly’ebya kera erya Philadelphia (Museum of Art), omwa Pennsylvania, e Amerika. Yitherire kw’eririma irine mw’emithi n’ebimole. Ekinywe ky’Abaperesi eky’erina ly’ekapeti eyo kikathasyamanyisaya “eparadiso,” kandi eririma eryo ngoku liri okwa kapeti eyo liri ng’eririma erya Biblia yikakanayako erye Edeni.

N’omwa bihugho bingyi omwa kihugho kyosi, omwa mibughe mingyi bakabya ibanemuya esyongano esihambire okwa paradiso. Abandu babere banemughenda bakahumira omwa yindi myanya, omwatsi we paradiso mwaghenda akahinduka busana n’eritsuka eritswanganiamu esyongano sy’amalengekania w’abandu ab’omwa kihugho ekyo. Na munabwire, abandu bak’ahulha omwanya owuwene kutsibu mwa paradiso.

Hane abaramburi ba kera ababugha bathi babiribana ahabya eparadiso. Ng’eky’erileberyako, Charles Gordon, oyuwabya mukulhu omwa busirikali bwe Britain, abere abungira okwa kizinga kye Seychelles omwa 1881, mwatsemera obubuya bw’omwanya oyo n’erithwamu erirangirira athi abiribana e paradiso eya kera. Omwa kighonye ekya 15, omuramburi omunya Italy iya Christopher Columbus mwalengekania athi alinga amabana ahabya eririma ly’Edini omughulhu ahika okwa kizinga kye Hispaniola, hathya ahasibwe nge Dominican Republic eye Haiti.

Mapping Paradise (Eparadiso okwa Syomapu), ni muthwe w’ekitabu ekikakanaya okwa bya kera ekiri mw’esyomapu nyingyi esilhabire omu 190 esya kera. Esyomapu esyonyingyi esirimu sikakanganaya Adamu na Eva ibane omw’irima lye Edeni. Mune eyindi mapu, ni ya kera, yiri omwa bihandikire ebya kera ebya Beatus owe Liébana omwa kighonye kye 13. Okwa muthwe-muthwe wayu kune akasunduko kake, omwa kathi kako munatherire eparadiso. Neryo ibakangania mukalhua esyonyusi ini, isinahandikireko “Tigrisi,” “Efurata,” “Indus,” na “Yorodani,” obuli lhughuma ilhukalhua okwa sonda nguma y’eririma. Kyabya ng’ekikakanganaya emibere Ekikristayo kyabiriyitsatsanga omo sonda ini sy’ekihugho. Emyatsi ng’eyo yikakanganaya ngoku nomwakine indi aha Paradiso ya kera yabya sihasibwe, abandu babirisighalha ibakin’ibukire obubuya bwayo.

 John Milton, omuhandiki w’omwa kighonye kye 17, mwahandika olhughano olhwa Paradise Lost, (Erihera lye Paradiso) ilhuseghemere okwa biri omo mwatsi wa Adamu na Eva owali omwa kitabu ky’Enzuko, ngoku bakolha ekibi n’erihighithwa omwa Edeni. Omwa lhughano olho, mwakangania ngoku hane omulhaghe w’erisyabya n’engebe y’erikotha okwa kihugho, n’eribugha athi: “Lithya neryo ekihugho kyasyabya paradiso kandi.” Kandi Milton mwahandika ibbwa n’olhundi lhughano olhwa Paradise Regained, (Eparadiso Erisuba.)

Kilhangirikire ngoku omwatsi we paradiso eribya okwa kihugho ni kalhandirira akatsukire kera. Aliwe busana naki abandu bakabya nga sibakitsomene omwatsi oyo? Enzumwa yiri yithi, ngoku ekitabu Mapping Paradise kinabughire, “hathya abakasoma okwa by’emyatsi y’edini sibakitsomene ebye paradiso ebyo.”

Munabwire abangyi abakayasoma omwa makanisa bakakangiriribawa ambu bakendi syaghenda elhubulha, butsira eribya n’engebe omwa paradiso okwa kihugho. Kandi nibya e Biblia iyinemubugha omwa Esyonyimbo 37:29 yithi: ‘Abathunganene basy’ikalha omwa kihugho mo buholho, n’erisighalyakyo kera na kera.’ Neryo ibbwa ekihugo munabwire ka si paradiso, thwanga minya thuthi kwenene omulhaghe w’eparadiso kw’akendi syabererera? *

Yehova Nyamuhanga, oyuwahangika Eparadiso eya kera abiriyilhagha erisubyayo. Athi? Wibuke ngoku Yesu mwabugha athi ithwasaba thuthi: “Obwami bwawu bwase. Erisonda lyawu liyirawe omwa kihugho ngoku liri omo lhubulha.” (Matayo 6:10) Obwami obo bukendisyabya buthabali bw’ekihugho kyosi obukasondolhawa na Yesu Kristo, obukendi syalhusyaho amathabali wosi w’abandu. (Danieli 2:44) Obwami obo bukendi syaberererya omulhaghe wa Nyamuhanga ow’eparadiso eribya okwa kihugho.

Omuminyereri Isaya mwasondolibwa n’omulimu erikania okwa mibere eyikendisyabya omwa Paradiso omukendi syabya isimukiri ebyosi ebikaliraya abandu munabwire. (Isaya 11:6-9; 35:5-7; 65:21-23) Thukakusaba thuthi wuthalengaho, omwa budakika buke, erisoma emilhondo eyo omwa Biblia yawu. Wukendi minya bingyi ebya Yehova akayaha abakamughondera. Neryo abandu bakendi syabana ebyo Adamu na Eva baheraya​—obughuma na Nyamuhanga n’eparadiso.​—Eribisulirwa 21:3.

Ni kyahi ekyanga leka ithwakakasya ngoku Eparadiso eribya okwa kihugho si lhughano buyira aliwe ku ni kwenene? Kundi e Biblia yikathubwira yithi: “Olhubulha ni lhw’Omwami Mukulhu iyuwene, nikwa mwaha ekihugho oko bandu.” Amaha we paradiso ni mwatsi ogho “Nyamuhanga oyuthebiha athulhagha oko mighulhu ya kera-kera.” (Esyonyimbo 115:16; Tito 1:2) E Biblia ka yikathuha amaha mabuya​—Eparadiso eya kera na kera!