WUNE wathayowa nabi kutsibu erihika n’okwa kiika eky’eripona eribya n’engebe? Neryo obo iwangana yitheghererya eriyowa lya Adriana. Iniawithe erihanga-hangya linene kandi iniali omwa bulighe n’eriyibulha-bulha. Adriana mwabanwa mw’obulhwere bw’eribya omwa amaghaniryo w’olhughumerere.

Thasyalebaya n’omulhume we Japani ya Kaoru, oyuwabya akalembera ababuthi biwe abakulire, abalhwere. Akabugha athi: “Okwa buthuku obo ingahathathene kutsibu okwa mubiiri. Endambi muyahika namabya isingakyanzire erirya, namabya isinga kighotsera na ndeke. Munayowa namaholha iningendibya inamalhuhuka.”

Omulhume we Nigeria oyukahulhawamo Ojebode akabugha athi, “Iningabya omwa bulighe mughulhu wosi erihika n’okw’irira, neryo munasondya emibere y’erighunzaho engebe yaghe.” Eky’omughisa, Ojebode, Kaoru, na Adriana mubathayitha. Aliwe obuli mwaka hakuhi abandu 800,000 bakayitha.

Abandu bangyi abakayitha bakabya ini balhume, abangyi omw’ibo bakabya ibalyakwa esisoni sy’erisaba obuwathikya. Yesu mwabugha athi abalhwere bakayithagha omunganga. (Luka 5:31) Neryo wamasa mwa malengekania w’erianza eriyitha busana n’amaghaniryo, kisi siwukwe esisoni sy’erisaba obuwathikya. Abangyi abawithe amaghaniryo w’olhughumerera babirisondya emithambirire eyanga bawathikya erithekana n’erighuma. Ojebode, Kaoru, na Adriana abosi mubabana obuwathikya bw’abathambiri kandi hathya banemughuma ndeke.

Abadokita bangana kolesya omubatsi kutse ebinywe kutse ebyosi haghuma erithambira oyuli omw’amaghaniryo. Abawithe ekitsibu eki kandi bakayithagha obuwathikya bw’abahughu n’abanywani obuli mw’erilhumirirwa, erighumisirizya, n’eritsomana. Omunywani mubuyanga oyo mundu angathunga ni Yehova Nyamuhanga, oyukaha obuwathikya obuwene kutsibu omwa Kinywe kiwe, e Biblia.

Abawithe ekitsibu ky’amaghaniryo w’olhughumerera banganayithagha obuwathikya bw’omuthambiri ahabw’obuthuku buuli n’erigha ngoku banga kighumira omw’ikolha esyombinduka omwa ngebe yabu. Aliwe wamabya iwuli omwa maghaniryo w’olhughumerera, iwangana lindirira obuthuku bw’etseme obuli embere, ngoku Ojebode akakolha. Akabugha athi, “Ngalindirire eribererera lya Isaya 33:24, ahakabugha okwa mughulhu ekihugho simwendisyasabya oyukabugha athi ‘Nyilhwere.’” Nga Ojebode, bana erihumulikana omwa mulhaghe wa Nyamuhanga owa “ekihugho kihya-kihya,” omuthendisyasabya “eriaghalhwa.” (Eribisulirwa 21:1, 4) Omulhaghe oyo akakanganaya ngoku sihendisyabya bulhumi omwa malengekania n’omw’iyowa. Eriyowa lyawu ly’obulhumi likendisyahwaho kera na kera. Emyatsi yawu y’obulhumi “siyendisyasyibukwa, kutse erihika omwa muthima [wawu].”​—Isaya 65:17.