Omo mwatsi w’erimbere muthukakanaya oku Croesus akathebibwa n’omuhereri omulhaghuli owe Delphi, ekindu ekyaleka iniasingwa n’omwami we Persia. Okwa lhundi lhuhandi, omwa Biblia mune amaminyereri awahambire oko mwami we Persia awabererera ngoku analhaghulhawa.

Ihakine myaka nga 200​—myaka mingyi omwami isyalyabuthwa​—omuminyereri Omuebrania iya Isaya mwahulha erina lya Kiro kandi amasoborera ngoku Kiro anga kindire omuyi we Babeli ow’amaaka.

Isaya 44:24, 27, 28: ‘Omwami Mukulhu athi, . . . ‘ningye ngabwira emirindi y’engetse nyithi, Mume, kandi nasyumya esyonyusi syawu; Ningye ngahulha Kiro, nyithi, Ni mulisya waghe! Asyaberererya ebyosi ebikanyitsemesaya. N’eryahulha e Yerusalemu athi, Asyahimbwa; na busana n’ehekalu athi, Ekibanza kyawu kyasyahalhwa.’

Erikwamana n’omusomi w’ebya kera Omugiriki, iya Herodotus, amahe wa Kiro mwathahulha amaghetse w’Olhusi Efurati, olhwabya lhukalhaba omwa muyi we Babeli. Amenge wa Kiro aya mwawathikya amahe wiwe erisoka amaghetse iniabirikeha. Mubabya babirihamba omuyi, Kiro mwalhwika Abayuda ababya omwa bunyewa mwe Babeli n’eribalighira athi basube ewabu erithasya himba e Yerusalemu, eyabya iyamabirighunza myaka 70 iyinathoghothibirwe.

Isaya 45:1: “Omwami Mukulhu akabwira oyo ayisogha, ya Kiro athi, Nabiriwatha oko byalha biwe by’amali, erikinda ebihanda embere siwe, n’erilhusya amaaka w’abami, erikingulha esyonyuyi embere siwe, neryo esyongyo sisyendisyakingwa.”

Abapersia mub’ingira omwa muyi erilhaba omwa lhukyo lhunene olhukakyungulirawa oko mbandi ibiri, omwa buthatsomana olhwabya ilhwabirisiwa isilhukingire. Abanya Babeli ku baminya ekya Kiro abya aniane muthegheka, bangakingire esyongyo syosi esyabya ebwanga bw’olhusi. Aliwe ngoku kyanabya, omuyi syabya theghirye.

Obu ni bughuma b’okwa maminyereri mangyi awali omwa Biblia aw’abererera ngoku analhaghulhawa. * Erithendibya ng’erilhaghulha ly’abandu, erya bakabugha bathi likalhua oku syonyamuhanga syabu sy’amabehi, amaminyereri we Biblia igho akalhua oku Oyuwabugha athi: “Erithulha eby’enduli inandi oko nzuko, n’eritsuka okwa mighulhu eya kera erithulha emyatsi eyithe yakolhwa.”​—Isaya 46:10.

 Nyamuhanga w’ekwenene musa, oyukahulhawa mwa Yehova, yuwanga kolha ekyo. Erikwamana n’abasomi bangyi erina eri likamanyisaya “Akaleka Ikyabya.” Eki kikakanganaya amaaka wiwe w’eriminya n’erisondolha ebikendi syabya erikwamana n’erisonda liwe. Kikathukakasaya ngoku anayitheghekire eriberererya ebyosi eby’abirilhagha.

Wunanzire eriminya amaminyereri we Biblia ng’akabugha athiki okwa buthuku bwethu buno? Emyaka nga 2,000 enyuma, e Biblia muyalhaghulha ngoku “emighulhu eyikalire” yangabereho “oko biro by’enyuma-nyuma.” Ebiro by’enyuma-nyuma ebyaki? Butsira eby’ekihugho kutse abandu, aliwe eby’amalhwa, erinubibwa, n’eriaghalibwa ebyamabiriaghalya abandu ahabw’emyaka mingyi. Thulebaye amaminyereri make awakakanganaya ngoku thuli omwa “biro by’enyuma-nyuma.”

2 Timoteo 3:1-5: “Okwa biro by’enyuma-nyuma . . . , abandu basyabya abakayanza, n’erianza ebindu, abakayipipa, abakayiheka, abatsumi, abathiowa ababuthi babu, abathe n’ewasingya, abathesoma. Basyabya b’omuthima akalire, isibeghanyira, abakalegha abandi, ab’omwagha, abatsibu, abathanzire ekibuya, basyabya bathebya, abathetsomana, ab’omuthwe abimbire, abanzire eriyitsemesya, isibanzire Nyamuhanga, bakwamire omuhanda w’ekisomo, nikwa bakaghana obuthoki bwakyo.”

Mbwino si kwenene indi emibere ng’eyi yikayongera erikanyirira omwa bandu munabwire? Wunalhangire ngoku thuthimbirweko abandu abayanzire, abanzire esyosente, n’ab’emiyiheko? Mbwino wune mukilhangira ngoku abandu bakayongera erithendibya n’eriyikakirya n’eribya isibanga lighirana n’abandi? Ahathe erithika-thika, wunemulhangira ngoku erithendiowa ababuthi likanyirire kandi ngoku abandu banzire eriyitsemesya kwilhaba eryanza Nyamuhanga. Kandi obuli kiro emyatsi eyi yikaghenda yikayongera eritsandira ighuma.

Matayo 24:6, 7: “Mwasyowa engulhu y’amalhwa n’olhombi lhw’amalhwa. . . . Kusangwa ekihanda kyasyalhwa n’ekindi kihanda n’obwami bwasyalhwa n’obundi bwami.”

Esindi mbaririra sikakanganaya sithi abandu abosi abamabirithaholera omwa syonyuhi n’amalhwa w’erithangana eritsuka 1914 balhabire omu miliyoni 100. Thalengekania okwa misonia, obulighe, n’eriaghalhwa eryo omughanzo mungaha n’oyu akaletha. Mbwino ebihugho bine byathalhangira eki neryo bikaghunzaho esyonyuhi?

Matayo 24:7: “Kandi hasyabya esyonzalha.”

Ekithongole ekya World Food Programme mukyabugha kithi: “Omwa kihugho omwa thukahulhukaya ebyalya ebikaghunza ebyanga lisya obuli mundu, abandu miliyoni 815​—omundu mughuma okwa bandu mwenda​—akinakesaya isyathalyaki. N’eryongerako​—omundu mughuma okwa basathu​—akasesuka busana n’endyambi.” Eribaririra likakanganaya ngoku, obuli mwaka, abaana abalhabire omu miliyoni ng’isathu bakaholha busana n’enzalha.

Luka 21:11: “Hasyabya emisiki eminene-minene.”

Obuli mwaka, emisiki nga 50,000 eminene-minene kutsibu yikabya iyabirilhaba kandi iyowibwa n’abandu. Emisiki nga 100 yikatsandiraya ighuma amanyumba, kandi omusiki mughuma omunene kutsibu akabya iniabirilhaba obuli mwaka. Erikwamana n’eribaririra lighuma, ahakathi-kathi k’omwaka owa 1975 n’owa 2000, emisiki muyitha abandu 471,000.

Matayo 24:14: “Kandi engulhu yuwene y’Obwami eyi yasyatsuka erithulhughanibwa omwa kihugho kyosi busana n’eriminyisya ebihanda, neryo enduli yasyahika.”

Abema ba Yehova, abalhabire omwa miliyoni munani, bane muthulhughania n’eriha obwema okwa ngulhu yuwene y’Obwami omwa bihugho nga 240 erithimba omwa kihugho kyosi. Bakathulhughanaya engulhu yuwene omwa syotawuni nene-nene, omwa byalu, omwa misithu, n’omwa bithwe. Obuminyereri bukabugha buthi omubiiri oyu akendi syabya abirikolhwa okwa lhulengo olhwa Nyamuhanga anzire, “enduli yasyahika.” Eki kikendi syakanganiaki? Kikendi syamanyisya erihwaho ly’amathabali w’abandu n’erithwingirya omwa buthabali bw’Obwami bwa Nyamuhanga. Ni milhaghe yahi eyikendi syabererera omwa Bwami bwa Nyamuhanga? Lholha embere erisoma wanaminyayo.