WAMABYA iwanaholerwe, nawu wanganabya iwabirithunga eriyowa erithe ly’omuthina mughuma, obulighe haghuma n’embwera n’erihwa amani. Kandi obundi muwahithana, eriyitsweba, n’erikwa obuba. Wanganabya imuwabulha engebe nga yikinawithe mughaso.

Wubye iwun’ibukire ngoku si kibi erikwa obulighe. Kikakanganaya ngoku wulhue wanzire kutsibu oyulyaholha. Aliwe ibbwa, kinathokekene eribya nga wamathekana okwa bulighe obukalire obwa wulimu?

Nomwakine indi obulhumi bwawu bunemulhangirika ng’obuthe bwangahwa, wangana bana erihumulikana wamakolesya amenge ano:

SI KIBI ERIKANGANIA OBULIGHE BWAWU

Abandu bosi sibali kanganaya obulighe omwa nzira ngumerera kutse erighunza obuthuku bughumerera ibane omwa bulighe. Nomwabine, eririra lyangana kuwathikya erikehya okwa bulighe. Vanessa, oyuli omwa mwatsi w’ahanyuma, akabugha athi: “Ininga kwama kyalira, inganza erikehya okwa bulhumi.” Sofía, oyuwaholerawa mwali wabu kitsumbukirania, akabugha athi: “Kikalhuma erilengekania okwa kyabya. Liri ng’eriboholha ekironda ekibbolire n’erikyoya. Obulhumi bukakalha kutsibu erighumira, aliwe kikaleka ekironda ikyalhama.”

KANAYA OKWA MALENGEKANIA N’ERIYOWA LYAWU

Ni kwenene, hanganayira iwanza eribya iwuwene. Aliwe obulighe bw’eriholerwa ni musiko owalithohire  kutsibu owawuthe wangaheka iwuwene. Jared ow’emyaka 17, oyuwaholerawa thatha wiwe, ak’ibuka bino: “Munabwira abandi okw’iyowa lyaghe. Singasi nga mubana nyiyitheghererya, aliwe munatsema eribya inanganababwira.” Janice, oyuli omwa mwatsi w’erimbere, ak’ongerako owundi mughaso athi: “Erikanirya abandi mukyanyihumulikania kutsibu. Munayowa abandi ibamayitheghererya eriyowa lyaghe, kandi mungathayowa ingali ingyuwene omwa bulhumi.”

LIGHA OBUWATHIKYA

Omuthambiri mughuma akabugha athi: “Abakaholerawa bamalighira abanywani n’abahughu eribawathikya bakanaholerwa, kikanabanguhira erighumira obulighe n’eribulhabamo.” Leka banywani bawu baminye ekya banga kolha erikuwathikya; obundi banzire eriwathikya aliwe sibasi nga bawathikaye bathi.—Emisyo 17:17.

ONGERA ERIYITHUNDA HAKUHI NA NYAMUHANGA

Tina akabugha athi: “Ekansa yabere yabiritha mwira waghe kitsumbukirania, munabya isinangathasyamubwira ebitsibu byaghe, neryo ebyosi ininga bibwira Nyamuhanga! Ekiro ikikabya kikatsuka ininga musaba obuwathikya bw’erinyilhabya omwa kiro ekyosi. Nyamuhanga mwanyiwathikya kutsibu.” Tarsha, oyuwabya n’emyaka 22 mama wiwe akaholha, akabugha athi: “Erisoma e Biblia buli kiro ikikanyihumulikanaya. Irikanyiha ekindu eky’erilengekaniako ekikahimba.”

LENGEKANAYA OKW’ILHUBUKA

Tina akalholha embere athi: “Erimbere, amaha w’erilhubuka mwathanyihumulikania kundi nabya iningayithagha mwira waghe​—n’abaghalha baghe ibakayithagha thatha wabo—​endambi eyo. Aliwe, hathya, enyuma w’emyaka ini, ngamakirire amaha aya. Wakaleka ingalholha embere ingana ghumire. Ngathera akasasani ak’erisyamulholhako, kandi kikanyilethera obuholho n’obutseme!”

Sibugha indi obulighe bukendilhuaho ibwahwa. Nomwabine, eky’erileberyako kya Vanessa kikahimba. Akabugha athi, “Wukalengekanaya wuthi sihali ekiro wukendisyabya ndeke, aliwe obuthuku bukabya bunemulhaba obulighe bukaghenda bukakeha.”

Wibuke, nomwakine indi wukendibya iwunemukandira omuholi, engebe yikabya iyikine y’omughaso. Busana n’obuwathikya bwa Nyamuhanga obw’olhwanzo, wanganalholha embere iwunemutsemera haghuma n’abanywani abakwanzire n’eribya n’ekighendererwa omwa ngebe. Kandi omwa buthuku obuthe bwa haali, Nyamuhanga akendi lhubukya ababiriholha. Anzire iwasyawa okwa mwanze wawu. Neryo obulhumi obuli omwa muthima wawu obo bukendi syahwamu kera na kera!