Hamabya Ekitsinduli
WAMABYA iwanalhamire okwa kitsinduli, wangana yitheghererya ndeke eriyowa ly’abandi abanalhamire okwa bitsinduli: erikukubalha, eriyibulha-bulha, erihandabuka, erihanga-hangya, n’eribbunika omuthima. Abangyi abakasabuka bakabbunika omuthima kandi ibahwa amani ibayowa nga kyanganabya kibuya bamaholha.
Wamabya iwabiriherya ebyosi busana n’ekitsinduli, wanganayowa iwuli ahakalire kutsibu. Nibya iwanganatsuka n’eriyowa nga siwukitholere n’eribyaho. Aliwe, e Biblia yikabugha yithi engebe yawu ni y’obughuli kandi yithi wuwithe nzumwa mbuya sy’erilindirira obuthuku bw’embere obuwene.
ERIMINYA EKWENENE YE BIBLIA LIKALEKA ITHWABYA N’AMAHA
Omugambuli 7:8 hathi: “Enduli y’omwatsi yuwene kwilhaba enzuko yagho.” Iwukine okwa nzuko y’erilhua omwa bulighe bw’ekitsinduli, hakabya nga sihakiri maha omwa ngebe. Aliwe kikayithagha kaghalha kanene ngebe yawu erithasyasuba ngoku yilhue.
E Biblia yikabugha yithi hane omughulhu “sihendisyasyowibwa omulenge w’ekiriro n’omulenge w’erisusumania.” (Isaya 65:19) Eki kikendisyabya omughulhu ekihugho kikendisyabya paradiso omwisi sy’Obwami bwa Nyamuhanga. (Esyonyimbo 37:11, 29) Ebitsinduli sibyendisyasabya. Erithasy’ibuka obulhumi bwabyo, likendi syahwaho, kundi Nyamuhanga Omuthoki w’Ebyosi akalhagha athi: “Emyatsi y’erimbere siyendisyasyibukwa, kutse erihika okwa muthima.”—Isaya 65:17.
Thakilengekaniako: Omuhangiki abirithegheka ‘erithuha amaha oko biro byethu ebikasa’—engebe eyithekene omwisi sy’obuthabali bwa Nyamuhanga obuhikene. (Yeremia 29:11) Mbwino eriminya ekwenene eyi kyanganaleka iwalhangira engebe yawu iyikine y’omughaso? Sally, oyuli omwa mwatsi owakatsuka, akabugha athi, “Eriyibukya ebibuya byosi ebya Obwami bwa Nyamuhanga bukayathukolera omwa buthuku obukasa kyangana kuwathikya erilhusya amalengekania okwa bya kera n’erikuwathikya erilhaba omwabya wukabana lino.”
Busana naki iwuth’igha bingyi ebihambire okwa eby’Obwami bwa Nyamuhanga bukisigha ibwakolera abandu? Erikolha ekyo kyanganaleka iwasika ngoku nomuhanamabya ekitsinduli, engebe yawu yikine y’omughaso wunemulindirira ekihugho ekithendisyabyamo ebitsinduli. Wunalindirire ekyo, omwa Biblia mune obusondoli bubuya obwanga kuwathikya erighumira ebyangasa busana n’ekitsinduli. Lebaya eby’erileberyako bike.