AMAHA AYA K’AKATSEMESAYA! Omuhangiki wethu abiriyilhagha erithuha engebe y’erikotha, okwa kihugho kwa hano. Aliwe, kikanakalira abangyi eriligha omulhaghe oyo. Bakabugha bathi, ‘Obuli mundu atholere iniaholha.’ ‘Ni ky’obuhangiranwa omundu eribyaho n’eriholha.’ Abandi bakabugha bathi kyangana thokekana eribyaho kera na kera, aliwe butsira okwa kihugho kwa hano. Bakabugha bathi wukabana engebe y’erikotha iwunalyaholha n’erighenda elhubulha. Iwe wanga bugha wuthiki?

Wuthe wasubirya okwa kibulyo eki, thatsuka erilebya ekye Biblia yikasubiraya okwa bibulyo bisathu bino: Emibere omundu ahangikirwemo yikakanganayaki okwa mughulhu ogho mundu atholere iniaghunza? Ekighendererwa kya Nyamuhanga eky’erimbere busana n’ekihugho n’abandu kyabya iky’ekyahi? Olhuholho mulhwahika lhuthi okwa bandu?

Omwa byosi ebya Nyamuhanga abirihangika okwa kihugho, abandu ni b’embaghane kutsibu. Bathi? E Biblia yikakanganaya ngoku abandu basa babahangikawa omwa “musindo” n’omwa “kisosekanio” kya Nyamuhanga. (Enzuko 1:26, 27) Eki kikamanyisayaki? Kikamanyisaya ngoku abandu mubabya ibanganabya n’emibere eyiri nga ya Nyamuhanga, ng’ow’olhwanzo n’ow’obulingirirania.

Eryongera okw’ekyo, abandu mubahebwa amaaka w’erilengekania n’erighanirya, haghuma n’amaaka aw’eriminya ekitholere n’ekithatholere n’obwagha obw’eribya n’obughuma na Nyamuhanga. Kyakikaleka ithwatsemera emibere eyikaswekaya eyo kihugho kihangikirwemo n’okwa bikaswekaya omwa by’obuhangwa, haghuma n’ebikatherawa muthina-muthina, n’omuziki. Ekikulhu kutsibu, w’amaaka wethu w’embaghane aw’eribya ithwangana ramya Omuhangiki wethu. Ebindu ng’ebi bikaleka ihabya embaghane nene kutsibu ahakathi-kathi k’abandu n’ebindi bihangikwa.

Neryo thalengekania oku kino: Mbwino Nyamuhanga anganahere abandu emibere mibuyanga ng’eyi, haghuma n’amaaka aw’eribya ibangana thasyuwaniayo okwa lhulengo lhulebe, kwabya iniathuhangika eribyaho habw’emyaka mike buyira? Ekwenene yiri yithi, Nyamuhanga mwaha abandu b’emibere n’amaaka w’embaghane aya nuku thutsemere engebe hano okwa kihugho kera na kera.

Aliwe abandi bakanabugha bathi Nyamuhanga mwathahangika abandu ini b’eribya okwa kihugho kwa kera na kera. Bakabugha bathi ekihugho kyahangikawa eribya ithwangana kikalhamo habw’obuthuku buke, ah’erithulengeserya erilhangira nga ni bahi omwa bandu abanga tholera erighenda elhubulha eriyikalha kera na kera haghuma  na Nyamuhanga. Kyamabya iky’ekyo, mbwino isikyendibya indi Nyamuhanga yukaleka ihabya obubi obwosi obu okwa kihugho? Ekyo isikyendi hambana nahake n’emibere ya Nyamuhanga. E Biblia yikabugha yithya okw’iyo: “Emibere yiwe yithunganene. Nyamuhanga oyuthereghulha, kandi oyuthe n’omwatsi athe w’eribanza lithunganene.”​—Eryibuka Ebihano 32:4.

E Biblia yikabisulha ndeke-ndeke ekighendererwa kya Nyamuhanga ky’erimbere busana n’ekihugho omwa binywe bino “Olhubulha ni lhw’Omwami Mukulhu iyuwene, nikwa mwaha ekihugho oko bandu.” (Esyonyimbo 115:16) Ni kwenene, Nyamuhanga mwahangika ekihugho eribya bwikalho obuwene, obwa bandu eribyamo kera na kera, kandi mwahiramo ebyosi ebya thukayithagha erithoka eritsemera engebe kera na kera.​—Enzuko 2:8, 9.

“Olhubulha ni lhw’Omwami Mukulhu iyuwene, nikwa mwaha ekihugho oko bandu.”​—Esyonyimbo 115:1

Kandi e Biblia yikathasyakanganaya ndeke-ndeke ekighendererwa kya Nyamuhanga busana n’abandu. Mwaha omulhume n’omukali ab’erimbere olhukwamirwa ‘olhw’eryusulya ekihugho n’erighondyakyo n’erithabalha . . . obuli kindu ekiriho ekikalendera okwa kihugho.’ (Enzuko 1:28) Ka lhwabya lhusunzo olhuwene olhw’eritheya n’erihikya e Paradiso yabu omwa kihugho kyosi! Busana n’ekyo, amaha agho Adamu na Eva haghuma n’abaana ababanga buthire abya iw’ow’eribya n’engebe eya kera na kera okwa kihugho, butsira eriheberwa elhubulha.

Neryo ibbwa, busana naki thukaholha? E Biblia yikakanganaya ngoku ekihangikwa kighuma ky’okwa bihangikwa bya Nyamuhanga eby’ekirimu, enyuma waho oyuwaminyawa ng’omuyisamambuli Sitani Diabolo, mwanza erilemesya emitheghekere ya Nyamuhanga ey’omwa Edeni. Athi?

Sitani mwathebererya ababuthi bethu ab’erimbere, iya Adamu na Eva, eribya okwa lhuhandi lhwiwe omw’iyisamambulha oku Nyamuhanga. Omughulhu Sitani abugha athi Nyamuhanga akabisa abandu biwe b’ebibuya​—obughabe obw’eriyithwiramu ekibuya n’ekibi​—mubathwamu eribya okwa lhuhandi lhwa Sitani neryo bamayisamambulha oku Nyamuhanga. Mumwalhwiririraki? Endambi muyahika, bamaholha, ngoku Nyamuhanga abya iniabiribugha. Mubaherya amaha w’eribyaho kera na kera omwa kihugho Paradiso.​—Enzuko 2:17; 3:1-6; 5:5.

Eriyisamambulha lya Adamu na Eva lyabirihamba okwa bandu abosi erihika namunabwire. Ekinywe kya Nyamuhanga kikabugha kithi: “Ebibi mobyahika muna-kihugho busana n’omundu mughuma [Adamu], n’olhuholho mulhwingira busana n’ekibi kiwe neryo lithya olhuholho mulhwahika oko bandu bosi.” (Abanya Roma 5:12) Thukaholha kundi muthwasighalya ekibi n’olhuholho erilhua okwa babuthi bethu b’erimbere, butsira indi kundi ni kindu ekya Nyamuhanga abya iniabirithegheka ekithe kyanga yitheghereribwa.

Eriyisamambulha eryabya omwa Edeni mulithaghunzaho ekighendererwa kya Yehova eky’erimbere busana n’abandu n’ekihugho. Olhwanzo lhwa Nyamuhanga olhuhikene n’obulingirirania bwiwe mubyaleka iniahira h’emitheghekere ey’erithuboholha okwa kibi n’olhuholho ebya thwasighalhaya. Omukwenda Paulo mwabugha athi: “Obuhingyi bw’erikolha ebibi ni lhuholho, nikwa olhusunzo olhukalhua oku Nyamuhanga ni ngebe y’erikotha busana n’erimathikana na Kristo Yesu, Omukama wethu.” (Abanya Roma 6:23) Omo lhwanzo, Nyamuhanga “mwaha Mughalha wiwe, Ekyusa kiwe [Yesu Kristo], neryo oyukamwikiriraya syahere nikwa abye n’engebe y’erikotha.” (Yoane 3:16) Omw’iligha eriyihayo ng’embanulho, Yesu mwasubulya ebyosi ebya Adamu aheraya. *

Omwa buthuku obuthe bwa hali, omulhaghe wa Nyamuhanga ow’ekihugho eribya Paradiso akendi bererera. Iwangana syasangira okwa mulhaghe owuwene oyu wamaghendera okwa binywe bya Yesu bino: “Mwingire omwa lhukyo lhuke; kusangwa olhukyo ni lhunene, n’enzira ni nene eyikakolhaya okw’ihera, kandi ni bangyi abak’ingira omwa lhukyo olho. Nikwa olhukyo ni lhuke n’enzira ni nge eyikakolhaya okwa ngebe, n’abandu ni bake abakabanayo.” (Matayo 7:13, 14) Busana n’ekyo, erikwamana n’obuthuku bwawu bw’embere, erithwamu ni ryawu. Wukendi thwamu wuthi?