Ekihugho Kihya-kihya Paradiso Ekiri Hakuhi!
Nyamuhanga mwahangika ekihugho nuku abandu abathunganene bikale kukyo kera na kera. (Esyonyimbo 37:29) Mwahira omulhume n’omukali ab’erimbere, Adamu na Eva, omw’irima eryuwene erye Edeni, kandi mwabaha ibo n’abaana babu olhukwamirwa lhw’erilima n’eritheya ekihugho.—Enzuko 1:28; 2:15.
Ekihugho kya munabwire si Paradiso ngoku Nyamuhanga aby’anzire ikyabya. Aliwe, Nyamuhanga syali athahindulha amalengekania wiwe. Akendi syaberererya athi ekighendererwa kiwe ky’erimbere? Ngoku kiri omwa myatsi ya hanyuma, Nyamuhanga syendi syathoghothya ekihugho kyonyine-nyine. Aliwe, akendisya lighira abandu abathaleghulha erikalha kukyo. Omughulhu Nyamuhanga akendi syaberererya emilhaghe yiwe, emibere yikendi syabya yithi okwa kihugho?
Egavumente y’ekihugho kyosi
Lino-lino, egavumente nyihya-nyihya ya Nyamuhanga ey’elhubulha yikendibya yikathabalha okwa bandu abosi, ekihugho akendi syabya mwanya owakatsemesaya ogho abandu bangan’ikalhamo haghuma omwa bughuma n’erikolha emibiiri mibuya kandi eyikabaghasira. Nyamuhanga abirisombolha Yesu Kristo erithabalha ekihugho. Erithendibya ng’abathabali bangyi abamunabwire, Yesu akendi syatsomana ndeke ebiyithawa by’abandu biwe. Obuthabali bwiwe bukendi syaseghemera oko lhwanzo, kandi akendi syabya Mwami w’olhukeri, ow’olhukogho, kandi ow’obulingirirania.—Isaya 11:4.
Obughuma omwa kihugho kyosi
Abandu abakendi syabya omwa kihugho kihya-kihya sibendi syaghabulhana omwa by’amahanga n’eby’esyonganda. Abandu bakendisyabya bughuma. (Eribisulirwa 7:9, 10) Abandu abosi abakendi syabya okwa kihugho bakendi syanza Nyamuhanga n’abaliranwa, kandi bakendi syakolongana omwa buholho bakaberererya ekighendererwa kya Nyamuhanga eky’erimbere eky’eritsomana ekihugho, obwikalho bwabu.—Esyonyimbo 115:16.
Erihambangana ndeke n’eby’obuhangwa ebithuthimbireko
Omughulhu Obwami bwa Nyamuhanga bukendi syathabalha ekihugho, Omuhangiki akendi syasondolha ndeke amathuku. (Esyonyimbo 24:1, 2) Omughulhu Yesu abya okwa kihugho, mwakangania obuthoki obwa Nyamuhanga amuha akahunia bwegho-bwegho ekihunga. (Mariko 4:39, 41) Ahisi sy’obuthabali bwa Kristo, sihendi syabya ebitsinduli. Obwami bwa Nyamuhanga kandi bukendi syaleka ihathasyabya obughuma ahakathi-kathi k’eby’obuhangwa n’abandu ngoku kyabya erimbere.—Hosea 2:18.
Amaghalha awuwene n’ebyalya bingyi
Obuli mundu akendisyabya n’amaghalha awuwene. Sihali oyukendi syalhwalha, erikekelhuha, kutse eriholha. (Isaya 35:5, 6) Abandu bakendi syatsemera ekihugho ekyuwene kandi ekiyonzire ekiri ng’ekya bandu b’erimbere batsemera omw’irima lye Edeni. Omo kihugho kihya, ngoku kyanabya omo Edeni, ekithaka kikendi syahulhukya ebyalya bingyi n’abandu abosi bakendisyabya n’ebyalya bingyi. (Enzuko 2:9) Ng’ekihanda kya Nyamuhanga ekye Israeli, abosi omo Paradiso ‘basyalya akalyo kabo n’eryughutha.’—Abalawi 26:4, 5.
Obuholho n’obuyirinde bw’okwenene
Ahisi sy’egavumente ya Nyamuhanga ey’ekihugho kyosi, abandu abosi bakendi syabya omwa buholho kandi ibakolongana omwa lhukeri n’obulingirirania. Sihendi syabya esyonyuhi, erikolesya obuthoki bwa nabi, kandi obuli mundu akendi syabya n’ebiyithawa biwe. E Biblia yikalhagha yithi: “Obuli mundu asyikalha okwa ndina y’omuliki wiwe w’ebinyu n’omo ndina y’omuthini wiwe; kandi sihali oyuwasyubahyabo.”—Mika 4:3, 4.
Amanyumba awuwene n’omubiiri owakatsemesaya
Obuli famile yikendi syabya n’ah’erikalha isibasaghire bathi bakendi sighaniaho, kandi thukendi syaghasirwa omwa mibiiri yosi eya thukendi syakolha. Ngoku e Biblia yikabugha, abakendi syabya omwa kihugho kihya-kihya kya Nyamuhanga “sibendi syakolera busa.”—Isaya 65:21-23.
Erikangiriribwa eryuwene kutsibu
E Biblia yikalhaghanisaya yithi: “Ekihugho kyasyusulha n’eriminya ly’Omwami Mukulhu.” (Isaya 11:9) Abakendi syabya omwa kihugho kihya-kihya bakendi sy’igha bingyi okwa menge manene w’Omuhangiki wabu, Yehova, n’okwa bindu ebyuwene eby’ahangika. Sibendi syakolesya amenge wabu erikolha ebindu by’amalhwa kutse erikolha abandi ba nabi. (Isaya 2:4) Omwakanya k’ekyo, bakendi sy’igha ngoku bangabya bughuma n’abandi n’eritheya ekihugho.—Esyonyimbo 37:11.
Engebe ya kera na kera
Nyamuhanga mwakangania eritsomana linene akathegheka ekihugho nuku thutsemere engebe omo buswire obuli kiro. Anzire abandu ibikalha okwa kihugho kera na kera. (Esyonyimbo 37:29; Isaya 45:18) Nyamuhanga eriberererya ekighendererwa kiwe eky’erimbere, “asyaherya olhuholho busana na kera na kera.” (Isaya 25:8) E Biblia yikalhaghanisaya yithi: “Olhuholho si lhwendi sasyabyaho, erisusumana kutse eririra, kutse eriaghalhwa.” (Eribisulirwa 21:4) Nyamuhanga akendi syaha abandu bosi—ab’akendi syalhamya akathoghothya ekihugho kibi kino n’akathabarika k’ababiriholha abakendi syalhubuka omwa kihugho kihya-kihya—b’akaghisa k’eribyaho kera na kera.—Yoane 5:28, 29; Emibiri 24:15.
Na lino, esyomiliyoni sy’abandu omwa kihugho kyosi banemuyitheghekera eribya omwa kihugho kihya-kihya ekikayasa. Nomwakine indi si bahikene, banemulengaho eribya bandu abo Nyamuhanga anzire ibabya omwa kihugho kiwe ekihya-kihya. Bathi? Omw’igha oku Yehova Nyamuhanga n’oyo athuma, Yesu Kristo.—Yoane 17:3.
Thasyaminya bingyi ngoku wanga lhama okwa nduli y’ekihugho kino n’eribya omwa kihugho ekyuwene ekikayasa. Ligha eryeghesibwa e Biblia n’omughuma w’okwa Bema ba Yehova, kutse babane omw’ighenda okwa muthahulha wabu owe jw.org.
You May Also Like
AKALEBERYO
Obwami bwa Nyamuhanga Bukendi Syakolhaki?
Yesu abya inianasi ngoku Obwami bwa Nyamuhanga y’egavumente nyisa eyanga ghunza okwa kihugho kw’ebitsibu. Ni byahi ebya Obwami obo bwabirithakolha ebikathughumaya?
