ERIGHOBERIBWA omwa butheke ni kindu ekikaletha obulhumi bunene. Ni kwenene, abandi bakanalhangira ibatholere erighanyira omwanze oyulyasingira n’erisuba-subania obughuma bwabu. a Aliwe mbulha bamasighalha bughuma kutse eyihi, abakaminya ngoku omwanze wabu mwakasingira bakathunga obulhumi bunene. Abakabana ekitsibu ng’ekyo banga ghumira bathi obulhumi bwabo?

Mbaghane n’obulhumi, abangyi abathalyasingira babiribana erihumulikanibwa omwa Masako. Babiriminya ngoku Nyamuhanga akalhangira emisonia yabu n’eribalhumirirwa.​—Malaki 2:13-16.

“Omughulhu ngahandabuka n’erikwa engitsi, wukanyisibikaya, n’erinyitsemesya.”​—Esyonyimbo 94:19.

Bill ak’ibuka bino: “Nabere ingasoma omulhondo oyo, munathera akasasani Yehova inianemunyikungutsirirya omwa lhwanzo, ngoku thatha w’olhwanzo angakolha.”

“Sulireghulha okwa bandu abathereghulha.”​—Esyonyimbo 18:25.

Carmen oyo mwira wiwe abya iniamabirighunza amezi isyakiri muyisiwa akabugha athi: “Mwira waghe abya inianemusingira. Aliwe iningayikethera ngoku Yehova syanganyileghulhako. Isyanga nyilhabirya ahisi.”

“Simuhanga-hangaye emithima yenyu, nikwa omwa buli mwatsi mubwire Nyamuhanga obwagha bwenyu, imukamusaba n’erimuhathikana, . . . N’obuholho bwa Nyamuhanga obulhabire amenge wosi, bwasyatheya emithima yenyu n’amaghanirya wenyu omwisi wa Kristo Yesu.”​—Abanya Filipi 4:6, 7.

Sasha akabugha athi: “Munasoma emilhondo eyi emirundi n’emirundi. Nabere ngakanyirirya erisaba, Nyamuhanga mwanyiha obuholho omwa ngebe yaghe.”

Abosi abamabugha ebiri ahighulhu ebi ihakanayira ibayowa engebe nga siyikiwithe mughaso. Aliwe mubayikethera Yehova Nyamuhanga n’eribana amaaka omw’isoma Ekinywe kiwe. Bill mwakibughako athi: “Erikirirya lyaghe mulyaha engebe yaghe y’ekighendererwa omughulhu engebe yaghe yabya ng’eyisambukere. Nomwakine indi habw’akathuku munalhaba omwa ‘musya w’omwirimya owakalire,’ Nyamuhanga abya iniane naghe.”​—Esyonyimbo 23:4.