MBWINO WUNAWITHE EKYA WANGA THWAMU ERIKWAMANA N’OBUTHUKU BWAWU BW’EMBERE? Abandi bikirirye bathi ebindu eribya ibyabirisangwa byatheghekwa, butsira erithwamu ly’omundu, lya likasondolha esyongebe syabu. Bakabya bakalemererwa eriberererya ebighendererwa birebe, bakakwama kya bugha ku kinatholere kithya. Bakabugha bathi “Ku kyabya ikyabiritheghekwa kithya!”

Abandi bakanayibulha-bulha bakalhangira erinubibwa n’obuthe bulingirirania ebiri omwa kihugho kino. Banganabya ibabirilengaho erilhangira bathi bakabya ndeke omwa ngebe yabu​—aliwe ebindu ng’esyonyuhi, esyongoli sy’ebibi, ebitsinduli, n’amalhwere ibyabera erilemesya esyondegheka syabu. Neryo ibayibulya, ‘Ngayilhuhirayaki?’

Ni kwenene, emibere y’engebe yangana hamba kutsibu okwa byathukathegheka erikolha. (Omugambuli 9:11) Aliriryo, bikabya bikahika okwa ngebe yawu eya kera na kera, wunawithe ekya wanga kolha. Erithwalira haghuma, e Biblia yikakanganaya ngoku n’iwe wanga thwamu obuthuku bwawu bw’embere nga bwangabya buthi. Lebaya ekya yikabugha.

Musa, oyuwasondolha ekihanda kye Israeli, mwabwira abandu ababya ibakayingira omwa Kihugho Ekyalhaghanisibawa ebinywe bya Yehova athi: “Lebaya, nabirihira embere syenyu munabwire engebe n’omuyisa, n’olhuholho n’ekibi; neryo muyisoghe engebe, imwathoka eribyaho, inywe n’abaana benyu; eryanza Omwami Mukulhu Nyamuhanga wenyu, n’eriowa omulenge wiwe, n’erimumakirira.”​—Eryibuka Ebihano 30:15, 19, 20.

“Nabirihira embere syenyu munabwire engebe n’omuyisa, n’olhuholho n’ekibi; neryo muyisoghe engebe.”​—Eryibuka Ebihano 30:19

Ni kwenene, Nyamuhanga mwalhamya Abaisraeli erilhua omwa bukobe mwe Misiri n’erihira embere syabu y’engebe eyithe y’obukobe n’eyiri mw’etseme omwa Kihugho Ekyalhaghanisibawa. Aliwe engebe eyi siyanga kwamire kyayiretha. Erithoka eribana emighisa eyi, babya batholere “ibayisogha engebe.” Bathi? ‘Omwanza Nyamuhanga, n’eriowa omulenge wiwe, n’erimumakirira.’

Na munabwire, erithwamu eriri ng’eri line embere syawu, neryo ekya wanga thwamu ky’ekikendi kangania engebe yawu ey’omwa buthuku bw’embere nga yikendisyabya yithi. Omw’ithwamu erianza Nyamuhanga, eriowa omulenge wiwe, n’erimumakirira, iwukendibya iwamasombolha engebe​—engebe eya kera na kera omwa kihugho paradiso. Aliwe obuli kighuma ky’okw’ebi muli erikolhaki?

Olhwanzo wa mubere mukulhu wa Nyamuhanga. Omukwenda Yoane mwasondolibwa na Nyamuhanga eribugha athi “Nyamuhanga ni lhwanzo.” (1 Yoane 4:8) Busana n’ekyo, Yesu abere akabulibwa ekihano kikulhu omwa bihano ebyosi nga ni kyahi, mwasubirya athi: “Wanze Omukama Nyamuhanga wawu n’omuthima wawu wosi, n’ekirimu kyawu kyosi n’obulengekania bwawu bwosi.” (Matayo 22:37) Obunywani bw’okwenene na Nyamuhanga Yehova butholere ibwaseghemera okwa lhwanzo butsira indi kundi thumusaghire. Aliwe ibbwa, busana naki thutholere ithwasombolha erianza Nyamuhanga?

Olhwanzo olhwa Yehova athuwithire lhuli ng’olhwa babuthi bawithire abaana babu. Nomwakine indi sibahikene, ababuthi b’olhwanzo bakakangiriraya abaana babu, ibabahira mw’omuhwa, ibabasighika, n’eribahabulha kundi banzire ibatsema n’eribya ndeke. Neryo ibbwa nabo bakanza abaana babu ibakolha kyahi? Bakanza abaana babu ibabanza n’erighendera okwa bya babiribakangirirya nuku bibaghasire. Mbwino sikyangabya ky’amenge Thatha wethu ow’elhubulha oyuhikene eribya nayu inianzire ithwamukangania erisima lyethu busana n’ebyosi eby’abirithukolera?

Omwa mibughe eye Biblia yatsuka erihandikwamu, ekinywe “eriowa” mughulhu mungyi kihambene n’ekinywe “erisikya” kutse erighondera. Mbwino ekyo kyathuthemanyisaya thukabugha n’omwana thuthi, “Owa ababuthi bawu”? Busana n’ekyo, eriowa omulenge wa Nyamuhanga mwamuli eriminya n’erighondera eby’akabugha. Kundi sithwangowa omulenge wa Nyamuhanga ow’enyine-nyine, thukamwowa omw’isoma n’erighendera okwa biri omwa Kinywe kiwe, e Biblia.​—1 Yoane 5:3.

Erikangania omughaso w’eriowa omulenge wa Nyamuhanga, Yesu mwabugha athi: “Omundu siendi syabyaho busana n’obundu ibobwene, nikwa busana n’obuli kinywe ekikalhua omwa buno bwa Nyamuhanga.” (Matayo 4:4) Ngoku ebyalya bikanathughasira, n’erigha oku Nyamuhanga kwa line lithya, nibya iryo likathughasira kwilhaba n’aho. Busana naki? Omwami w’amenge iya Solomona mwabugha athi: ‘Kusangwa amenge ni butheya ngoku esyofranka ni butheya. Nikwa endundi y’eriminya ni menge aw’akatheghaya engebe y’oyuwithegho.’ (Omugambuli 7:12) Eriminya n’amenge ebikalhua oku Nyamuhanga byangana thutheya munabwire n’erithuwathikya erithwamu ndeke ekindu ekyanga thuwathikya erisyabana engebe y’erikotha.

Wibuke eky’erileberyako kya Yesu ekya thulyakanayako omo mwatsi ow’ahanyuma akabugha athi: “Olhukyo ni lhuke n’enzira ni nge eyikakolhaya okwa ngebe n’abandu ni bake abakabanayo.” (Matayo 7:13, 14) Erilhaba omwa nzira ng’eyi, ithukendi ghasirwa omw’ibya hakuhi n’oyuwasi erisondolha ndeke thwamabya thwanzire erihika eyo thukaya​—engebe eya kera na kera. Busana n’ekyo, ni ky’omughaso munene eribya ithune bughuma na Nyamuhanga. (Esyonyimbo 16:8) Aliwe eki, thukakikolha thuthi?

Obuli kiro, hali bingyi ebya thutholere ithwakolha n’ebindi bingyi ebya thukabya ithunanzire erikolha. Ebindu ng’ebi byanganalya obuthuku bwethu kutse erithulengemerya neryo ithwathunga buthuku buke kutse ithwabulha obw’erilengekania okwa ebya Nyamuhanga anzire ithwakolha. Ky’ekikaleka e Biblia iya thw’ibukya yithi: “Neryo, muyitheghaye ndeke, simusibe ng’abandu bakiru nikwa ng’abandu b’amenge simulhabaye ebiro ebi by’obuyira, kusangwa omughulhu ono ni mubi.” (Abanya Efeso 5:15, 16) Thukabya ithune hakuhi na Nyamuhanga omw’ilhangira thuthi obughuma bwethu nayu ky’ekindu ky’omughaso munene omwa ngebe yethu.​—Matayo 6:33.

Nomwakine indi sihali ekya wanga kolha erihindulha ebya wabirilhabamo omwa ngebe, hane ebya wanga kolha nuku iwe n’ab’okw’iwe mwanga syabya omwa ngebe eyuwene omwa buthuku bw’embere. E Biblia yikakanganaya ngoku Thatha wethu w’elhubulha, Yehova Nyamuhanga, athwanzire kutsibu kandi ngoku akathuwathikaya eriminya ebyanzire ithwakolha. Thalebya eby’omuminyereri Mika abugha:

“Iwe mundu, abirikukangya kihi ky’ekibuya; Omwami Mukulhu akakusondako kihi kwehi, lya n’erikolha eribanza lithunganene, n’eryanza obwenge, n’erilendera na Nyamuhanga wawu n’eriyikehya!”​—Mika 6:8.

Wune mwendi ligha erikokya lya Yehova ery’erilendera nayu n’eribana emighisa eya kera na kera ey’abirilhaghanisya abakalendera nayu? Erithwamu ni ryawu!