Engulhu yuwene y’Obwami bwa Nyamuhanga yine muthulhughanibwa omwa kihugho kyosi, ngoku Yesu anaminyerera. (Matayo 24:14) Ekitabu kye Biblia ekya Danieli kikathubwira kithi Obwami obu ni buthabali bwa Nyamuhanga. Esura eyakabiri ey’ekitabu eki muli obuminyereri obukakanaya okw’isubungukana ly’amathabali w’abandu, kutse amami, eritsuka okwa bwe Babeli erihika n’okw’awaliho munabwire. Erilhaghulha ekikendisyabya omwa buthuku bw’embere, omulhondo 44 akabugha bino:

“Nyamuhanga w’elhubulha asyahangania obwami obuthendisyaheribwa na kera, kutse erithabalha lyabo siryendisyasighirwa abandi bandu; nikwa bwasyathulhanga mo bihandi-bihandi n’eribugha amami wosi aya, nabo bwasyahangana kera na kera.”

Obuminyereri bwe Biblia obu n’awandi maminyereri akakanganaya ngoku Obwami bwa Nyamuhanga bukendi syasuba omo mwanya w’amathabali w’abandu n’eriletha obuholho n’obwiranda okwa bandu abakendi syabya okwa kihugho. Engebe yikendi syabya yithi omo Bwami obu? Hano hane emilhaghe mibuyanga eyikisiya iyabererera.

• SIHENDI SYABYA NYUHI

  Esyonyimbo 46:9: “[Nyamuhanga] akakubaya amalhwa omo kihugho kyosi; Akabunanga amatha, n’eritsutsanga amathumo, Kandi akahisaya esyogali omo muliro.”

  Thalengekania ekihugho nga kikendisyabya kithi ebyosi ebikakolesibawa n’amenge awakakolesibawa erikolha ebindu by’amalhwa biryakolesibawa erikolha ebindu ebikaghasira abandu butsira ebikabitha! Omulhaghe oyu akendi syabererera omo Bwami bwa Nyamuhanga.

• SIHENDI SYABYA MALHWERE

  Isaya 33:24: “Kandi sihali ndulhani eyikendisyabugha yithi nyilhwere”

  Thalengekania okwa kihugho omuthendi syabya abandu erihambwa amalhwere w’omuthima, ekansa, omutsutsa, kutse obundi bulhwere bwosi-bwosi. Esyosipatara n’emibatsi sibyendi syasayithaghisibwa. Abandu omwa kihugho ibawithe amaghalha awuwene.

• SIHENDI SYABYA NZALHA

  Esyonyimbo 72:16: “Engano yibyeho nene omwa kihugho; N’ehithwe hy’osule mw’ebyalya.”

  Ekithaka kikendi syerya ebyalya ebikaghunza okwa buli mundu, kandi obuli mundu akendisyabya inianawithe eby’erirya. Enzalha n’erisesuka habw’endyambi siryendi syasabyaho.

• SIHENDI SYABYA OBULHUMI, OBULIGHE, N’OLHUHOLHO

  Eribisulirwa 21:4: “[Nyamuhanga] asyasangulha emisonia yosi oko meso wabo. Kandi olhuholho silhwendisyasabyaho, erisusumana kutse eririra, kutse eriaghalhwa. Emyatsi y’erimbere yabirirenga.”

   Eki kikamanyisaya eribya n’engebe eyihikene eyithe yangahwaho omwa kihugho paradiso! Ekyo ky’Omuhangiki wethu w’olhwanzo, Yehova Nyamuhanga abirithulhagha.

Mbwino wukalhangira emyatsi eyi nga siyanga bererera? Nomwakine indi abandu bangyi ibangana ligha bathi kwenene engebe eyikalhaghanisibawa omwa Biblia eyi yitholere, aliwe abangyi habw’esyonzumwa esithasosene kikanabakalira eriyitheghererya omwatsi w’erisyabyaho kera na kera. Eki sikiriswekaya, kundi sihali owundi mundu ng’ithwe oyowabirithabya omwa ngebe eyiri ng’eyi oyo wanga thusoborera kuyo.

Abandu babiribya omwa bukobe bw’ekibi n’olhuholho n’eribya omwa ngebe eyiri mw’obulhumi, eriaghalhwa, n’ebitsibu bingyi habw’omughulhu muuli, eki kyabirileka abandi ibalengekania bathi engebe yethu kwa yinatholere eribya yithya. Aliwe ekyo ni kyambaghane kutsibu okwa kyabya kighendererwa ky’Omuhangiki wethu Yehova, busana n’abandu.

Erithuwathikya erighumya ngoku emilhaghe yiwe yihikire kandi ngoku yikendi syabererera, Nyamuhanga mwabugha omwa kinywe kiwe athi: “Sikyendi syanyisubako buyira kithe kyakolha ebyo nyanzire, kandi kithe kyabererererya omwatsi omw’ekyo nathumirakyo.”​—Isaya 55:11.

E Biblia yikabugha yithi Yehova ni “Nyamuhanga oyuthebiha.” (Tito 1:2) Kundi abirithulhagha engebe eyuwene eyi, ikikendibya ky’amenge thwamayibulya ebibulyo nga bino: Kwenene kinathokekene abandu erisyabyaho kera na kera omwa Paradiso eyabirilhawa? Thwanga kolhaki erisyaghasirwa omwa mulhaghe wa Nyamuhanga oyu? Omwatsi owakakwamako omwa gazeti eno, akendi kuwathikya eribana eby’erisubirya okwa bibulyo ebyo.