‘Neryo mutheghaye, kusangwa simwasi ekiro kutse endambi.’​—MATAYO 25:13.

‘Mutheghaye, mulebaye, kusangwa simwasi omughulhu oyo nga ni wahi.’​—MARIKO 13:33.

Neryo sihali oyuwasi ekiro ekyonyine-nyine ekyo enduli y’omughulhu mubi ono yikendi syasiramo. Aliwe, Nyamuhanga abirihiraho “omughulhu”​—“ekiro kutse esaha” ebyonyine-nyine—​ebyo enduli yikendi syasiramo. (Matayo 24:36) Mbwino eki kikamanyisaya kithi sihali ngoku thwanga minya enduli ku yiri hakuhi? Kwabithe bithya. Yesu mwabwira abigha biwe athi bakendi syalhangira ebindu nga by’ebyo ebikabya ebyanga kanganirye enduli kwa yiri hakuhi.

Ebikabya ebi byangabere kiminyikalho ‘ky’erihwererera ly’emighulhu.’ Yesu mwabugha athi: “Ekihanda kyasyalhwa n’ekindi kihanda, n’obwami bwasyalhwa n’obundi bwami, kandi hasyabya esyonzalha ehandi n’ehandi, n’emisiki ehandi n’ehandi.” (Matayo 24:3, 7) Kandi mwabugha athi hangabere “esyondwalha.” (Luka 21:11) Wunemulhangira ebya Yesu aminyerera?

Esyonyuhi esikathingithaya, esyonzalha, n’emisiki, kuthya n’amalhwere mangyi byabiriaghalya abandu. Ng’eky’erileberyako, omwa 2004 omusiki omunene kutsibu owabya omwa Indian Ocean mwaleka ihabya etsunami ey’itha abandu nga 225,000. Omo buthuku obulhabire oko mwaka, ekihunzo ky’ekorona (COVID-19) muk’ithire abandu nga miliyoni 2.6 omwa kihugho kyosi. Yesu mwabugha athi ebindu ng’ebi bikendi syabya ibikakanganaya ngoku enduli y’omughulhu mubi ono yiri hakuhi.

E Biblia yikahulha obuthuku obukendi thuhikya okwa nduli mwa ‘ebiro by’enyuma.’ (2 Petero 3:3, 4) Timoteo wakabiri 3:1-5, hakabugha hathi omwa biro by’enyuma-nyuma mwangabere abandu eritsandira ighuma. (Lebaya akasanduku “ Enduli y’Ekihugho Iyikayabya.”) Wunemulhangira abandu abayanzire, ab’omururu, ab’omuthima akalire, n’abathawithe lhwanzo? Ebi nabyo bikakanganaya ngoku thuli hakuhi-kuhi n’enduli y’ekihugho.

Ebiro by’enyuma-nyuma bikendi ghunza buthuku bungahi? E Biblia yithi, “kathambi kake buyira.” N’enyuma waho, Nyamuhanga iniathoghothya “abandu abakatsandaya ekihugho.”​—Eribisulirwa 11:15-18; 12:12.

Nyamuhanga abirihiraho ekiro n’esaha ebyo akendisyaletheramo enduli y’omughulhu mubi ono. (Matayo 24:36) Aliwe, hane eyindi ngulhu yuwene​—Nyamuhanga ‘syanzire omundu n’omughuma akahera.’ (2 Petero 3:9) Anemuha abandu b’akaghisa k’erighendera okwa bihano biwe. Busana naki? Kundi anzire ithwalhama okwa nduli y’ekihugho kino n’erisyabya omwa kihugho kiwe kihya, omughulhu ekihugho kikendisyabya ikyabiribya paradiso.

Nyamuhanga abirihiraho endegheka y’erikangiriribwa omwa kihugho kyosi eriwathikya abandu erigha ngoku bangasyabya omwa kihugho kihya-kihya ahisi sy’Obwami bwiwe. Yesu mwabugha athi engulhu yuwene ey’Obwami bwa Nyamuhanga yasyathulhughanibwa “omo kihugho kyosi.” (Matayo 24:14) Omwa kihugho ekyosi, omwa 2019 Abema ba Yehova mubakolesirye esyosaha esilhabire omu bbiliyoni ibiri bakathulha n’erikangirirya abandu omwatsi we Biblia ow’amaha. Yesu mwabugha athi erithulhughania eri lyangakolirwe omwa kihugho kyosi enduli yithe yasa.

Obuthuku bw’abandu erithabalha bukisiya ibwahwaho. Aliwe engulhu yuwene yiri yithi wangana lhama okwa nduli y’ekihugho n’erisyabya omwa kihugho Paradiso ekyo Nyamuhanga abirilhaghanisya. Omwatsi ow’akakwamako akendikania ngoku wangasyabya omwa kihugho kihyaka ekyo.