Omwatsi w’ahanyuma abirikangania ngoku Nyamuhanga akisiya iniaghunzaho abandu babi n’ebitsibu ebyosi. Thutholere ithwayikethera ngoku eki kikendibya. Busana naki? Kundi Ekinywe kya Nyamuhanga, e Biblia, kyabirilhaghanisya bino:

‘Ekihugho kyasyahwa.’​—1 YOANE 2:17.

Thutholere ithwayikethera ngoku hakendisyabya abakalhama kundi kandi omulhondo owali ahighulhu oyu akalhaghanisaya athi:

‘Oyukakolha erisonda lya Nyamuhanga asyakotha kera na kera.’

Neryo kwesi, ekikulhu ekyangaleka omundu inialhama ly’erikolha erisonda lya Nyamuhanga. Erithoka eriminya erisonda lya Nyamuhanga nga ni ryahi, thutholere ithwatsuka erimuminya.

Yesu mwabugha athi: “Eyi ni ngebe y’erikotha, abandu bakuminye, iwe Nyamuhanga mughuma w’ekwenene.” (Yoane 17:3) Erilhama okwa nduli n’erisyabyaho kera na kera, thutholere ‘ithwaminya’ Nyamuhanga. Ekyo sikirisubulira okw’ithaminya kw’aneho lisa kutse erithaminya buyira bindu bike eby’okwenene ebimuhambireko. Thutholere ithwabya banywani biwe. Obunywani bwosi-bwosi erithoka erilholha embere, bukayithagha eribanirana obuthuku bw’erisiba haghuma. Kwabine bithya n’okwa bunywani na Nyamuhanga. Thalengekania okwa myatsi mikulhu-mikulhu mirebe ey’ekwenene eyo thukigha omwa Biblia eyikathuwathikaya eribya n’obunywani na Nyamuhanga n’erikulha-kulhaniabo.

Thukalya ebyalya obuli kiro nuku thubyeho. Aliwe Yesu mwabugha athi: “Omundu syendisyabyaho busana n’obundu ibwobwene, nikwa busana n’obuli kinywe ekikalhua omwa buno bwa Nyamuhanga.”​—Matayo 4:4.

Munabwire, thukabana ebinywe bya Yehova omwa Biblia. Wukendibya wuk’igha ekitabu ekibuyirire ekyo, wukendi minya emyatsi mikulhu-mikulhu ey’ekwenene eyihambire okwa bya Nyamuhanga abirikolha, eby’anemukolha lino, n’eby’akendi syakolha.

Wanga kolhaki wamanza erikwama obusondoli bwa Nyamuhanga aliwe ikyakukalira erileka ebyo akabugha athi biwire? Okw’ekyo, eriminya Nyamuhanga kyangana kuwathikya omwa nzira y’embaghane.

Thalengekania okwa mukali oyo thukendyahulhamo Sakura, oyuwabya omwa ngebe y’obutswatswa. Abere akatsuka erigha e Biblia, mwigha ekihano kya Nyamuhanga ekikabugha kithi “musaghe obusingiri.” (1 Abanya Korinto 6:18) Sakura mwasaba Nyamuhanga y’akaghalha neryo mwathoka erileka omutse mubi oyu. Aliwe akinarwanisaya erilengwako. Akabugha athi: “Namasa mw’amalengekania w’eby’obutswatswa, ahathe eribisirira ngakanaya na Yehova omwa musabe, inganasi ngoku sinangathoka erirwanisya eki ingyuwene. Amaaka w’omusabe abirinyithunda hakuhi na Yehova.” Nga Sakura, esyomiliyoni sy’abandu banemuminya Nyamuhanga. Anemubaha amaaka agho bakayithagha erikolha esyombinduka omwa ngebe yabu n’eribya omwa ngebe eyikamutsemesaya.​—2 Abanya Korinto 4:7.

Wukabya wuk’ongera eriminya Nyamuhanga, nayu kw’akan’ongera athya ‘erikuminya’ ng’omunywani wiwe w’obughuli. (Abanya Galatia 4:9; Esyonyimbo 25:14) Neryo ibbwa aho iwukendi tholera eringira omwa kihugho kihya-kihya kya Nyamuhanga. Aliwe ibbwa ekihugho kihya ekyo kikendi syasosa kithi? Omwatsi ow’akakwamako akendi soborera ekyo.